ئه‌نجوومه‌نا ئاساییشا هه‌رێما کوردستانێ ڕادگەهینه کو د ئه‌نجاما دو ئێریشێن درۆنان یێن گرووپه‌کا ته‌رۆریست دا پێنج پێشمه‌رگه ل سینۆرێ پارێزگه‌ها دهۆکێ بریندار بوون.
ئه‌نجوومه‌نا ئاساییشا هه‌رێما کوردستانێ رۆژا ۲۹ێ نیسانێ د داخویانیه‌کێ دا ڕاگەهاند” دوهی (٢٨\٤\٢٠٢٥) و ئیرۆ (٢٩\٤\٢٠٢٥) سه‌رێ سبه‌هێ، گرووپه‌کا ته‌رۆریست، د دو ئێریشێن جودا دا، ب درۆنان سەنگەرێن هێزا پێشمه‌رگه ل سینۆرێ پارێزگه‌ها دهۆکێ کرنه ئارمانج و د ئه‌نجامێ دا پێنج پێشمه‌رگه بریندار بوون.”
دا زانین ژی “ره‌وشا برینداران باشه و پێشمه‌رگه ئاماده نه ب ئیراده‌یه‌کا پۆلایین به‌رسڤا هه‌ر جوره پلان و ئێریشێن نه‌حه‌زان بدن.”
ئه‌نجوومه‌نا ئاساییشا هه‌رێما کوردستانێ گۆت ژی: “د ده‌مه‌کێ دا کو پرۆسه‌یا ئاشتییێ ل باکور و کۆنفه‌رانسا یه‌کیتیا ئالیێن کوردستانی ل ڕۆژاڤایێ کوردستانێ و پرۆسه‌یا ئاڤاکرنا کابینه‌یا نوو یا حکوومه‌تا هه‌رێما کوردستانێ نێزیکه بگەهیتە ئه‌نجامێ، هندەک ئالی و گرووپ هه‌ول ددن پرۆسه‌یا ئاشتی و ئارامیێ ل ده‌ڤه‌رێ ئاسته‌نگ بکن.”
هه‌روها گۆت: “ئه‌م وه‌ک ئه‌نجوومه‌نا ئاساییشا هه‌رێما کوردستانێ، تەڤی شه‌رمه‌زارکرنا ڤان ئێریشێن ته‌رۆریستی، هشیاریێ ددن هه‌موو ئه‌و گرووپ و ئالیێن کو ئاساییشا هه‌رێما کوردستانێ دکن ئارمانج. هێزا پێشمه‌رگه و هێزێن ئاساییشا ناڤخوه ژ بۆ کارڤه‌دانه‌کا گونجاو ل هه‌مبه‌ری هه‌ر ئێریشه‌که تێکده‌رانه ئاماده نه.”
ل گۆر هندەک چاڤکانیان ئەو درۆنێن ئێریشی سەر بنگەهێن پێشمەرگەیێ کوردستانێ کرین یێن پارتییا کارکەرێن کوردستانێ (پەکەکێ) بوون.
