پەیامێن سەرۆک نێچیرڤان بارزانی ژ سلێمانیێ
برێز نێچیرڤان بارزانی سه‌رۆکێ هه‌رێما کوردستانێ، رۆژا شه‌میێ ۱۹.۱۱.۲۰۲۲ێ ل باژارێ سلێمانیێ به‌شداری د مه‌راسیما سه‌رساخیێ یا قوربانیێن بوویه‌را خه‌مگینا ڕۆژا پێنجشه‌مێ ۱۷.۱۱.۲۰۲۲ێ کو ژ ئه‌گه‌را په‌قنا تانکه‌کێ گازێ ۱٥ که‌سان ژیانا خوه ژ ده‌ست دا و هه‌ژماره‌ک که‌س ژی بریندار بوون، کر.
د مه‌راسیمێ دا سه‌رۆک نێچیرڤان بارزانی ژ مالبات و که‌سووکارێن قوربانیان را سه‌رساخی خوه‌ست و هه‌ڤسۆزی و هه‌ڤخه‌میا خوه یا کوور ب وان را نیشان دا. هه‌روه‌سا، هێڤی خوه‌ست کو خوه‌دایێ مه‌زن جانێ قوربانیان ب ره‌حم و دلۆڤانیا خوه شاد بکه و ئارامی، سەبر و هه‌دارێ ب مالبات و که‌سووکارێن قوربانیان ببه‌خشه.
پاشێ ژی سه‌رۆکێ هه‌رێما کوردستانێ سه‌ردانا نه‌خوه‌شخانه‌یا شار کر و ل وێرێ ژی سه‌ردانا بریندار و قوربانیێن وێ بوویه‌رێ کر و ژ نێزیک ڤه شۆپاندنا ڕه‌وشا وان کر، و هه‌روه‌سا، هێڤیا باشبوونا بله‌ز ژ بۆ برینداران خوه‌ست و ئاماده‌بوونا خوه ژ بۆ پێشکێشکرنا هه‌موو ئالیکاری و پێویستیا چاره‌سه‌ریێ نیشان دا.
نێچیرڤان بارزانی سه‌رۆکێ هه‌رێما کوردستانێ به‌رسڤا پرسێن رۆژنامه‌ڤانان دا و گۆت: “هاتنا مه ژ بۆ باژارێ سلێمانیێ ژ بۆ سه‌رساخیێ ل مالباتێن قوربانیێن وێ کاره‌ساتا کو ل وی باژاری قه‌ومی بوو. ب راستی ئه‌ڤ کاره‌ساته‌ک مه‌زن بوو، ته‌ڤاهیا کوردستانێ ژ زاخۆ هه‌تا خانه‌قینێ، ل هه‌موو ده‌ڤه‌رێن هه‌رێما کوردستانێ هەڤوه‌لاتی ل ناڤخوه و ده‌رڤه هه‌موو خه‌مگینن و هه‌ر یه‌ک ژ مه ل مالا خوه خوه‌دیێ ڤێ تازیێ یه.”
سه‌رۆکێ هه‌رێما کوردستانێ گۆت: “ئه‌م ئیرۆ ژ بۆ سه‌رساخیێ هاتنه باژارێ سلێمانیێ و دگه‌ل پارێزگار مه به‌شداری د مه‌راسیمێ دا کر و په‌یاما خوه یا سه‌رساخیێ ب وان گهاند. بوویه‌ره‌ک نه خوه‌ش بوو، هه‌ر ب ڤێ هه‌لکه‌فتێ ئه‌ز دخوازم سپاسیا جه‌نابێ پارێزگارێ سلێمانیێ بکم کو من ژ وی بهیست کو هه‌موو ئالیان ب هه‌ستکرن ب به‌رپرسیارێ و هه‌موو شاهدێ وێ یه‌کێ نه کو هه‌ر ژ جه‌نابێ پارێزگار و هه‌م ژی نه‌خوه‌شخانه‌یا شار، پزیشک، هه‌موو خه‌باتکارێن نه‌خوه‌شخانه‌یێ، به‌ره‌ڤانیا شارستانیێ، پۆلیس، شاره‌داری، ئاساییش و خه‌لکێ خوه‌به‌خشێ ڤی باژاری هه‌ر هه‌موویان ئه‌رکێن خوه ب جه ئانین.”
نێچیرڤان بارزانی سه‌رۆکێ هه‌رێما کوردستانێ د به‌رده‌وامیا به‌رسڤدانا پرسێن رۆژنامه‌ڤانان دا هه‌روه‌سا گۆت: “ڤێ بوویه‌رێ ل ته‌ڤاهیا کوردستانێ سۆزداریه‌ک چێکر کو ئه‌ڤ ژ بۆ مه هه‌موویان جهێ شانازیێ یه. ده‌ما بوویه‌ره‌که وها چێببه، ئه‌م هه‌موو ب هه‌ڤ را هه‌ول ددن ئالیکاریێ بکن. سپاسیا یه‌ک ب یه‌کێ وان دکم یێن کو به‌شدار بوون و کار و خزمه‌تێ کرن. ئه‌م هه‌ڤپارێ خه‌ما وان مالباتانن. ئه‌م هێڤیدارن کو حکوومه‌ت ژی لێکۆلینه‌ک پێویست بکه داکو بزانین چاڤکانیا کێشه‌یێ ل کوده‌رێ یه و چما ئه‌ڤ بوویه‌ر قه‌ومی. بێگومان دڤێ ئه‌ڤ ببه ده‌رسه‌ک و ژ نوها و پێدا هه‌ول بدین ئه‌و تشتێن ژ بۆ ئه‌منیه‌ت و سلامه‌تیا وه‌لاتیان پێویستن زێده‌تر مفا ژێ وه‌ربگرن.”
د به‌رسڤا پرسه‌کێ دا ده‌ربارێ بریارا سه‌رۆکێ یەنەکێ یا ژ بۆ قه‌ره‌بووکرنا مالباتان و ئالیکاریا سه‌رۆکاتیا هه‌رێمێ ژ بۆ وان، سه‌رۆک نێچیرڤان بارزانی گۆت: “دڤێ ئه‌م هه‌موو به‌شداری ڤێ یه‌کێ ببن، یا کو پێویست به ژ بۆ ڤان مالباتان بێ کرن، بێگومان حکوومه‌ت ژی دێ ئه‌رکێ خوه پێک بینه. هه‌ر که‌سێ بخوازه کارێ خێرخوازیێ بکه، چ سه‌رۆکاتیا پارتیه‌ک و چ که‌سایه‌تی به، ئه‌م سپاسیا وان دکن و ئه‌م دێ کێفخوه‌ش ببن.”
سه‌رۆک نێچیرڤان بارزانی د ده‌ربارێ هه‌ستێن خوه یێن به‌شداریکرنا د مه‌راسیما سه‌رساخیێ دا و ته‌دبیرێن ژ بۆ ڕێگرتن ل دووباره‌بوونا بوویه‌رێن ب ڤی ڕه‌نگی دا گۆت: ب ڕاستی هندی بێژی بوویه‌ره‌که نه خوه‌ش بوو، ئیرۆ ل کوردستانێ، دوور ژ وێ یه‌کێ کا به‌رپرسیاریا من یا به‌رپرسیاریا یێ دن چیه، ئه‌م هه‌موو خه‌مگینن و ئیرۆ ل هه‌موو مالان تازیه. مه ب ئه‌رکێ خوه زانی کو ئه‌م سه‌ردانا وان بکن و ژ نێزیک ڤه ببینن، بێگومان ژ بۆ وان چ پێویست به ئه‌م دێ بکن.
د به‌رسڤا پرسیاره‌که دن دا ده‌ربارێ پرسا سوته‌مه‌نیێ و هه‌روها بریارا داوی یا سه‌رۆکاتیا هه‌رێما کوردستانێ یا ده‌ربارێ هلبژارتنان و ده‌ما لدارخستنا وێ دا ژی، برێز نێچیرڤان بارزانی گۆت: “مه‌سه‌له مه‌سه‌له‌یا سلامه‌تیێ یه، بێگومان حکوومه‌ت دێ ل سه‌ر وێ بوویه‌رێ لێکۆلین بکه و دڤێ وان پێنگاڤان باڤێژه یێن کو ژ بۆ سلامه‌تیا وه‌لاتیان پێویستن. ژ به‌ر کو کارێ حکوومه‌تێ ئه‌وه کو خزمه‌تگوزاریان ژ بۆ وه‌لاتیێن هه‌رێما کوردستانێ دابین بکه. هه‌لبه‌ت وه‌که هه‌ر تشته‌کی دن، حکوومه‌ت دێ ل سه‌ر ڤێ مژارێ هه‌لوه‌ستێ نیشان بده و ژ بۆ ڕێنیشانکرن و گوهه‌رتنا یاسایێ چ پێویست به دێ جیبجی بکه.”
“ده‌ربارێ هلبژارتنان ژی، وه‌که سه‌رۆکێ هه‌رێما کوردستانێ ل گۆر ئه‌رکێ خوه من به‌ریا نها نامه‌یه‌ک ژ پارلامه‌نتۆیا کوردستانێ را شاندبوو و هێڤیدارم کو پاریێن سیاسی یێن هەرێما کوردستانێ ل سه‌ر ڤێ مژارێ ل هه‌ڤ بکن. نها ته‌مه‌نێ پارلامه‌نتۆیێ ژ بۆ ساله‌ک هات درێژکرن و دڤێ د ناڤا وێ سالێ دا هلبژارتن بێن کرن.”
سه‌رۆک نێچیرڤان بارزانی د به‌رسڤا پرسه‌که دن دا ده‌ربارێ چاره‌سه‌رکرنا کێشه‌یێن سیاسی ب تایبه‌تی پرسگرێکێن ناڤبه‌را پارتیا ده‌مۆکراتا کوردستانێ (پدک) و یه‌کیتیا نشتمانی یا کوردستانێ (ینک) ده گۆت: “یا کو وه‌ک پره‌نسیپ زه‌لال و ئاشکه‌ره‌یه، ئه‌گه‌ر ئه‌م یه‌کده‌نگ نه‌بن، ئه‌گه‌ر ئه‌م ب هه‌ڤ را کار نه‌کن و ئه‌گه‌ر ئه‌م رێکنه‌که‌ڤن ئه‌م نکارن چو ده‌ستکه‌فتان ژ بۆ ڤێ هه‌رێمێ و ڤی وه‌لاتی ب ده‌ست بخن. ته‌نێ شه‌رتێ سه‌رکه‌تنا مه یه‌کیتی یه، هه‌لبه‌ت ئه‌م پارتیێن جودا نه و حزبێن جودا ژی خوه‌دی نێرینێن جودا نه و ئه‌م نکارن ببێژن کو دڤێ ئه‌م هه‌موو وه‌ک هه‌ڤ بفکرن.
نێچیرڤان بارزانی سه‌رۆکێ هه‌رێما کوردستانێ هه‌روه‌سا گۆت: تشتێ ژ بۆ مه گه‌له‌ک گرنگ ئه‌وه کو دڤێ به‌رژه‌وه‌ندیێن هه‌رێما کوردستانێ د سه‌ر هه‌موو پارتیان و هه‌موو تشتێن دن را به. ئه‌ز د وێ باوه‌ریێ دا مه کو ئه‌م دکارن پرسگرێکان چاره‌سه‌ر بکن. ئه‌گه‌ر ئه‌م ل داخویانیا داویێ یا کۆمیته‌یا ناوه‌ندی یا پەدەکێ ب هوورگلی بنێرن، دبێژه دێ ڕووپه‌له‌ک نوو ڤه‌کن و ده‌ست ب دانووستاندنان بکن و سه‌ردانا ئالیان بکن و دێ هه‌ولێن جدی ژ بۆ چاره‌سه‌رکرنا هه‌موو پرسگرێکان ب ڕێیا دیالۆگێ و ل سه‌ر ماسه‌یا گۆتووبێژان چارسه‌ر بکن، هه‌لبه‌ت ئه‌م دێ سه‌ردانا یەنەک و ئالیێن دن ژی بکن.
