نڤیسار

پەكەكە ل سەر باشوور خەتەرتر دبە

ب ده‌هان سالانه‌ کو ئه‌ز، گه‌له‌ک سیاسه‌تڤان و نڤیسکارێنێن کوردستانێ ژ هه‌موو به‌شێن کوردستانێ، خه‌ته‌ریا پەكەكێ ل سەر هه‌موو به‌شێن کوردستانێ و ب تایبه‌تی ژی خەتەرا وێ ل سەر كیانێ باشوورێ کوردستانێ دا‌ دنڤیسینن. د ده‌ربارێ ڤێ پرسێ دا‌ بالا ڕایا گشتی یا کوردستانێ، بالا هه‌موو کوردێن ل دنیایێ، ب تایبه‌تی ژی بالا ده‌ستهلاتداری، حكومەت، سه‌رۆکاتی، پارتیێن باشوورێ کوردستانێ دکشینن و پێشنیارێن خوه‌ پێشکێشی وان  دکن.

ئەز دکارم ببێژم کو ژ بۆنا ڤێ پرسگرێکێ، ژ بۆنا ستاتویا پەكەكێ یا خه‌ته‌ر ل باشوورێ کوردستانێ؛ 400 ڕه‌وشه‌نبیر، هونه‌رمه‌ند، نڤیسکار، سیاسه‌تڤان، کارمه‌ند و حقووقزانان  پرۆژه‌یه‌ک دەست پێ كرن. ئه‌ز ژی د ناڤ دا،‌ شاندەیەكێ   ل سه‌ر ناڤێن وان 400 که‌سێن ناڤدار و هێژا و قه‌دربلند، سەردانا باشوورێ کوردستانێ كر و ب سه‌رۆکاتیا پەرلەمەنتۆتا کوردستانێ ڕا‌، ب به‌رپرسیارێن سه‌رۆکاتیا ھەرێما کوردستانێ و حكومەتا کوردستانێ و پارتیێن سیاسی یێن باشوورێ کوردستانێ ڕا دانووستاندن کرن، پێشنیارێن خوە پێشکێش کرن. وێ شاندەیێ جڤینێن چاپه‌مه‌نی و ھەڤپەیڤین دگەل ته‌له‌ویزیۆنان  ل دارخاستن.

هه‌زار مخابن هه‌تا نووها پرسگرێکا پەكەكێ ل باشوورێ کوردستانێ چاره‌سه‌ر نه‌بوو. پەكەكە داگیرکه‌ریا خوه‌ یا ل گوندان، ل مەخموور، ل شنگالێ و گه‌له‌ک ده‌ڤەرێن کوردستانێ بەردەوام دكە‌. پەكەكە ناهێله‌ کو گوندی ل گوندێن خوه‌ چاندیێ بکن. ژ گوندیان باج و خه‌راچ دگرن. گوندیان دره‌ڤینن ل وان ئێشکه‌نجه‌ دکن و وان دکوژن. زارۆکێن گوندیان دره‌ڤینن، وان زارۆکان دکن له‌شکه‌ر (گه‌ریڵا) و ددن کووشتن، ئان ژی وان ب خوه‌ دکووژن.

پەكەكە دبه‌ سه‌ده‌م کو ده‌وله‌تا ترک ل د ناڤ ئاخا باشوورێ کوردستانێ دا‌ ئۆپه‌راسیۆنان چێ بکن، گوند ڤالا ببن، دارستان بێن شه‌وتین و بێن برین.

پەكەكە، ده‌ستهلاتداریا، حقووق، نیزاما ده‌وله‌تا فه‌ده‌ره‌ یا کوردستانێ ناس ناکه‌ و ڕه‌وا قه‌بوول ناکه‌.

گه‌له‌ک جاران پەكەكێ ئێرش بریه‌ سه‌ر هێزا له‌شکه‌ری یا کوردستانێ پێشمه‌رگه‌یان.

ژ بۆنا ده‌وله‌تا فه‌ده‌ره‌ یا کوردستانێ ژ هۆلێ ڕاکه‌، ژ ده‌وله‌تێن کۆلۆنیالیست ڕا‌ تاشه‌رۆنیێ دکه‌. ب حه‌زێن دژمنێن کوردستانێ یێن ته‌رۆریست ڕا (وه‌ک داعشێ، حەشدا شەعبی، حزبوڵاهێ‌) را هه‌ڤکاری و هه‌ڤالتیێ دکه‌.

لۆما ژی پەكەكە خه‌ته‌رتر دبە. دبێژه‌ کو “ئێزدی نه‌ کوردن”..

پەكەكە،  ژ بۆنا کو رێكەفتنا شنگالێ پێک نەیێ ب حەشدا شەعبی   ڕا‌ هه‌ڤکار و هه‌ڤالبه‌نده‌. پەكەكە، ژ بۆنا کو ل شنگالێ داگیرکه‌ری و ده‌ستهلاتداریا خوه‌ بەردەوام بكە کارێن گه‌له‌ک خه‌ته‌ر و فکرێن ده‌رڤه‌یی کورداتیێ دپارێزه‌.

پەكەكە و به‌رپرسیارێن وان یێن ل شنگالێ گه‌له‌ک ئاشکه‌ره‌ دبێژن کو شنگال نه‌ ئاخا کوردستانێ یه‌ و کوردێن ئێزدی ژی نه‌ کوردن.

“به‌رپرسێن پەكەكێ یێ ل شه‌نگالێ سه‌عید حه‌سه‌ن خزر هه‌تا کو رژێما سه‌ددام هلوه‌شییایه‌، ئه‌و هه‌ڤالبه‌ندێ پارتییا بەعس و سەددام بوو. ئانها د ناڤا پەكەكێ دا‌ ب کۆدناڤێ “باهۆز” تێت ناسکرن و به‌رپرسێ ئیستخباراتا پەكەكێ ل شنگالێ یه‌”

سه‌عید حه‌سه‌ن خزر، ب خوه‌ کورده‌کی ئێزدی یه‌. د ڤان ڕۆژێن داوی دا‌  ل بەغدایێ ل سه‌ر ناڤێ پەكەكێ گه‌له‌ک ب هێسانی دانووستاندنان دکه‌. د داخویانیەكا خوە دا ب  ته‌له‌ڤزیۆنەكا عیراقێ ڕا‌ دیار کر کو “ئێزدی نه‌ کوردن”

لێ دڤێ بێ زانین کو پەكەكە ژ ده‌ستپێکێ دا‌ و پشتی کو شنگال ھاتی داگیر كرن  گه‌له‌ک ئاشکه‌ره‌ دیار کر کو “شنگال نه‌ ئاخا کوردستانێ یه‌. ئاخا عه‌ره‌بانه‌. کوردێن ژی نه‌ کوردن.” ب ئه‌ڤێ هه‌لوه‌ستا خوه‌ د ناڤ کوردێن ئێزدی دا‌ ژ خوه‌ ڕا‌ سیخوور و هه‌ڤالبه‌ند و خوولام چێکرن.

پەكەكە دخوازه‌ ل سه‌ر ناڤێ نیژادپه‌ره‌ست و ته‌رۆریستێن عه‌ره‌ب ل کوردستانێ ده‌سته̇لاتدار به‌.

پەكەكە ب ده‌هان سالانه‌ کو دخوازه‌ ل باشوورێ کوردستانێ ده‌ستهلاتدار به‌. ده‌ما کو دیت کو نکاره‌ ده‌ستهلاتدار ببه‌، ئه‌ڤ جار ستراته‌ژییه‌کا‌ نوو مه‌شاند. ژ بۆنا کو ده‌وله‌تا فه‌ده‌ره‌ یا کوردستانێ خراب ببه‌، ده‌ست ب خه‌بات و خرابیێ کر. لێ دیاره‌ کو دێ د ئه‌ڤێ ستراته‌ژیا خوه‌ دا‌ ژی ب سه‌رنەکه‌ڤه‌. نووها ستراته‌ژیه‌کا نوو هلدبژێره‌. وه‌ک هێزه‌کا‌ عه‌ره‌بان یا نیژادپەره‌ست و دژمنێ کوردان و هه‌ڤاله‌ندیا حەشدا شەعبی   دمه‌شینه‌.

وه‌ک تێ زانین کو حكومەتا کوردستانێ و حكومەتا فه‌ده‌رال یا ئیراقێ ل ھەڤ كرن كو ئه‌و هه‌رێم و ده‌ڤه‌رێن ل کوردستانێ کو د چارچۆڤەیا مادەیا  140ێ  یا دەستوورا ئیراقێ دا‌ تێن قه‌بوول کرن و شرۆڤه‌ کرن، هێزا ده‌وله‌تێ و هێزا کوردستانێ، پێشمه‌رگه،‌ ب هه‌ڤ ڕا ئه‌وله‌وه‌یێ پێک بینن .

ئه‌م ده‌ربارێ ڤێ مژارێ دا گوھ بدن نڤیسکار شه‌خمووس ئۆزه‌نگین. ئه‌و دنڤیسینه‌ و دبێژه‌: “پەكەكە، ل سه‌ر بریارا “ناڤچه‌یێن مادەیێ 140ێ کو وێ پێشمه‌رگه‌ و ئارتێشا ئ̇یراقێ ب هه‌ڤ ڕا‌ بپارێزن” خوه‌ ئاجز دکه‌ و جاره‌ک دن ب زمانه‌کی قرێژ ئاشکه‌ره‌ دکه‌ کو “ئه‌م قه‌بوول ناکن کو پێشمه‌رگه‌ ل ڤان ده‌ڤه‌ران بمینه‌”(!)

پەكەكه‌ دخوازه‌ ب ئالیکاریا حەشدا شەعبی، وان ناڤچه‌یێن کوردستانێ، کو ب ناڤچه‌یێن مادده‌یا ۱٤۰ تێن ناسکرن، ژ هێزێن پێشمه‌رگان ڤالا بکه‌ و تفاقا ناڤبه‌را پێشمه‌رگان و ئارتێشا ئ̇یراقێ هلوه‌شینه‌.

سه‌عید حه‌سه‌ن، یه‌ک ژ فه‌رماندارێن هێزێن پەكەكێ ل شنگالێ کو نها ل به‌غدایێ یه‌، د هه‌ڤدیتنه‌کی دا‌ د گه‌ل یه‌ک ژ که‌نالێن ته‌له‌ڤزیۆنی یێن نێزیك نوری مالکی دا دبێژه‌: “ئه‌م و حەشدا شەعبی  (تایبه‌ت عه‌سائیبی ئه‌هلی حه‌ق) ب هه‌ڤره‌ ئاماده‌کارییێ دکن کو ڤان ناڤچه‌یان ژ پێشمه‌رگه‌یان پاقژ بکن”(!)

سه‌عید حه‌سه‌ن کی یه‌؟

سه‌عید حه‌سه‌ن سه‌عید خزر، که‌سه‌ک ئێزدییه‌ کو دبێژه‌  ژ گوندێ هۆزا حه‌بابا یا شێنیێ گوندێ زومانێ یێ سه‌ر ب شنگالێ ڤه یه‌. وه‌که‌ به‌رپرسێ گشتی یێ یەبەشێ  ئه‌رکداره‌. سه‌عید حه‌سه‌ن، یه‌ک ژ مه‌زنترین به‌رپرسێ “ئێزدی”یێن د ناڤ پەكەكێ دا‌، ل شنگالێ تێ ناسین کرن.

سه‌عید حه‌سه‌ن، ژ ئالیێ مادی ڤه‌، پشتی کو که‌تییه‌ د ناڤ ته‌ڤگه‌را پەكەكێ و کار و خه‌باتێن با‌زرگانییا نه‌ یاسایی دکه‌، پر ده‌وله‌مه‌ند بوویه‌.

به‌رپرسێ تێکلییێن ناڤبه‌را پەكەكێ و حەشدا شەعبی یە و ل به‌غدایێ یه‌.

ئه‌ڤ یه‌کا ژی دیار دکه‌ کو پەكەكە دخوازه‌ ب ئاوایه‌کی ل سه‌ر ناڤێن نیژادپه‌ره‌ست و ته‌رۆریست یێن عه‌ره‌بان ل کوردستانێ ببن ده‌ستهلاتدار و کاربده‌ست.

دڤێ حكومەتا کوردستانێ و ب تایبه‌تی ژی حكومەتا فه‌ده‌رال یا ئیراقێ ئیزن نه‌ده‌ ئه‌ڤ پلان و بریارا قرێژ؛ دڤێ سه‌روه‌ریا خوه‌ بپارێزن

سه‌وه‌ریا ده‌وله‌تا فه‌ده‌رال یا ئیراقێ و ده‌وله‌تا فه‌ده‌ره‌ یا کوردستانێ د بن خه‌ته‌ریێ دا یه‌. ئه‌ڤ خه‌ته‌ریە ژ ئالیه‌کی ڤه‌ ب ده‌ستێن ده‌وله‌تان تێ هۆلێ. ژ ئالیێ دن ڤه‌ ب ده‌ستێ ڕێخستنێن ته‌رۆریست و ژ ده‌رڤه‌یی یاسایێ  (پەكەكە، حەشدا شەعبی و رێخستنێن دن یێن تەرۆریسە) دقەومە.

ده‌وله‌تا فه‌ده‌رال یا ئیراقێ و ده‌وله‌تا فه‌ده‌ره‌ یا کوردستانێ دڤێ پێشیا ڤێ خه‌ته‌ریێ بگرن. هێزێن ته‌رۆریست بێچه‌ک بکن. وان تەسفیه‌ بکن. هه‌گه‌ر وان تەسفیه‌ نه‌کن، نکارن ببن ده‌وله‌ته‌کا‌ سه‌ربخوه‌ و سه‌روه‌ر.

ئیبراهیم گوچلو

دیاربەكر

2021.06.02

Back to top button