پشتی ده‌مه‌ک درێژ پارێزه‌رێن عەبدوڵا ئۆجەلان ل ئیمرالیێ سه‌ردانا ئۆجالان کرن. پارێزه‌رێن سەردانا ئۆجەلان كری، ل ستانبولێ د پرەسكونفەرەنسەكێ دا په‌یاما ئۆجەلان ژ مەدیا و رایا گشتی را ئاشكرا كر. تشتا بالکێش ئه‌و بوو کو، پرانی مه‌دیا کوردی ل پرەسكونفەرەنسێ ئاماده ببوو، مه‌دیا ترکی گەلەك پێ ئەلەقەدار نەبوو. ژ ئالیه‌ک دن ڤه چ به‌رپرسیارێن هەدەپێ ژی تێ دا بەشدار نەبوون و ئەڤ ژی جھێ پرسیارێ یە.
د په‌یاما ئۆجەلان دا چه‌ند خال هه‌بوون کو ناڤەرۆكا وان دژی وێ سیاسه‌تا قه‌ندیل بڕێڤه دبه نە
ئۆجەلان دبێژه:
– دڤێ پرسگرێکێن هه‌رێمێ و یێن ترکیێ ژی نه ب ڕێیا شه‌ر و توندیێ ، ب هێزا نه‌رم، ئانگۆ ئاقل، سیاسه‌ت و کولتووری بێن چارەسەر كرن.
– پرسگرێکا سوریێ د چارچۆڤه‌یا ده‌مۆکراتیک دا و ب پاراستنا یه‌کێتیا ئاخا سوریه دا بێ چاره‌سه‌رکرن.
– ژ ھێزێن سوریا دەمۆكرات (هەسەدە) داخواز دکه کو دڤێ حه‌ساسیه‌تێن ترکیێ به‌ر ب چاڤ بگره.
– ئۆجەلان به‌حسا په‌یاما خوه یا نه‌ورۆزا 2003 ێ دکه و دبێژه کو “ئه‌و دیتن ژ بۆ مه بنگه‌هن”.
ئۆجەلان د ڤێ ده‌ربارێ ده گۆتیه: “ژ بۆ مه ئاشته‌یه‌کا ب ڕوومه‌ت و چاره‌سه‌ریا سیاسه‌تا ده‌مۆکراتیک ئه‌ساسه. ئه‌م هه‌ر که‌سێ کو ژ به‌ر هه‌لوه‌ستا مه یا ل ئیمرالیێ مه‌راق دکن و هه‌لوه‌ستێ نیشان ددن، ب ڕێزداری ب بیر تینن و د ئاستا هه‌ری بلند دا سوپاسیا وان دكن.
ئه‌ڤ جارا یه‌که‌مه ئۆجەلان گۆتنا “هه‌لوه‌ستا مه یا ل ئیمرالیێ“ بکار تینه. وەسا دیارە كو ئێدی ئۆجەلان ل ئیمرالیێ د گه‌ل 3 گرتیێن دن یێن پەکەکێ خوه وه‌ک ده‌زگه‌هه‌کی ب ناڤ دکه. تشتا کو په‌یامێن ئۆجەلان ده دخوه‌یێ ل هەمبه‌ر سیاسه‌تا قه‌ندیلێ دسه‌کنه و خوه وه‌ک جهێ ناوه‌ندا بریارا پەکەکێ دده ناساندن.
دێ هه‌لوه‌ستا قه‌ندیلێ ل هەمبه‌ر گۆتنێن ئۆجەلان چبه نایێ زانین لێ گۆتنێن ئۆجەلان دگەل سیاسه‌تا قه‌ندیل برێڤە دبە ھەڤدژن.
ژ ئالیه‌ک دن ڤه هه‌تا ڤێ گاڤێ هەدەپێ ژی تو داخویانی د ده‌ربارێ پەیاما ئوجەلان نەدانە.
ل ترکیێ هنده‌ک ڕه‌وشه‌نبیر و ڕۆژنامه‌ڤانان هه‌ڤدیتنا ئۆجەلان و ئیپتالکرنا هلبژارتنێن ستانبولێ ب هه‌ڤره گرێددن. هه‌تا دبێژن کو، ئاک پارتیێ جاردن ل گه‌ل ئۆجەلان ل هه‌ڤ کریه کو هلبژارتنێن ستانبولێ ده هەدەپە دەست ژ پشتگریا جەهەپێ به‌ردە و یان ده‌نگێ خوه بده به‌ربژێرێ ئاک پاراتیێ، یان ژی بێ ده‌نگ بمینن و هلبژارتنا بۆیکۆت بکن.
دێ ڕۆژێن ل پێشییا مه دا هه‌لوه‌ستا ئۆجەلان گه‌له‌ک بێ گۆتوبێژ کرن، دیار دبە پەکەکە به‌رب دوریانه‌کێ ڤه دچه.
بێ گومان شه‌رێ چه‌کداری ل باکورێ کوردستانێ بێ سه‌کناندن ژ بۆ کوردان تشته‌کێ گه‌له‌ک باشه. لێ ئه‌ڤ سه‌ناریۆ ژ به‌ری نها ژی هاته ڕۆژه‌ڤێ، و پەکەکێ جاردن پێڤاژۆ خەتماند.
شه‌ر نه‌به، به‌رده‌وامیا پەکەکێ نامینه، ژ به‌ر کو سیاسه‌تا وێ ل سه‌ر خوینێ هاتیه ئاڤاکرن.
ئاک پارتی و هەدەپە نێزیک هه‌ڤ ببن و پەکەکە سیاسه‌تا خوه یا شه‌ر ژ هۆلێ ڕاکه دێ پێڤاژۆیه‌ک نوو ده‌ستەپێ بکه. لێ نها ڕه‌وش ژ ڤێ یه‌کێ دووره و پەکەکە د ڤێ دو ڕێیانێ دا به‌رب قۆناخه‌ک دن ڤه دچه. مخابن، وه‌ک هه‌ر جار د په‌یاما ئوجەلان دا به‌حسا کوردستانێ و کورده‌یاتیێ نەبوو
