ب هەلكەفتا بیرئانینا 123 سالیا روژنامەگەریا كوردی، ب ناڤێ رێداكسیۆنا مالپەرا (سبەھی) گەرمترین و جوانترین پیروزباهیان ل تەڤایا مەدیاكار و روژنامەڤانێن كوردستانێ دكەین و ھێڤیدارین د ئەركێ خوە یێ پیرۆز دا بەردەوام و سەركەتی بن.
رۆژنامەیا (كوردستان) یەكەم رۆژنامەیا كوردی بوو ل 1898.04.22 ل باژارێ قاهیرە، پایتەختا مسرێ، ژلایێ میرێ رۆژنامەگەریا كوردی ڤە، مقداد مەدحەت بەدرخان ڤە ھات وەشاندن كو ب دەستپێكا بزاڤا خەباتا رۆژنامەگەریا كوردی دهێتە هژمارتن.
ب ڤێ ھەلكەفتا پیرۆز، ھەلكەفتا رۆژا رۆژنامەگەریا كوردی، ئەم ھێڤیدارین كو رۆژنامەگەریا كوردستانێ ل گۆر پرنسیپ و یاسایێن رۆژنامەڤانیا هەڤچەرخ كارێ خوە ئەنجام بدە و رۆژ ب رۆژ د ھەموو واران دا گەش و پێشبكەڤە و وەك دەستهەلاتا چوارێ بكارە رۆلا خوە ببینە و بەرژەوەندیێن گشتی و دۆزا رەوایا نەتەوەیێ كورد بپارێزە. ب تایبەتی قۆناغا نھا كوردستان تێ دا دەرباس دبە ژ ھەمۆ مەدیاكار و رۆژنامەڤانان تێ خوەستن كو ب ئاوایەكێ پرۆڤەسیۆنال كارێ خوە بكن و ھەموو ھێز و ئەنەرژیا خوە ژ بۆنا بدەستخستنا مافێن نەتەوەیێ بكن یەك.
ھەزار سلاڤ ل گۆرا وان رۆژنامەڤانانێن شەھید یێن كو د رۆژگارێن سەخت و دژوارێن شورەش، بەرخوەدان و بندەستیێ دا پەیاما پیروزا مللەتێ خوە گەهاندی رایا گشتی و سەرێ خوە ژ بۆ دژمنان نەچەماندی.
سالڤەگەرا رۆژنامەگەریا كوردی ل ھەموو خاندەڤان، رۆژنامەڤان، رەوشەنبیر و نڤیسكارێن ھەڤكاریێ دگەل مالپەرا مە دكن پیرۆز بە و هیڤیا پێشداچوون و سەركەفتنێ بۆ دخازین.
ب ڤێ ھەلكەفتێ ئەم وەك مالپەرا (سبەھی) جارەكا دن سۆزێ ددن كو د خزمەتا پێشڤەبرنا رۆژنامەگەریا كوردی دا بن و مالپەرا مە د خزمەتا ھەموو رۆژنامەڤان، نڤیسكار و رەوشەنبیرێن ب كورمانجی تیپێن ئارامی دنڤیسن دا یە.
نسرەت حاجی
بەرپرس و سەرنڤیسكار
www.sibehi.com
