پەیاما سەرۆک نێچیرڤان بارزانی ب بیرەوەریا کیمبارانا هەلەبجە
سەرۆک نێچیرڤان بارزانی د پەیاما خوە یا ب هەلکەفتا ١٦ێ ئادارێ، رۆژا کیمیابارا هەلەبجە د، داخوازێ ژ دەولەتا ئیراقێ دکە کو وەک ئەرک و پێگریێن خوە یێن یاسایی، مالبات و کەسوکارێن شەهیدان و ئەو قوربانیێن هێشتا د ژیانێ دا مانە قەرەبوو بکە و هەموو پێنگاڤێن بپارێزگاربوونا هەلەبجە تمام بکە.
سەرۆک نێچیرڤان بارزانی، هەروەسا، داخوازێ ژ جڤاکا ناڤدەولەتی و جیهانا پێشکەفتی دکە کو، د ناڤ خەباتێن بەردەوام دا بن ژ بۆ هندێ رێ نەهێتە دان کو کارەساتا هەلەبجە ل چو جهێن دن ل جیهانێ دوبارە ببە و چەکێ کۆمکوژ و بەرهەمئانینا وی ب یەکجاری و ب تمامی بهێتە قەدەخە کرن
پەیاما سەرۆک نێچیرڤان بارزانی ب بیرەوەریا کیمایبارانا هەلەبجە یا شەهید
ئیرۆ، ١٦ێ ئادارێ، ئەم گەلەک ب روومەت بیرئانینا زێدەتر ژ ٥ هەزار شەهیدێن هەلەبجە دکین و بەژنا خوە ل هەمبەر جانێ پاقژێ وان دچەمینین. ئەو بەری ٣٤ سالان، د یەک ژ ترسناکترین تاوانێن دیرۆکێ دا، بوونە قوربانێ دەستێ رژێما هینگێ یا ئیراقێ کو ب چەکێ کیمیایی یێ قەدەغەکری، ب هۆڤانە کۆمکوژی کرن، ب هەزاران ژی بریندار و دەربدەر بوون کو هەر یەک ژ وان چیرۆک و سەرهاتیەکا خەمگین هەیە.
کارەساتا کیمبارانا هەلەبجە، بۆ هەتا هەتایێ سەمبۆلا ملەتەکێ ستەملێکری و قوربانیە کو، ب تەنێ تاوانا وان ئەو بوو ل سەر ئاخا رەسەنا خوە و ل ژیر ئاسمانێ خوە دا، داخوازا ژیان، ئازادی و دادوەریی دکە. ملەتەک کو رۆلەکا مەزن د دیرۆک و شارستانیا دەڤەرێ دا گێرایە و هەرتم دەستێ دۆستینیێ، مرۆڤپەروەریێ، ئاشتیێ، پێکەڤەژیان و لێبورینێ ژ هەموویان را درێژ کریە.
کیمیابارانا هەلەبجە، هەولەکا دن یا بەرئاڤێتی و بێئەنجام یا تاوانبارێن دیرۆکێ بوو کو دخوەستن ئیرادەیا پۆلایین یا گەلێ کوردستانێ یا ژ بۆ ئازادی و سەرفەرازیێ پێ تێبشکینن، لێ بەڵی وەک هەرتم ب خوەراگری مایە و ئیرادەیا بۆ ژیانێ و رابوونەڤە و بەردەوامیا گەلێ کوردستانێ، خەیالێن وان شکاندن و ژ بۆ ژیان و ئازادی و سەرفەرازیێ کەتە ڤە سە رێ.
دڤێ د هەموو واران دا زێدەتر خزمەتا هەلەبجە بێ کرن و د ڤێ بیرئانینێ دا، ئەم داخواز دکین کو دەولەتا ئیراقێ وەک ئەرک و پێگریێن خوە یێن یاسایی، مالبات و کەسوکارێن شەهیدان، ئەو قوربانیێن هێشتا د ژیانێ دا مانە و ژینگەیا هەلەبجەیێ قەرەبوو بکە و ئێدی نەهێتە پستگوه خستن، هەموو پێنگاڤێن بپارێزگاربوونا هەلەبجە تمام بکە، هەتا ب وی ئاوایی، کێم ژی بە، ژ خەمێن وان کێم بکین.
هەروەسا، ئەم داخوازێ ژ جڤاکا ناڤدەولەتی و جیهانا پێشکەفتی دکین کو، د ناڤ خەباتێن بەردەوام دا بن ژ بۆ هندێ رێ نەهێتە دان کو کارەساتا هەلەبجە ل چو جهێن دن ل سەر ئەردی دوبارە ببە و چەکێ کۆمکوژ و بەرهەمئانینا وی ب یەکجاری و ب تمامی بهێتە قەدەخە کرن و ب هەموو ئاوایان رێ ل بکارئانینا وی چەکی بهێتە گرتن.
ئەم جارەکا دن دوپات دکن: باشترین یاد و وەفاداری و رێز ژ بۆ جانێ شەهیدێن هەلەبجە و تماما کوردستانێ، ئەڤە کو هەموو هێز و ئالی و پێكهاتەیێن کوردستانێ یەکرێز و هەڤگرتی بن و ب هەڤ را کار بکن داکو هەموو مافێن دەستووری یێن هەرێما کوردستانێ بدەست بخن و فەدەرالی و قەوارەیا دەستووری هەرێما کوردستانێ بپارێزن، هەموو ئالی ژی دەرسان ژ سەربۆرێن دیرۆکێ ببینن و ژ بۆ نها و پاشەرۆژەکا باشتر بکەینە رێنیشاندەر.
سلاڤ و رەحمەت بۆ جانێ شەهیدان
نێچیرڤان بارزانی
سەرۆکێ هەرێما کوردستانێ
٢٠٢٢/٣/١٦
