پەیامەك ڤالایە و ئۆجەلان رۆل نەمایە
جارەكا دن رێ ژ پارێزەران را ھات دان كو سەردانا ڕێبه‌رێ زیندانیكریێ پارتیا كاركەرێن كوردستانێ (پەکەکە) عەبدوڵا ئۆجەلان بكەن و پشتی جڤینا ب ئۆجەلان را پارێزەران ڕاگەهاند کو ئۆجەلان دبێژه كو ئه‌و ژ بۆ چاره‌سه‌رکرنا پرسا کورد ل باكورێ كوردستانێ ئاماده یه، لێ دڤێ ده‌وله‌تا ترکیێ ژی گاڤێن پێویست د ڤی واری دا پاڤێژە.
ل گور پارێزەرێن چووینە ئیمرالیێ، رەوشا ل باكور و تركیێ ھەیە نە ب دلێ ئۆجەلانە و ژبەر وی شەرێ ھەیە دلگرانە و وی گۆتیە كو ئەگەر ئەڤ رەوش و شەر بەردەوام بە دێ ئەنجامێن خراپتر ب خوە را بینە.
د وێ وپەیاما خوە دا جارەكا دن سەرۆكێ زیندانیكریێ پەكەكێ عەبدۆلا ئوجەلان ل دژی دەولەتا كوردی دەردكڤە و دبێژە پێویستیا كوردان ب دەولەتێ نینە. پێویستیا كوردان ب تەنێ ب ھندەكا مافان ھەیە.
ل گۆر داخویانیا پارێزه‌ران، ئۆجالان گۆتیه كو دكارە د ناڤا حەفتیەكێ دا داویێ ب شەر بینە و ئەو دكارە پرسا كورد چارەسەر بكە ب ئاوایەكی ئەگەر حكومەت ژی گاڤێن پێویست پاڤێژە و ئنیەتا چارسەریێ ھەبە.
وەكی تێ زانین د دەما ھلبژارتنا سەرۆكشارەدارێ ستەنبۆلێ دا، ئۆجەلان داخواز کربوو کو ھەدەپە پشتگریا جەھەپێ نه‌که و د هلبژارتنان دا بێ ته‌ره‌ف بمینه. لێ ھدەپێ و قەندیلێ ب یا ئۆجەلان نەكر و دەنگ ب بەربژێرێ جەھەپێ ئەكرەم ئیمامئۆغلو دان.
ھەروەسا ڕێبه‌رێ پەکەکێ د ھەڤدیتنا ب برایێ خوە را د دەستپكا حزیرانا چوویی دا گۆتبوو كو ئەگه‌ر حكومەتا ترکیێ ده‌رفه‌ت ب وی بدە، ئه‌و دکاره ڕیا چاره‌سه‌ریێ ڤه‌که.
دەربارێ رەوشا سوریێ ژی، ئۆجەلان بانگا ژیانه‌کا هه‌ڤبه‌ش و یه‌کبوونا سوریێ كر بوو و گۆتبوو كو ژ بۆ یه‌کیتیا سوریێ، هه‌موو خه‌لکێن وی وه‌لاتی دڤێ ژیانا خوه یا هه‌ڤبه‌ش ب هه‌ڤ ڕا ئاڤا بکن. ئەگه‌ر ژ بۆ ڤێ ئارمانجێ سه‌ربکه‌ڤن چ هێز نکاره ئازادیا وان بداوی بینه.
ژ ڤان پەیام و داخویانیێن ئۆجەلان دیار دبە كو ئێدی چ ئالی ب یا ئۆجەلان ناكن، نە ھەدەپە، نە قەندیل و نەژی حكومەت گۆھ نادن پەیامێن ئۆجەلان،. ھەموو تەرەف دزانن كو ئۆجەلان ئەو رۆل و باندۆر نەمایە كو بكاربە تشتەكی بكە. نە ھەدەپێ د ھلبژارتنان دا ب یا وی كر، نە پەیەدێ ل رۆژاڤایێ كوردستانێ گۆھ دایێ.
لێ چما ئەڤ پەیاما ئۆجەلان د ڤێ رەوشێ و دڤی وەختی دا؟
ڤان ھەیامیێن چوویی ھەدەپێ و ھندەك بەرپرسێن قەندل بەحسا نووكرنا پێڤاژۆیا ئاشتیێ كر، حكومەتا تركیێ ژی رێ دا كو ئۆجەلان ژی پەیاما خوە بدە داكو ناكۆكیێن ھەنە د ناڤبەرا ھەدەپە، قەندیل و ئۆجەلان كورتر بكە.
ژ ئالیەك دن حكومەت خوەست د ڤێ رەوشێ دا ئۆجەلان پەیامەكا ب ڤی ئاوایی بدە داكو فوكۆس بكەڤە سەر پەیامێ .و تركیە ژی ئارمانجێن خوە ل رۆژاڤایێ كوردستانێ ب جھ بینە
