قه‌ندیل و سلێمانی، جاردن ل دژێ پارتیا دەمۆكراتا كوردستانێ (پەدەكە) که‌تنه د ناڤا له‌یزتکان و سه‌ناریۆیا ل سه‌ر ده‌ره‌وان دنڤیسینن. ئه‌گه‌ر پرس پرسا ره‌خنه‌کرنا پەدەکێ به و به‌حسا کێماسیێن پەدەکێ بھێتە کرن ئه‌ڤ یه‌ک تشته‌که کو مرۆڤ دبێژه مافێ هه‌ر ئالیه‌کیه ئالیه‌ک دن ڕه‌خنه بکه و به‌حسا کێماسیێن هەڤ دو بکن. لێ ئارمانجا ڤان هه‌ردو ناوه‌ندا نه ره‌خنه‌کرنا پەدەکێ یه. لێ ئه‌و د بنگه‌هێ خوه دا سه‌روه‌ریا باشوورێ کوردستانێ و رێیا به‌ر ب ده‌وله‌تبوونێ ڤە دچه قه‌بوول ناکن و شه‌رێ پەدەکێ دکن. ئه‌و نه‌وێرن ڕاسته‌ڕاست ئێریشی حوکومه‌تا هه‌رێما کوردستانێ و وان ده‌زگه‌هێن کوردستانێ به‌ر ب سه‌رخوه‌بوونێ ڤه دبن بکن.
یەكێتیا نشتمانیا كوردستانێ (یەنەکە)وتەڤگەرا گۆران د ناڤ حوکومه‌تێ دا نه، سەرۆك و به‌رپرسێن پارله‌مه‌نتۆیا کوردستانێ نه، جیگرێن سه‌رۆکێ هه‌رێما کوردستانێ نه. هه‌ر بریاره‌ک ل سه‌ر ناڤێ سه‌رۆکاتیا کوردستانێ ، ل سه‌ر ناڤێ حوکومه‌تا کوردستانێ دەربكەڤە، بڤێ نەڤێ ئەو شەریکن. باشه ماده‌م ڕه‌وش ئه‌ڤه، ئەڤ قرقرا ڤاله ژ بۆ چیه؟
ل ڤێ ده‌رێ دو ئالیێن جودا هه‌نه، پارتیا كاركەرێن كوردستانێ (پەکەکە) و یەنەکە. دو تشت ڤان هه‌ردو ئالیان دگەهینە هه‌ڤ، یه‌ک سیخووریا ده‌وله‌تا ئیرانێ و دویه‌م ژی دژاتیا پەدەکێ و ڕێیا خه‌تا نه‌ته‌وی یه.
ده‌ستهەلاتداریا کوردستانێ پێك دھێت ژ؛ سه‌رۆکاتیا هه‌رێمێ، حوکومه‌تا هه‌رێمێ و پارله‌مه‌نتۆیێ. د بنگه‌هێ خوه دا، ئه‌ڤ هه‌ردو ئالی، پەكەكە و یەنەكە، ل دژێ ده‌ستهەلاتا کوردستانێ نه، لێ دورووتیێ دکن و ب زانه‌بوون پەدەکێ دکن ئارمانج.
پەکەکە نه پارتیه‌کا باشوورێ كوردستانێ یە. ژ خوه نه کوردستانیه ژی. جهێ خه‌باتا بنگه‌هین ل گۆرا وان باکورێ کوردستانێ یه. ھەبوون و ماینا وان ل باشوور نه یاساییه و ئەو بوونه ئاسته‌نگا هه‌ری مه‌زن ژ بۆ پێشڤه‌چوونا کوردستانێ. هه‌روه‌ها هه‌ر قۆناخا کو ڕه‌وش ئالۆز دبه ڤێ یه‌کێ ژ بۆ خوه وه‌ک دەرفەتەكێ دبینن و ئێریشێن خوه زێده‌تر دکن. ئه‌گه‌ر ڕه‌خنه‌یه‌ک ل حوکومه‌تا کوردستانێ بێ گرتن، ئه‌و ژی ئه‌وه کو ژ بۆ چ ئه‌وقاس ڕێ ددن بزاڤ و تەڤگەرێن پەکەکێ یا نه یاسایی ل باشوورێ کوردستانێ؟ ئه‌ڤ پرسه‌ک گەلەك گرنگه و هه‌ر ده‌ما ده‌ستهەلاتداریا کوردستانێ به‌رسڤا ڤێ پرسێ زه‌لال بکه ، دێ خه‌ته‌ریا ڤێ ڕێخستنا خرابیان دکه ل سه‌ر سه‌روه‌ریا کوردستانێ کێم ببه و ژ هۆلێ ژی ڕابه.
پەکەکە ل دژی هه‌موو خەباتێن ژ بۆنا ده‌وله‌تبوونا کوردستانێ یه. قه‌ندیل د گه‌ل ڕ‌ژێمێن داگیرکه‌ر کار دکه، ڕه‌وشا ئۆجەلان زه‌لاله.
ژ ئالیه‌ک دن ڤە ڕه‌وشا یەنەکێ ل هۆلێیه. ئه‌و ئالیێن کو خیانه‌تا 16ێ ئۆکتۆبه‌رێ کرین، نها هه‌ڤسه‌رۆکێن یەنەکێ نه ، یانی ئێدی یەنەک نه یەنەكا به‌رێ یه. ماده‌م ئه‌و ئه‌نده‌زیارێن 16 ێ ئۆکتۆبه‌رێ خیانه‌ت کرنه، گه‌لۆ ئیرۆ چ دکن؟ د بنگه‌هێ خوه دا هه‌مان تشتێ دکن. 16 ێ ئۆکتۆبه‌رێ دا ژی د گه‌ل پەکەکێ هه‌ڤکاربوون. ئیرۆ ژی د پرسگرێکا زینا وه‌رتێ دا هه‌ڤکارن.
لێ ئه‌وێن کو دوهی لاهۆر و پاڤه‌ل ب خیانه‌تێ ناسدکران، ئیرۆ هه‌مان تشتی ناکن. ڕاسته هنده‌ک حه‌ساسیه‌تێن هه‌رێمێ و کوردستانێ هه‌نه، لێ دێ هه‌تا که‌نگی ئه‌و خه‌ته‌ری وه‌ک ته‌هدیده‌کێ ل سه‌ر کوردستانێ به؟ ده‌ما که‌یفا وان دخوازه، به‌حسا دو ئیداره‌یێ دکن، به‌حسا خوه‌سه‌ریا سلێمانیێ دکن. هه‌ر ده‌می ڤێ یه‌کێ وه‌ک ته‌هدیده‌کێ ل دژی خه‌تا نه‌ته‌وی ب کار تینن.
تشته‌ک گه‌له‌ک بالکێش هه‌یه کو، هنده‌ک که‌سایه‌تی و ئالیێن سیاسی کینه‌ک مه‌زن ل هەمبه‌ر پەدەکێ د زکێ خوه دا خوه‌دی دکن. ژ بۆ ڤێ ژی ده‌ما یەنەکە یان ژی پەکەکە ل دژی پەدەکێ دسه‌کێنن که‌یفا وان تێ و ب گه‌له‌ک زانه‌بوون ژ هه‌لوه‌ستا ڤان هه‌ردو ئالیان ڕا ل چه‌پکا تێخن. لێ ده‌ما به‌حسا سه‌رخوه‌بوونا کوردستانێ ژی تێ کرن ل دژ ده‌رناکه‌ڤن و خوه وه‌ک که‌سایه‌تێن ل سه‌ر خه‌تا نه‌ته‌وی ددن نیشاندان. ئه‌ڤ ئالی خه‌ته‌ره، دوروونه و کورمه‌ک خرابن د سیاسه‌تێ دا.
د ڕه‌وشا ئیرۆ دا دوو ڕێ ل پێشیا سیاسه‌تا کوردا هه‌نه:
یه‌ک ژی پاراستنا ده‌ستکه‌فتیێن کوردستانێ یه، ڤه‌کرنا ڕێیا به‌ر ب سه‌رخوه‌بوونێ دچە یه، به‌رژه‌وه‌ندیێن کوردستانی د سه‌ر هه‌ر تشته‌کی را گرتنه ، ب کورتی پاراستنا خه‌تا نه‌ته‌ویه.
دویه‌م ژی ئه‌و ڕێیا خه‌تماندنا سه‌رخوه‌بوونێ یه و دژاتیا هه‌موو ئالی و ده‌زگه‌هێن کو ل سه‌ر خه‌تا نه‌ته‌وی سیاسه‌تێ دکن ئارمانجا وان یا سه‌ره‌كیە.
ڤێجا هه‌ر که‌س ئازاده.
2020.05.03
ن . فرات
