سیاسی

پەیاما سەرۆك بارزانی

په‌یاما سه‌رۆک بارزانی یا ل سالڤه‌گه‌را شۆره‌شا مه‌زنا ئیلونێ

ب ناڤێ خوه‌دایێ مه‌زن و دلۆڤان

شۆره‌شا مه‌زنا ئیلۆنێ ب ڕێبه‌رایه‌تیا جه‌نابێ بارزانیێ نه‌مر شۆره‌شه‌کا سیاسی، جڤاکی، چه‌کداری و سه‌رانسه‌ریا گه‌لێ کوردستانێ بوو کو بنگه‌هه‌ک ب هێز ژ بۆ خه‌باتا ڕزگاریخوازیا گه‌لێ کوردستانێ ل دژی سته‌م و داگیرکه‌ریێ دانا.

د شۆره‌شا ئیلونێ دا پێشمه‌رگه‌، کادیر، مامۆستا، خوه‌نده‌کار، ژن و هه‌موو چینێن جڤاکا کوردستانی ژ نه‌ته‌وه‌ و ئۆلێن جوودا جوودا، ل هه‌موو ناڤچه‌یێن کوردستانێ ب پێکڤه‌ و ژ بۆ یه‌ک ئارمانجا پیرۆزا نه‌ته‌وه‌یی و نشتمانی خه‌بات کرن و دیرۆک و سه‌روه‌ری تۆمار کرن.

ئه‌و ده‌ستکه‌فت و ئازادیا نها هه‌یه‌ به‌رهه‌م و به‌رده‌وامیا قووربانیدان و تێکۆشینا زارۆک و گه‌ده‌یێن گه‌لێ مه‌یه‌ د شۆره‌شا ئیلونێ دا. هه‌ر د ڤێ شۆره‌شێ دا بوو کو ئیراده‌ و خوه‌راگری و ئه‌ڤینا نشتمان ل ناڤ ڕێزێن گه‌لێ مه‌ ئه‌وقاس بهێز بوو کو هه‌رده‌م دژمنێ پرچه‌ک ل به‌رانبه‌ر دا دشکیا و جارا داوی وێ ئیراده‌یا دژمن ئانی سه‌ر ماسایا دانوستاندنێ.

شۆره‌شا مه‌زنا ئیلونێ هه‌م ب دژی سیته‌مکاریێ بوو، هه‌م ژی پێگەهاندنا مرۆڤێن کوردستانێ، ژ بۆ وێ یه‌کێ کو گه‌لێ کوردستانێ مافێن خوه‌ بناسە و بهایا بلندا مرۆڤانه‌ و کوردپه‌روه‌رانه‌ ل ناڤ خه‌لک و کادیر و پێشمه‌رگه‌ دا دروست ببە. ب جووره‌یه‌ک کو ل به‌رانبه‌ر دژمن دا ژی ب ته‌نێ ژ بۆ جاره‌ک ژی، شۆره‌ش ده‌ست ژ بۆ کرداره‌که‌ نه‌بر کو ناکۆک بە د گه‌ل بها و یاسایێن جه‌نگ.

وانه‌ و بهایێن وێ شۆره‌شا مه‌زن دڤێ ژ بۆ مه‌ هه‌موویان ب بلندی بمینن و ببن چرا و ڕێنیشانده‌را پاشارۆژا مه‌ و نفشێن پاشارۆژێ.

ل سالڤه‌گه‌را پێنجی وهه‌شت سالیا هلپێکرنا شۆره‌شا ئیلونێ دا، پێزانینێن من ژ بۆ وان هه‌موو پێشمه‌رگه‌یێن قه‌هره‌مان و وان تێکۆشه‌ران هه‌یه‌ کو د شۆره‌شا ئیلونێ دا ڕۆلا خوه‌ هه‌بوویه‌ و که‌د و خه‌بات کرنه‌ قوربانی دانه‌، چ ئه‌وێن ل ناڤ مه‌ دا نه‌مانه‌ و چ ژی ئه‌وێن کو هێ ژی ل ژیانێ دا مانه‌.

هه‌زاران سلاڤ ل گیانێ پاکێ شه‌هیدێن شۆره‌شا ئیلونێ و هه‌موو شه‌هیدێن ڕێیا ئازادیێ.

مه‌سعوود بارزانی
10 ێ ئیلونا 2019

Back to top button