سیاسی

د چارچۆڤەیا ژێ را هاتی دیزاینكرن شه‌رێ پەدەکێ دكە

سیاسه‌تا کو ل سه‌ر ده‌ره‌و، دسەرێدابرنێ و زانیاریێن شاش  هاتی ئاڤاکرن دێ ڕۆژه‌ک ھێت ‌ کوچ محتاجیا دوژمن و داگیركەران پێ نەمینە و سەروسەر ب عەردی بكەڤە‌. گه‌له‌ک جارا ل سه‌ر ڕه‌وشا باشوورێ کوردستانێ و شه‌رێ ئارتێشا ترکیێ و چه‌کدارێن پارتیا كاركەرێن كوردستانێ (پەکەک) ل باشوور مناقه‌شه‌یێن جدی هاتنه‌ کرن و نرخاندنێن جودا د ڤی واری دا هاتنه‌ ڕۆژه‌ڤێ. هه‌ر جار هاتیه‌ گۆتن کو پەکەکە ب گه‌له‌ک زانه‌بوون به‌رێ ترکیێ دده‌ باشوورێ کوردستانێ و شه‌رێ خوه‌ ب ڤێ ئارمانجێ ده‌رباسی باشوور کریه‌ و دكە.

هه‌رکه‌س دزانه‌ کو قادا شه‌رێ پەکەکێ نه‌ ل باشوور لێ ل باکورێ کوردستانێ یه‌. پەکەکە ل باشوورێ کوردستانێ ل ده‌ڤه‌را چیایێ قه‌ندیل دمینه‌ و سەرۆكاتیا پەکەکێ ل  قه‌ندیل، سلێمانیێ و مه‌خموور سیاسه‌تا تێکبرنا باشوورێ کوردستانێ ڕێڤه‌ دبه‌. پەکەکە ل باکورێ کوردستانێ گونده‌ک ڕزگار نه‌کریه‌ ،لێ ل باشوور هنده‌ک ده‌ڤه‌ران کۆنترۆل دکه‌ و ده‌ستهلاتداریا خوه‌ ڕاگەهاندیه‌.

پەکەکە گه‌له‌ک ب زانه‌بوون و د چارچۆڤەیا ژێ را هاتی دیزاین کرن دا ب هه‌موو ئاوایی شه‌رێ پارتیا دەمۆكراتا كوردستانێ (پەدەکە)  دکه‌. د بنگه‌هێ خوه‌ دا پەکەکە شه‌رێ سه‌رخوه‌بوونا کوردستانێ دکه‌ و دخوازە ب هه‌موو هێزا خوه‌ شه‌رێ ئالیێن کو سه‌رخوه‌بوونا کوردستانێ دپارێزن بکه‌. ژ به‌ر کو ئارمانجا سه‌ره‌که‌ یا پەکەکێ خه‌تماندنا ڕێیا سەرخوەبوونا كوردستانێ یه‌. هه‌ر کورده‌ک، سیاسه‌تمه‌داره‌ک، ئالیێن سیاسی، نڤیسکار و ڕه‌وشه‌نبیر ڤێ یه‌کێ باش دزانن. لێ مخابن پرانیا وان سیاسه‌تا دوروویی بڕێڤه‌ دبن و ل گۆر  به‌رژه‌وه‌ندیێن خوه‌ یێن ڕۆژانه‌ نرخاندنا دکن. گه‌له‌ک ژ وان به‌حسا ھەڤگرتنا پێشمه‌رگه‌ و گه‌ریلا دکن. دڤێ هه‌رکه‌س باش تێبگەهه‌ کو ئەو ئارمانجا پێشمه‌رگه‌ و گه‌ریلا شەر ژ بۆ  دکن نه‌ یه‌ک ئارمانجە . پێشمه‌رگه‌ ژ بۆ بده‌ستخستانا مافێن کوردا یێن نه‌ته‌وەیی شه‌ر دکه‌ و ئارمانجا وان یا داویێ ژی سه‌رخوه‌بوونا کوردستانێ یه‌. پێشمه‌رگه‌ د بن ئالا کوردستانێ دا‌ تەڤدگەرە و هه‌ولددن ده‌ستکه‌فتیێن نه‌ته‌وەیی بپارێزن.

گه‌ریلایێن پەکەکێ نه‌ ژ بۆ مافێن نه‌ته‌وەیی و نه‌ ژی ژ بۆ سه‌رخوه‌بوونا کوردستانێ شه‌ر دکن. ڕێڤه‌به‌رێن پەكەكێ گەلەك جارا ب ئاشكەرەیی گۆتیە كو ئەو ناهێلن ده‌وله‌ته‌ک نه‌ته‌وەیی یا کوردا بێ دامه‌زراندن و ژ بۆ چێكرنا  ئاسته‌نگا د ڕێیا سه‌رخوه‌بوونێ دا‌ شه‌ر دکن. یانی کورت کورمانجی گه‌ریلایێن پەکەکێ ژ بۆ ڕێگریێ ل سیاسه‌تا دامه‌زراندنا ده‌وله‌ته‌ک کوردی بکن شه‌ر دکن. نه‌ د بن ئالا کوردستانێ دا‌ ،لێ د بن ئالا پەکەکێ دا‌ دخه‌بتن.

ل ڤێ ده‌رێ پرسه‌ک ده‌ردکه‌ڤه‌ هۆلێ. گه‌لۆ ئه‌و ئالیێن دۆزا سه‌رخوه‌بوونا کوردستانێ دکن یان ژی وه‌سا خوه‌ ددن ناساندن  ژ بەر چ ل ھەمبەر وان هێزێن کو دژاتیا سه‌رخوه‌بوونێ دکن ده‌نگێ خوه‌ بلند ناکن و دورووییێ‌ دکن؟ پێوسته‌ هه‌ر کورده‌ک  ‌ ب زه‌لالی به‌رسڤا ڤێ پرسێ بده‌.

ل باکورێ کوردستانێ جارا یه‌کەم ڕێخستنه‌ک ب ناڤێ ته‌ڤگه‌را جوانێن کوردستانێ ده‌رکه‌ت هۆلێ و ئالا کوردستانێ بلند کرن و ئه‌و سیاسه‌تا نه‌ کوردستانی یا پەکەکێ، پیچەك ژی بە، شکناندن و گه‌له‌ک ب زانه‌بوون ناڤێ کوردستانێ ب کارانین وب  ئاوایه‌ک یاسایی دان قه‌بوول کرن. لێ مخابن گه‌له‌ک ئالیێن کو سیاسه‌تێ دوروویی دکن، ئا‌شکه‌ره‌ و ڤه‌شارتی شه‌رێ وان جوانان کرن. ل کوردستانێ سیاسه‌تمه‌دار هه‌تا ڕاستیا خوه‌ ئاشكەرا نەكن  و ب جه‌ساره‌ت ژ بۆ ئارمانجێن خوه‌ یێن داویێ خه‌باتێ نه‌کن، بلا بێ ده‌نگبن دێ پترخزمه‌تا سیاسه‌تا به‌ر ب سه‌رخوه‌بوونێ ڤه‌ دچه‌ بکن.

سیاسه‌ت نه‌ دوروویی یە. سیاسه‌ت ل گۆرا هنده‌ک پیڤانا تێ کرن، هه‌لوه‌ست ژی ل گۆرا هنده‌ک پیڤانا تێ نیشاندان. لێ مخابن پرانیا ئالیێن کوردستانی ناخوازن ڤێ یه‌کێ ببینن. یه‌کێتیه‌ک نه‌ته‌وەیی د ناڤبه‌را هێزێن نه‌ته‌وەیی دا‌ تێ ئاڤاکرن. ب سلۆگانا و ل سه‌ر ده‌ره‌وان و ته‌کتیکیێن ده‌مکی یه‌کێتی چێنابه‌. بلا که‌سه‌ک خوه‌ نه‌خاپینه‌ و به‌حسا “یه‌کێتیێن نه‌ته‌وەیی“ یێن سه‌خته‌ نه‌که‌.

د قۆناخا کو ئه‌م تێرا ده‌رباس دبن، یه‌کێتیه‌ک نه‌ته‌وەیی ژ بۆ ئارمانجێن هه‌ڤبه‌ش تێ ئاڤاکرن، د بن ئالا کوردستانێ دا‌، ژ بۆ پاراستنا ده‌ستکه‌فتیێن نه‌ته‌وەیی و هه‌روه‌ها ژ بۆ ئارمانجا دامه‌زراندنا ده‌وله‌ته‌ک کوردی تێ ئاڤاکرن. ئه‌گه‌ر نه‌ ل گۆرا ڤان پره‌نسیپا بە، یه‌کێتیێن بێنه‌ ئاڤاکرن نه‌ نه‌ته‌وەیی نه‌. به‌لکی هنده‌ک هه‌ڤکاریێن ده‌مکی بێنه‌ ئاڤاکرن. لێ نابه‌ مرۆڤ ڕابه‌ و ڕوونە به‌حسا یه‌کێتیه‌ک نه‌ته‌وەیی ب ته‌نێ وه‌ک شیعاره‌کی بکه‌.

بێ گۆمان د ڤێ ده‌ربارێ دا‌ مرۆڤ دکاره‌ ڕه‌خنا ل گه‌له‌ک ئالیێن سیاسی بکه‌. هه‌ر ئالیه‌ک  باوه‌ر بکه‌ کو دێ ڕۆژه‌ک ژ ڕۆژان سیاسه‌تا ڕێڤه‌به‌ریا پەکەکێ بێ گوهه‌رتن و ل گۆرا ڤێ یه‌کێ ته‌ڤ بگه‌ره‌، ئەو خوه‌ دخاپینه‌. بێ گۆمان ده‌ما مرۆڤ به‌حسا سیاسه‌تا پەکەکێ دکه‌ چ جارا به‌حسا بنگه‌هێ وان و ئه‌و جوانێن ژ بۆ ئیدالێن خوه‌ شه‌ر دکن ناکن.

دڤێ مرۆڤ هه‌ولبده‌ ڕاستیا پەکەکێ ده‌ربێخه‌ هۆلێ‌، دا کو به‌رێ بنگه‌ها وان بده‌ خه‌ته‌ک نه‌ته‌وەیی و ئه‌و ژ بۆ ئارمانجێن ڕێیا سه‌رخه‌بوونێ و د بن ئالا کوردستانێ دا کار و خه‌باته‌ک پیرۆز بکن.

2020.07.20

نووچه‌/ئانالیز

Back to top button