پەکەکە خوه ژبۆ شه‌رێ دژی پەدەکێ ئاماده دکه
ئه‌ڤه ده‌مه‌که جاردن مه‌دیا پارتیا كاركەرێن كوردستانێ (پەکەکە) پرۆپاگەنده‌یا شه‌ره‌کی ل ژی پارتیا دەمۆكراتا كوردستانێ (پەدەكە) دکه. به‌رپرسێن پەکەکێ داخویانیا ددن و دبێژن کو، “پەدەکە د ناڤا خیانه‌تێ دا یه و شه‌رێ ل دژێ پەدەکێ ئێدی نابه شه‌رێ براکوژیێ“ (موستافا کاراسو). د مه‌دیا جڤاکی دا گه‌له‌ک ئالیگرێن پەکەکێ ب ئاشکه‌رایی ددن خوویاکرن کو، دڤێ پەکەکە دەست ژ شه‌رێ ل دژی ترکیی به‌ردە و ئه‌ول پەدەکێ ژ هۆلێ راکه.
د ڤێ ده‌مێ دا کو پەکەکە ب رێیا راگەھاندن، كادرۆ بەرپرسێن خوە رێ ژ بۆ شەرێ ل دژی پەدەكێ خوەش دكە، وه‌ک گه‌له‌ک جاران، ڤێ جارێ ژی ته‌ڤگه‌رێن کو خوه کوردستانی ددن ناساندن بێ ده‌نگن. لێ ده‌ما بوویه‌ره‌ک بقەومە و زه‌ره‌ره‌ک مه‌زن چێببه ھینگێ دێ هنده‌ک ئالیێن سیاسی ب داخوویانیان ده‌ست ب شیره‌تان بکن.
ل ڤێ ده‌رێ پرس نه پرسا پەدەکێ یان یا پەکەکێ یه. پرس ئه‌وه کو پەکەکە هه‌ول دده ته‌ڤگه‌را نه‌ته‌وەیی بخەتمینە و رەوش ئالۆز بكە و هه‌تا مه‌جال بکه‌ڤه د دەستێ وێ دا و ئەڤگەرا نەتەوەیی ب جارەكێ ژهۆلێ راکه. پەكەكە ئا‌شکه‌را ڤێ یه‌کێ دکه و زه‌مینه‌کی ل گۆر خوه دخوازه ئاماده بکه. لێ ته‌ڤگه‌را کورد، بێ ده‌نگه. ئه‌ڤ بابه‌ت نه د رۆژه‌ڤا مه‌دیا کوردی و سیاسه‌تمه‌داران دا یه. د مه‌دیا جڤاکی دا ، رۆژانه گه‌له‌ک به‌رنامه تێنه چێکرن، لێ گه‌لۆ ژ بۆ چ که‌سه‌ک خوه نێزیکی ڤێ مژارێ ناکه؟ نایێ زانین!
ئه‌ندامێ کۆنسه‌یا سه‌رۆکاتیا پەکەکێ، موستافا کاراسو، گه‌له‌ک ڤه‌کری ل هەمبه‌ر پەدەکێ شه‌ر راگهاند. وی ئه‌ڤ یه‌ک د به‌رنامه‌یه‌ک ته‌له‌ڤزیۆنی دا دا خوویاکرن. لێ مخابن چ به‌رته‌ک ل هەمبه‌ر داخوویانیێن کاراسو نه‌هات نیشاندان. د بنگه‌هێ خوه دا ئه‌ڤ یه‌ک، ئەڤ بێدەنگیە، پتر جه‌ساره‌تێ دده پەکەکێ کو خرابیا بکه و ئێریشێ ته‌ڤگه‌را ئازادخوازا کورد بکه.
پێوسته هه‌رکه‌س بزانه کو، کی رۆژه‌کێ ل سه‌ر خه‌تا نه‌ته‌وەیی ژ بۆ بده‌ستخستنا مافێن نه‌ته‌وەیی و سه‌رخوه‌بوونا کوردستانێ کار و خه‌باتێ بکه، دێ ببه ئارمانجا ئێریشێن پەکەکێ. ئه‌ڤ یه‌ک ب ده‌هان جارا هاتیه رۆژه‌ڤێ و پەکەکێ ئێریشێ هه‌موو نرخێن نه‌ته‌وەیی کریه و هێشتا ژی دکه. لێ هه‌لوه‌ستا بێده‌نگیێ پتر دکه‌ڤه د خزمه‌تا سیاسه‌تا پەکەکێ دا.
ژ ئالیه‌ک دن، هنده‌ک سیاسه‌تمه‌دار یان ژی ئالیێن سیاسی پەدەکێ ناعه‌جبینن و د گه‌له‌ک واران دا سیاسه‌تا پەدەکێ ره‌خنه دکن. ئه‌ڤ تشته‌ک گه‌له‌ک نۆرماله و مافێ هه‌رکه‌سه‌کی یه ئالیه‌ک سیاسی رەخنە بکه. لێ هنده‌ک ژ ڤان که‌سایه‌تی و ئالیان هه‌لوه‌ستا خوه یا ل هەمبه‌ر پەدەکێ ب زانه‌بوون تێخن د خزمه‌تا پەکەکێ دا و دبن ئالیگره‌ک خراب یێن سیاسه‌تا خه‌ته‌ر یا پەکەکێ.
ئه‌م ژ بیر نه‌کن کو پەکەکە ل باشوورێ کوردستانێ شه‌رێ پەدەکێ دکه و ب چ ئاوایی رێزێ ل ده‌ستهلاتیا باشوورێ کوردستانێ ناگره. ل هەمبه‌ر ڤێ یه‌کێ ژی باشوورێ کوردستانێ هه‌مبێزا خوه ژ ئالیگرێن پەکەکێ را ڤه‌کریه و وان دحه‌وینه. لێ ئه‌و ل سه‌ر رانێ پەدەکێ روودنن و تلیێن خوه تێخن د چاڤێن پەدەکێ دا.
پەکەکە دژمنا‌تیا خه‌تا نه‌ته‌وەیی دکه. هه‌روه‌ها ئەگەرێ کو ئێریشێ پەدەکێ دکه ژی ئه‌ڤ یه‌که. ئیرۆ پەدەکە سه‌رکێشیا خه‌تا نه‌ته‌وەیی دکه و خوه‌دیا پرۆژه‌یا سه‌رخوه‌بوونا کوردستانێ یه.
به‌رژه‌وه‌ندیێن نه‌ته‌وەیی مرۆڤی مه‌جبوور دکه کو پشتگریا سیاسه‌تا د رێیا سه‌رخوه‌بوونا کوردستانێ دا خه‌باتێ دکه بکه. ئه‌ڤ ئه‌رکه‌ک نه‌ته‌وەیی یه. ئه‌ڤ یه‌ک دبه ئەگەر کو مرۆڤ ڤه‌کری ل هەمبه‌ر هه‌موو ئێریشێن ل سەر خه‌تا نه‌ته‌وەیی تێن کرن راوەستە و به‌رژه‌وه‌ندیێن نه‌ته‌وەیی بپارێزه.
نووچه/ئانالیز
2020.08.25
