پەیاما ئۆجەلان و بوویەرێن باشوورێ كوردستانێ
ده‌ما حوکومه‌تا هه‌رێما کوردستانێ هێزه‌ک پێشمه‌رگه‌یێن گرێدایی وه‌زه‌ره‌تا پێشمه‌رگه ڕێکر ده‌ڤه‌را زینا وه‌رتێ پارتیا كاركەرێن كوردستانێ (پەکەکە) خوە نەرازی كئر و ل دژی چوونا پێشمەرگەیان بۆ وێ دەڤەرێ دەركەت. مه‌دیا پەکەکێ ڕۆژانه د نووچە و و وەشانێن خوە دا پارتیا دەمۆكراتا كوردستانێ (پەدەکە) ب خیانه‌تێ تاوانبار دكر و دا خوویاکرن کو پەدەکە هه‌ڤالبه‌ندیا دەولەتا ترکیێ دکه و شه‌رێ پەکەکێ دکه. هه‌روه‌ها گه‌له‌ک ب ئه‌رزانی هه‌ولدا کو یەكێتیا نشتمانیا كوردستانێ (یەنەکە) بكە ھەڤالبەندا خوه و زه‌مینێ شه‌ره‌کێ چه‌کداری ل دژی پەدەکێ خوەش بكە. مخابن هه‌ڤسه‌رۆکێ یەنەکێ ژی ب هه‌لوه‌ستێن خوه بوو پشتەڤانێ سیاسەتا پەكەكێ.
ل هەمبه‌ر ئێریشێن مه‌دیا پەکەکێ بۆ سه‌ر پەدەکێ، مه‌دیا باشوورێ کوردستانێ یا کو ب سه‌ر پەدەکێ ڤه دھێتە حساب كرن، د ڤێ ده‌ربارێ ده چ کر؟ ڕۆلێ خوه یێ پێوست چقاس له‌یزت و هه‌تا چ ڕاده‌یێ کاری ڕاستیا بوویه‌را زینا وه‌رتێ بەرچاڤ بكە ده‌ره‌و و له‌یزتکێن پەکەکێ ئا‌شکه‌ره بکه؟ ئه‌ڤ هه‌موو پرسن و مخابن بێ به‌رسڤن. چ جارا به‌رسڤا ڤان پرسان ژی ژ ئالیێ مه‌دیا سەر ب پەدەكێ ڤە ناھێن دان.
مه‌دیا ناڤبووری ب ته‌نێ داخوویانیێن به‌رپرسێن هه‌رێما کوردستانێ ددان. ڕۆژا 2020.04.20 سه‌رۆکێ ھەرێما کوردستانێ نێچیرڤان بارزانی جڤینه‌ک به‌رفره‌ھ د گه‌ل ده‌سته‌یا سه‌رۆکاتیا هه‌رێما کوردستانێ کر و پشترا ده‌رکه‌ت هەمبه‌ر مه‌دیایێ ئاگاهداریێن به‌رفره‌ھ دان و به‌رسڤا پرسێن ڕۆژنه‌مه‌ڤانان یێن د ده‌ربارێ پرسگرێکا زینا وه‌رتێ دا دا. سه‌رۆکێ کوردستانێ هه‌لوه‌ستا فه‌رمی یا ده‌ستهلاتداریا کوردستانێ د ده‌ربارێ ڤێ بابه‌تێ ده ئا‌شکه‌ره کر و ڕاستیا زینا وه‌رتێ ژبۆ ڕایا گشتی زه‌لال کر.
دڤیابا مه‌دیا ناڤبو وری ب ده‌هان به‌رنامه ل سه‌ر ڤێ بابه‌تی چێكربانا و ڕاستیا ڤێ پرسێ كو پەکەکێ ب زانه‌بوون ده‌رخستیە هۆله ژ ڕایا گشتی یا کوردستانێ را ئا‌شکه‌ره بکرایە، لێ مخابن وۆسا نەكر.
د مه‌دیا جڤاکی دا به‌شه‌ک کوردستانیێن کو ل سه‌ر خه‌تا نه‌ته‌وی سیاسه‌تێ دکن و به‌رژه‌وه‌ندیێن کوردستانێ د سەر هه‌ر تشته‌کی را دگرن هه‌ولددان به‌رسڤا ده‌ره‌وێن پەکەکێ بدن. به‌ره‌ڤاژی هنده‌ک کارمه‌ندێن مه‌دیا ناڤبووری ل دژی هه‌لوه‌ستا کوردێن نشتمانپه‌روه‌ر یێن کو هه‌ولددان ده‌ره‌وێن پەەککێ ئا‌شکه‌ره بکن، تویتته‌ر ئاڤێتن و بوون پارێزه‌رێن سیاسه‌تا پەکەکێ ل زینا وه‌رتێ.
به‌رپرسێن پەکەکێ یێن وه‌ک؛ دوران کالکان ڤه‌کری دڤێ ده‌ربارێ دا ده‌ستهەلاتداریا کوردستانێ و ب تایبه‌تی پەدەکە ته‌هدید کر. کالکان دا خوویاکرن کو، ئه‌و قه‌بوول ناکن پێشمه‌رگه ل ده‌ڤه‌رێ بێنه بجھ كرن. لێ مخابن مه‌دیا ناڤبووری نه‌کاری ئا‌شکه‌ره بکه کو، گه‌لۆ چ کارێ پەکەکێ ل باشوورێ کوردستانێ هه‌یه؟ پەکەکە ل باشوورێ کوردستانی نه هێزه‌ک ڕه‌وایه و ژ بۆ سه‌روه‌ریا کوردستانێ بکه خه‌ته‌رێ دا هه‌ر تشته‌کی دکه.
لێ ده‌ما به‌رپرسه‌ک یێ پەکەکێ، یان ژی یێ هەدەپێ داخوویانیه‌کێ ل سەر پرسەكێ ددە، مه‌دیا ناڤبووری ڤێ یه‌کێ د جهدا دکه مانشه‌ت و ب ڕۆژا ل سه‌ر دئاخڤە.
عەبدۆلا ئۆجەلان، سەرۆكێ زیندانكریێ پەكەكێ، ب ڕێیا ته‌له‌فۆنێ د گه‌ل مالباتا خوه ئاخڤی، برایێ ئۆجەلان به‌حسا په‌یاما ئۆجەلان کر. مه‌حەمه‌د ئۆجەلان دبێژه: ئۆجەلان به‌حسا په‌یماننامه‌یا 10 خالی یا کو د سالا 1982ێ دا ب ئیدریس بارزانی ڕا ئیمزا کربوو کریه و ئاماژه ب وێ کریه ل گۆر وێ په‌یماننامه‌یێ پێویسته ئێدی د ناڤبه‌را کوردان دا شەر چێنەبە و خوون نەرژە.
ئه‌ڤ تشتێن کو مەحەمەد ئۆجەلان ژ مه‌دیا پەکەکێ ڕا گۆتی، هه‌تا چ ڕاده‌یێ ڕاسته ئه‌ڤ ژی نایێ زانین. مەحەمەد ئۆجەلان نه د وێ ئاستێ دا یه كو بکاربه ئه‌ڤ قاس ڕێکووپێک تشتێن ئۆجالان گۆتی ژ مه‌دیا پەکەکێ ڕا بێژه.
پەکەکێ پشتی په‌یامان سالا 1982ێ د گه‌ل پەدەکێ ئیمزا کری ده‌مه‌کێ درێژ ل دژی پەدەکێ ڕاوه‌ستایه و شه‌رێ پەدەکێ کریه . ده‌ما عەبدۆلا ئۆجەلان ل پایته‌ختێ سوریێ ل شامێ دما ل سه‌ر خاکا باشوورێ کوردستانێ گه‌له‌ک شه‌رێن گران ناڤبه‌را پەکەکێ و پەدەکێ دا ڕوودانه. ب سالا پەکەکێ ئێریشێ پەدەکێ کر و گه‌له‌ک پێشمه‌رگه شه‌هید کرن و باشوورێ کوردستانێ کرن وه‌ک دۆزەخێ ژ بۆ هه‌موه‌لاتیێن کوردستانێ.
سه‌رۆکێ کوردستانێ نێچیرڤان بارزانی د ده‌ربارێ ھەبوونا پەکەکێ ل باشوورێ کوردستانێ دا گۆت: پەكەكە نە ھێزەكا ھەرێما كوردستانێ یە كو مافێ و ھەبە داخویانیا بدە كا ئەو ھێز ل زینا وەرتێ بمینە یان ڤەكشە، پەكەكە نە ئەو شەرعیەت ھەیە و نە ژی ھەرێما كوردستانێ وێ شەرعیەتێ ب وێ ددە. دڤێ هه‌رێما کوردستانێ چۆل بکه و هه‌رێما کوردستانێ جهێ کارکرنا پەكەكێ نینه. یا كو نھا پەكەك دكە قه‌ت یارمه‌تیدانا هه‌رێما کوردستانێ نینه. به‌ره‌ڤاژی تەڤگەرێن وێ دروستکرنا کێشه‌یایە ژ بۆ هه‌رێما کوردستانێ د ڤی ده‌م و وه‌ختی دا..
ب ڕاستی پشتی ڤێ هه‌لوه‌ستا سه‌رۆکێ کوردستانێ، په‌یاما ئۆجەلان یا كو د مه‌دیا پەکەکێ دیزاین کری گه‌له‌ک یا بالکێشه. هه‌روه‌ها مه‌دیا باشوور یا ناڤبووری ئه‌ڤ په‌یمان ژ بۆ خوه وه‌ک ده‌رفه‌ته‌ک دیت و گرنگیه‌ک مه‌زن دایێ. یانی ب ئاوایه‌ک دن سیاسەتا مه‌دیا پەکەکێ به‌رده‌وام کرن.
مه‌دیا ناڤبووری ب ناڤێ بێئالیێ ئالیگریا سیاسه‌تا پەکەکێ دکه. ڤێجا ڤێ یه‌کێ ب زانه‌بوون دکه یان ژی ب ئاوایه‌ک دن دکه، زه‌حمه‌ته کو مرۆڤ بزانه. لێ تشته‌ک هه‌یه کو ئه‌ڤ هه‌لوه‌ست و هژکرنا پەکەکێ دێ سه‌رێ گه‌له‌ک ئالیان بێشینە و ب تایبەتێ ژی دێ سەرێ پەدەکێ گەلەك بێشینه. تایبه‌تی مه‌دیا ناڤبووری د به‌شێ خوه یێن کوردیا لاتینی و کورمانجیێ دا خزمه‌تا ئالیێن دژی سه‌روه‌ریا کوردستانێ دکن. گه‌له‌ک نه خوه‌شە مرۆڤ ڤێ یه‌کێ بێژه ،لێ مخابن ئەڤە ڕاستیه‌که.
2020.04.30
نووچه/ئانالیز
