دڤێ ئیرۆ ته‌مامێ کوردستانیا د بن ئالا و ڕێبه‌ریا سەرۆکێ کوردستانێ دا، ل دژی ده‌وله‌ت و پارتیێن ته‌رۆرست ده‌ست بدن هه‌ڤ و د ئاڤاکرنا کوردستانا ئازاد دا ببن خوه‌دی پار. چاوا کو سه‌رۆک مسته‌فا بارزانی د ده‌ما خوه دا گۆتبوو:” چ که‌سێ کو ڕوحێ نه‌ته‌وه‌پارێزیێ پێ ڕا چێنه‌بووبه، وێ ڕۆژه‌ک ژ ڕۆژان ئیخانه‌تێ ب گه‌لێ خوه ڕه بکه”.
ئه‌ڤ گۆتن ژ بۆ ئیرۆ و ژ بۆ هه‌ر ده‌مێ ژی ده‌رباس دبه. ئیرۆ پرسگرێکا سه‌ره‌که یا د ناڤ کوردا دا، پرسگرێکا پارتیا كاركەرێن كوردستانێ (پەکەکێ) و کوردێ ده‌رڤایی پەکەکێ یه. هه‌ر چقاسی هه‌بوونا پەکەکێ یا ل قه‌ندیل و ده‌ڤه‌رێن دن ژبۆ حکومه‌تا کوردستانێ ژی سه‌رێشاندنه‌کێ ب خوه ڕا بینه ژی، دڤێ ژ باشوورییان زێده‌تر ئه‌م کوردێن باکور سه‌رێ خوه ب ڤێ پرسگرێکێ ڕه بێشینن. د داخویانی و هه‌لوه‌ستێن هنده‌ک ڕایه‌دارێن پەکەکێ دا دیار دبە کو، شه‌رێ ل دژی ده‌وله‌تا ته‌رۆریست، چه‌ته و پارتیێن ته‌رۆرست دا ئالیکاریا ناڤده‌وله‌تی، پەیوەندیێن هه‌رێما کوردستان یه ب جیرانا ڕا ئه‌و نه‌ره‌حه‌ت کرنه. گه‌ر پەکەکە کاربه سه‌به‌بێ نه‌ره‌حه‌تیا خوه ل سه‌ر ئه‌ساسێ کوردایه‌تیێ ژ ده‌وله‌تا فه‌ده‌رال یا کوردستانێ ڕا بینه شكەڤێ، ئه‌ز باوه‌ر دكەم وێ وه‌ک ده‌وله‌ت، هه‌رێما کوردستان ژی بکاربه چاره‌سه‌ریه‌کێ ژ نه‌ره‌حه‌تیا پەکەکێ ڕا ببینه. ژ خوه به‌یانێن سه‌رۆکێ کوردستانێ یێن د وی واری دا پر زه‌لالن. سه‌رۆکێ کوردستانێ د هه‌ر دەرفەتێ دا چاره‌سه‌ریێ د ڕیا دیالۆگ و ڕیێن بێچه‌کیبوونێ و ده‌مۆکراتیک دا دەردەخە مەیدانێ.
دڤێ ئه‌م باکوری ژ نها دا زانبن کو، هه‌گه‌ر سبێ یان دوسبا باکورێ کوردستانێ ئازاد بوو، وێ ئه‌ڤ پرسگرێکا پەکەکێ کو ئیرۆ ل ڕۆژاڤا و باشوورێ کوردستانێ ب شه‌کله‌کی کیرێت خوه ل سه‌ر مله‌تێ کورد فه‌رز کرنە، وێ ل باکور ژی ده‌ستپێبکه. پرسگرێکا هه‌یی پرسگرێکا ته‌مامێ کوردستانێ ژی به، دڤێ ئه‌م باکوری ژ ئیرۆ دا ب به‌رپرسیاری ته‌ڤ بگه‌رن و خوه‌دی سیاسه‌ته‌ک نه‌ته‌وەیی بن. ئان نە سبێ ئه‌م ژی دێ ببن ماروزتێ شده‌تا پەکەکێ. و وێ گاڤێ ئه‌م ژی تێکه‌ڤن ڕه‌وشا کو نها ل باشوور د ناڤبه‌را داگیرکه‌رێن کوردستانێ و هه‌موه‌لاتیێ وه‌ده هه‌یی ده‌ردکه‌ڤه ئۆرتێ. پرسگرێکا چاره‌سه‌ریا پەکەکێ و خوه‌دیلێده‌رکه‌تنا وێ، نه ئه‌رکا باشووره. هه‌گه‌ر ل باشوور پرسگرێکا نەھێلانا پەکەکێ هه‌به، ئه‌رکا پێشین دکه‌ڤه سه‌ر ملێن باکورییان بخوه و دڤێ ئه‌و ل خوه و ل ده‌سکه‌فتیێن خوه خوه‌دی ده‌رکه‌ڤن.
دڤێ د سه‌ری دا پەکەکە، ده‌ڤ ژ سیاسه‌تا توندیێ به‌رده و ب ڕێیێن ده‌مۆکراتیک ل چاره‌سه‌رییا دیالۆگا د ناڤ کوردان دا بگه‌ره. لێ گاڤا پەکەکە وان ده‌ستکه‌فتنێن کوردا بکه قوربانا شه‌خس ئان هه‌رێمه‌کێ (کارتۆن ئان کانتۆنان) دڤێ ئه‌م کوردێن باکور ب ده‌نگه‌ک بلند نه ڕازیبوونا خوه ل هەمبه‌ر هه‌لوستێن پەکەکێ یێ نه د به‌رژه‌وه‌ندیا مڵه‌تێ کورد دا، بقیرن. ئه‌و ڕۆژ ژی ئیرۆ یه…. ئیرۆ پەکەکێ ژ نووڤه ده‌ست ب شه‌رێ ده‌ستکه‌فتنێن کوردستانا ئازاد کریه. پەکەکە بوویه که‌له‌ما چاڤێ کوردان. پەکەکێ ده‌ست و پست دایه داگیرکه‌رێن کوردستانێ و شه‌رێ پارتیا دەمۆكراتا كوردستانێ (پەدەکێ) و ڕومه‌تا مله‌تێ کورد مالباتا بارزانیان دکه. پەکەکە شه‌رێ هێژاییێن کوردان دکه. پەکەکە نه ته‌نێ مخالفێ خوه، هه‌روها زاروکێن وان یێن سێ سالی ژی دکووژه. پەکەکە ب ناڤێ هه‌ره‌مێن خوه‌سه‌ر پارچه کرنا کوردستانێ ژ خوه ڕا کریه شیعار. ب کوورت کورمانجی؛ پەکەکێ سوندا تار و مار کرنا کوردستانێ خواریه. ژ بۆنا ڤێ ژی دڤه ته‌مامێ کوردان ب ده‌نگه‌کی بلند بقیرن و بێژن ئێدی به‌سه ژ زلم و ده‌ک و دۆلابێن پارتیا كاركەرێن كوردستانێ ڕا.
ژ
نووری چه‌لیک
