پەكەكە ھەر دەرێ دپارێزە ژبلی باكور
پارتیا كاركەرێن كوردستانێ (پەکەکە) ب پڵان و ب ستراتژیەتەکە درێژمەودا ل باشوور کار دکە و ھەموو شیانێن خوە خستینە کار ژبۆنا كو سەربۆڕا ڕۆژئاڤایێ كوردستانێ ل باشوور ژی جی بجی بکە. یەک ژ پلانێن جیبجێکرنا ستراتژیەتا پەکەکێ، بکارئانینا ھێزێن چەکدارە، ئانکۆ ڕاگەھاندا جەنگی یە ل ھەمبەر حکومەتا باشوورێ کوردستانێ. بتایبەتی پشتی ل ڕۆژئاڤا بھاریکاریا ڕژێما بەعس باندۆرا خوە سەپاندی و ب رێیا ھەڤپەیمانیا ناڤدەولەتی چەک و جەبلخانەیەکا مەزن کەتیە دەستی. لەوما ژی پەکەکە، شەنگال و قەندیل و گەلەگ دەڤەرێن دن ل باشوور ل سەر حسابا خەلکێ سڤیل و کێم دەرامەت کرینە قادا جەنگێ خوە و ترکیا و ڕۆژانە زیانێن مەزن یێن جانی و کەرستەیی دگەھن خەلکێ ڤان دەڤەران، زێدەباری چۆلکرنا ب سەدان گوندان.
بزاڤ، چاڵاکی، ئیستفزاز و مایتێکرنێن پەکەکێ دکاروبارێن ناڤخوەیی یێن باشوورێ کوردستانێ دا بەلگەیەکێ حاشاھەلنەگرە کو پەکەکە ھەر ژ سەرھەلدنا باشوور تا ئیرۆ پالدەرێ تێکدانا سەقامگیریا سیاسی، ئابۆری و جڤاکی یا ڤی بەشێ ئازادکریێ کوردستانێ بوویە. وێ ھەموو گرانیا خوە دایە سەر ڤی بەشی و ھەیا نوکە شوونپێیەک ژی ل باکۆرێ کوردستانێ کو، قادا ڕاستەقینە یا خەبات و تێکۆشینا وێ یە، ئازاد نەکریە!!!
بەروڤاژی، ھێزێن ڕۆژھەلاتێ کوردستانێ، یێن پێخەمەت پاراستنا ئەزمۆنا باشوور ،قۆربانیێن مەزن داینە.
تشتێ سەیر، پەكەكێ دەمەکی بانگەشا کۆنگرا نەتەوی و یەکگرتنا ھێز و لایەنێن سیاسی و لەشکەریێن کوردستانی دکر ب مەرجێ پەکەکە پارتیا ڕێبەر بە و ئۆجەلان ژی سەرۆکێ نەتەوی بە.
ئیرۆژی پەکەکە و سەرکردایەتیا وێ یا قەندیلێ، بانگەشەیا ترکیایەکا بھێز، ئیرانەکا بھێز سوریایەکا بھێز و عیراقەکا بھێز دکە!!! بکار و کریار شەڕ ژبۆ پاراستنا یەکێتیا ئاخا ڤان وەڵاتان دکە و
دەولەتا نەتەوەیی ل سەر ئاسایشا ڤان دەولەتێن داگیرکەر ب مەترسی دزانە.
پارتیا دەمۆكراتا كوردستانێ (پەدەكە)، پێشمەرگە و مالباتا بارزانی کار ژبۆ دامەزراندنا دەولەتەکا کوردی دکەن لەوما ب دیتنا پەکەکێ، ئەو مەترسیێن مەزنن لسەر پڵان، پڕۆژە و ستراتیژیەتا وان وھاڤپەیمانێن وان.
سیاسەتا ئیرۆ ژی پەکەکە پەیرەو دکە ب ڕێیا ئاڤاکرنا ھێزێن چەکدار ژخەلکێ دەڤەرێن ل ژێر کونترۆڵا وێ ل ژێر ناڤێن سەیر وسەمەڕێن ڕەنگاوڕەنگ، سیاسەتا جەنگیزخان و تەیمۆرلەنگ و ئۆسمانیان تینە بیرا مرۆڤی،چونکە وان ژی، ھەر دەڤەرەکا داگیردکر،لەشکەرەک ژخەلکێ وێ دەڤەرێ ئاڤا دکر و دگەل گوھارتنا کاودان و بەرژەوەندیان، وی لەشکەرێ لسەر دەستێ داگیرکەران ھاتیە دامەزراندن ل ھەمبەر داگیرکەران بخوە شەڕ دکر.
تشتێ سەیر، سیاسەتا پەکەکێ و یا ئیران، ترکیا، عێراق و سوریا د وارێ دژایەتیکرنا دامەزراندنا دەولەتا سەربەخۆ یا کوردستانی دا ھەڤدگرە، ئانکۆ ئەڤ دەولەتێن داگیرکەر دڤان کاودانێن ھەستیار دا، پەکەکێ ب پارێزەرەکێ باوەرپێکریێ سنۆرێن خوە دزانن، لەوما ژی تم ھەوڵددەن پەکەکێ مینا ھێزەکا ل ژێر داخازێ و ئامادە، کشکەنە باشوور، ئەو باشوورێ سەردەمێ ڕیفڕاندۆمێ کاری پەردە لسەر گەلەک سەر و گەلەک دۆسیان ھەلدە.
ژبۆ ھەر کەسێ بانگەشە دکر کۆ باشوورێ کوردستانێ سەرخوەبۆنا بڕیارا خوە یا سیاسی ژدەست دایە، بەرۆڤاژیا وێ چەندێ ھات سەلماندن و ھەر کەسی ژی دیت کو ئەردۆگانێ دکتاتۆر، یێ کۆ لگۆرەی دیتن و شڕوڤەیێن گەلەک (سیاسەتمەدار وچاڤدێرێن سیاسیی) ڕیفراندۆم ب لیستکەکا وی لقەلەم ددان، کەسێ قاسی وی دژایەتیا ئەنجامدانا پرۆسا ڕیفراندۆمێ نەکر، تەنانەت کەسێ ھندی وی ژی سڤکاتی وبێڕێزی ژی نەکر.
دوھی ترکیا و عێراق و ئیرانێ گەڤ دکرن ،ئیرۆژی پەکەکە گەفان دكە. گەفێن پەکەکێ جددینە و ئەگەر دەلیڤە پێ بھێتەدان دێ دەستەکێ دی یێ شەڕی دگەل باشوور ئەنجامدەت، ئارمانجا پەکەکێ یا ئەشکەرا یا ڤێ جارێ دەستدانانا سەر باشوورێ کوردستانێ یە، ب ڕێیا ژناڤبرنا ھێزا چەکداری یا پەدەکێ.
ب ڤی ئاوایی ژی دێ دیسا ڕێ لھەمبەر ترکیا ڤەبە کو ھین پێتر باندۆرا خوە لسەر باشوور بسەپینە،چ بھێجەتا ھاریکاریا پەدەكێ ل دژی پەکەکێ و چ ژی ب ھێجەتا پڕکرنا ڤالاھیا ئەمنی و ب مەرەما پاراستنا ئاسایشا خوە یا نیشتیمانی. بێ گومان ئەڤ ژی ئارمانجا ڤەشارتی و یا ستراتیژی و ھەڤگرتی یا ترکیا و پەکەکێ یە.
ھێزێن کاریگەر ل سەر بڕیارا سیاسی ل بەغدا دگەل ڕژێما ئیرانێ چاڤەڕێی ژناڤبرنا مەترسیا پەدەکێ نە لسەر ئاسایش و یەکێتیا ئاخا وەڵاتێن خوە. ڕۆژ ب ڕۆژ ژی دھێتە سەلماندن کو پەکەکە ژی ژبۆ پاراستنا باکۆر نەھاتیە دامەزراندن، چونکە باکۆر ژ ھەڤالبەندێن وێ یێن کەمالیست ڤە پاراستیە.
ڕاستی ژی نە ھندا ڤەشارتی و نھێنی یە کو نەبینیت و نەبھیزیت،،بەلکۆ ڕاستی ئەڤە بخوەیە.
ئیدریس تروانشی
2019.07.01
