پەیڤا سەرۆک بارزانی د پێشوازیکرنا ئەنفالکریێن بارزانی
پەیڤا سەرۆک مەسعود بارزانی د مەراسما پێشوازیکرنا ١٠٠ جەنازەیێن ئەنفالکریێن بارزانی ل رۆژا شەمیێ ٢٠٢٢/٧/٣٠ ل فرۆکەخانەیا ناڤدەولەتی یا هەولێرێ.
ب ناڤێ خوه‌دایێ مه‌زن و دلۆڤان
برێزان
ئەز ب گەرمی بخێرهاتنا وه هه‌موو ئالیان دکم و سپاسیا ئاماده‌بوونا وه دکم.
هه‌ر وه‌کی دیاره د رۆژه‌کا وه‌کی ئیرۆ دا، به‌ری ۳۹ سالان رژێما به‌عه‌س ب ئێریشه‌کا سه‌رتاسه‌ری دا هه‌شت هه‌زار بارزانی گرتن و ژ بۆ چۆل و بیابانێن باشورێ ئیراقێ برن، ئەو هەموو خەلکەک بێتاوان بوون و ب ته‌نێ تۆمه‌تا وان ئه‌و بوو کو بارزانی بوون.
ئه‌ڤه خه‌له‌که‌ک بوو ژ زنجیره‌کا تاوانێن مه‌زن یێن ب سه‌رێ گه‌لێ کوردستانێ هاتین، وه‌کی بێسه‌روشوونکرنا ۱۲ هه‌زار کوردێن فه‌یلی و کیمیابارانا هه‌له‌بجه و چه‌ندین جهێن دن یێن کوردستانێ کو د ناڤا چه‌ند خوله‌کەکان دا پێنج هه‌زار که‌س کو پرانیا وان ژن و زارۆک بوون ب گازا ژه‌هراوی شه‌هیدبوون.
پاشی ئه‌نفالا سه‌رتاسه‌ری دەست پێ کر کو ژ خانه‌قین هه‌تا زاخۆیێ هه‌موو کوردستان ڤەگرت، کو ب گشتی ۱۸۲ هه‌زار که‌سێن بێتاوان ل چۆل و بیابانێن باشورێ ئیراقێ هاتن زیندیبچال کرن.
هه‌تا نها ئەم شیاینە هه‌ژماره‌ک ژ روفاتێن شه‌هیدان ڤه‌گوهێزین کوردستانێ، لێ به‌لێ هێشتا ژی گه‌له‌ک مانه، هه‌تا جەنازەیێ یه‌ک شه‌هید ژی مابە ئه‌م دێ ل سەر هه‌ولێن خوه به‌رده‌وام دبن.
ئه‌ز ل ڤێرێ ب پێدڤێ دزانم کو سپاسی برێز سه‌رۆکێ ئه‌نجومه‌نا وه‌زیران، مسته‌فا کازمی، پارێزگارێ موسه‌ننا برێز ئه‌حمه‌د مه‌نفی، رێڤه‌به‌رێ ناحیا بوسیه و خه‌لکێ وێ دەڤەرێ بکم کو گه‌له‌ک دگەل مە هه‌ڤکاربوون و گه‌له‌ک یارمه‌تیا مه دان.
ئەز سپاسیا هه‌ر دو په‌یمانگه‌هێن پزیشکێ دادوه‌ری ل به‌غدا و هه‌ولێر دکم، سپاس ژ بۆ رێڤه‌به‌رێ گۆرێن ب کۆم ل ده‌زگه‌هێ شه‌هیدان ل بەغدایێ، سپاس ژ بۆ ڕێخستنا (ئای سی پێم) کو هه‌موویان گه‌له‌ک زه‌حمه‌تی کێشان هه‌تا کو ئه‌و پرۆسه‌سە گەهشتیه ئه‌نجامێ.
سپاس ژ بۆ هه‌ر دو وه‌زاره‌تان، وەزارەتا کاروبارێ شه‌هیدان و ئه‌نفالکریان و وه‌زاره‌تا ته‌ندروستیێ کو ب ئه‌رکێ خوه رابوون، سپاس ژ بۆ برایێن برێز د. ئەبدوولا، عه‌لیاوه‌یی، د. یاسین که‌ریم ئه‌مین و مه‌ریوان سه‌دیق ژ بۆ که‌د و زه‌حمه‌تا وان.
سپاس ژ بۆ وان هه‌موو برایێن کو ب ئه‌رکێ رێخستنا ڤێ مه‌راسیمێ رابوونه.
برێزان
رژێما به‌عه‌س ب دله‌کێ ره‌قتر ژ به‌ر و ب خوینه‌کا سار، ئەو هه‌موو خه‌لکێ بێتاوان شه‌هید کر و هۆڤاتیا خوه ژ بۆ هه‌موو جیهانێ ده‌رخست.
ل به‌رامبه‌ر وێ دا گه‌لێ کوردستانێ د ده‌ما راپه‌رینا سالا ۱۹۹۱ مرۆڤدۆستیا خوه و ره‌وشتبلندیا خوه نیشان دا، ئه‌و هێزێن کو تاوانا ئه‌نفالێ ئه‌نجامدابوون هه‌موو که‌تن به‌ر ده‌ستێ خه‌لکێ کوردستانێ، لێ به‌لێ تۆلا خه‌لکێ کوردستانێ ب ئاوایه‌ک جوودا بوو، ئیزن دانه وی خه‌لکی و ره‌وشتبلندیا خوه نیشان دا.
ژ بێکه‌سیا کوردان نه‌با ئه‌وا کو ل کوردستانێ روودایی هیچ کێمتر نه‌بوو ئه‌وا ل ئه‌فریقایا باشور روودایی، لێ به‌لێ نه کورد کارین وێ هه‌لوه‌ستا خوه یا بلند ب دنیایێ بدن ناسین، نه ژی جیهانێ گرینگی پێدا.
ئه‌ڤ تاوان گه‌له‌ک مه‌زنن و برین گه‌له‌ک کوورن نایێن ژ بیر کرن، لێ به‌لێ پێدڤیە به‌رده‌وام بین ل سه‌ر وێ ره‌وشتا خوه یا بلند، پێدڤیە ب هیچ ئاوایه‌کێ رێ نه‌دین تاوانا رژێمێ ببە سه‌ده‌ما دژمناتیا د ناڤبه‌را گه‌لان، رژێم تێن و دچن و لێ به‌لێ مله‌ت دمینن، ژ به‌ر وێ دڤێ ئه‌و براتی و ئه‌و هه‌ڤدوتێگەهشتن ئه‌و هه‌ڤدوقه‌بولکرنا د ناڤبه‌را مله‌تان دا به‌رده‌وام بە و هه‌ر بمینه.
ل ئه‌نجومه‌نا نوونه‌رێن ئیراقێ و ل پارله‌مه‌نا کوردستانێ و دادگه‌ها ته‌میزێ یا ئیراقێ، هه‌موویان بریار دا کو ئه‌ڤ تاوانە جینۆسیدایە و حکومه‌تا ئیراقێ نەچار کریه کو هه‌موو هه‌ڤکاریه‌کێ ژ بۆ ئانینا روفاتێن شه‌هیدێن مه بکه، هه‌روەها قه‌ره‌بووکرنا که‌سوکارێن شه‌هیدان بکە، چاڤه‌رێییا مه ژ هه‌ڤپه‌یمانێن مە ئه‌و بوو کو پشتی ۲۰۰۳ هه‌ڤکارێن مه بن داکو پیچه‌ک ژ خه‌م و ئێشێن که‌سوکارێن شه‌هیدان بێ سڤک کرن و بێ کێمکرن، لێ به‌لێ مخابن مه به‌رۆڤاژیا وێ دیت.
قه‌ره‌بووکرنا که‌سوکارێن شه‌هیدان ئه‌رکه‌ک یاسایی و ئه‌خلاقی یێ حکومه‌تا ئیراقێ یه و هێڤیدارین ب وێ ئه‌رکا خوه رابه.
برێزان
ئه‌م گه‌له‌ک دلگرانین ژ وێ قه‌یرانا نها ئیراق تێدایه، مخابن هه‌ر ژ پشتی ژناڤچوونا رژێمێ ل سالا ۲۰۰۳ سود ژ وێ ده‌رفه‌تێ نه‌هات وه‌رگرتن، ده‌ستوور دانه ئالیه‌کی و کار پێ نەهاتە کرن، ل شوونا وێ یه‌کێ کو ئەگەرێن سەرهلدانا پرسگرێکان چاره‌سه‌ر بکن، تەعامول دگه‌ل ئه‌نجامێن وێ کرن، ئه‌و ژی ته‌عاموله‌ک ب شاشی، مخابن هه‌تا نها ژی به‌رده‌وامه.
خه‌لکێ ئیراقێ ب گشتی ب کورد، عه‌ره‌ب، تورکمه‌ن، ئاشوری، کلدان و هه‌موویان هند ئێش و ژان کشاندنه کو موسته‌حه‌قێ ژیانەکا باشترن ژ ڤێ ژیانا کو نها تێدانه، ئه‌م هێڤیدارین هه‌موو ئالیه‌ک هه‌ست ب به‌رپرسیاریا خوه بکن و هه‌موو پێکڤه ب ئنیه‌ته‌کا پاک و ب ئیراده‌یه‌کا پۆلایین هه‌ولا وێ یەکێ بدن کو ئه‌ڤ قه‌یران ب داوی ببە و خه‌لک ب به‌خته‌وه‌ری و ئاسووده‌یی بژیت و جاره‌کا دن کاره‌ساتێن ب ڤی ئاوایی نه‌بینین.
ل داویێ جاره‌کا دن سپاسیا ئاماده‌بوونا وه دکم .
هه‌زار سلاڤ ژ بۆ گیانێ پاکێ شه‌هیدان.
