ب سترانێن خوە شەرێ دز و گەندەلیێ دكر

ئەی بلبلێ دلشادی ھەلا وەر بكە فیخان
دەردێ مە گرانە ئەی برا برینا مە كوورە
گۆری تە بتن جەرگ و دل و مێلاك و ھەم جان
دەنگێ تە یە خوشتر ژ نەی و نای و بلوورە

ب خەم و كوڤانەك گەلەك مەزن، هونەرمه‌ندێ کورد یێ ب ناڤووده‌نگ، سه‌عید گاباری، ل باژارێ هه‌ولێرێ، پایته‌ختێ کوردستان ژ ئه‌نجاما نه‌خوه‌شیه‌ک گران، نەخوەشیا پەنجەشێرێ، ل نه‌خوه‌شخانه‌یا سه‌رده‌م رۆژا 2020.05.04 کۆچا داوی کر.

سەعید گاباری نە ب تەنێ سترانبێزەك و دەنگخوەشەكێ كوردستانێ بوو، ئەو خەباتكەر، شۆرەشگەر و پێشمەرگەیێ شوڕەشا گۆلانێ بوو، ئەو خزینەكا سترانا فلکلۆرێ کوردی بوو، دەنگێ ھەژاران بوو، دەنگێ ڕاستیێ بوو.
سەعید گاباری ب سترنێن خوە شەرێ گەندەلیێ دكر و بەرپرسێن دز و گەندەل روورەش و شەرمەزار دكرن. خوەدی ھەلوەست بوو. د گۆتن و ھەلوەستێن خوە دا ب ئیستقرار بوو، ژ دل و جان ب ھەر ئاوایی خەتا نەتەوەیی، خەتا سەرخوەبوون و دەولەتبوونێ دپاراست.
سەعید گاباری نە بە تەنێ سترانبێزەك و دەنگخوەشەكێ كوردستانێ بوو، ئەو كەسایەتی و رەوشەنبیرەكێ زانا و ژیر بوو، ژ بلی زاراڤایێن كوردی، وی ب زمانێ ئەلمانی، ئینگلیزی، عەرەبی، فارسی، تركی ژی دزانی.

سەعید گاباری (سەعید ئیسماعیل ئیبراھیم) رۆژا 1956.03.24 ل گوندێ خربە كەژێ ل رۆژاڤایێ كوردستانێ ژ دایكبوویە. د ژیێ 8-9 سالی دا دەست ب گۆتنا سترانا كریە. نێزیكی 4732 سترانێن فۆلكلۆری و گەلێری ژبەركربوون.
ئه‌م وه‌ک مالپەرا سبەھی، ب کۆچا داویێ یا ڤی هونه‌رمه‌ندێ قه‌در بلند و خوه‌دیێ دله‌ک مەزن گه‌له‌ک خه‌مگین بوون. ب ناڤێ خوە و ھەموو خاندەڤانێن مالپەرێ ژ مالباتا سەعید گاباری را سەرساخیێ دخوازین و گۆرا وی ب گول و گولاڤ بە.

مالپەرا
www.sibehi.com
2020.05.04‌