پارتیا یەكێتیا دەمۆكرات (پەیەدە) دخوازه باندۆرا پارتیا كاركەرێن كوردستانێ (پەکەکە) ل سه‌ر خوه نه‌هێله, ئه‌ڤ سه‌ردێرا نڤیسەكا نڤیسکار هه‌ستی که‌مال ه کو ڕۆژنامه‌یا وشه دا هاتیه به‌لاڤکرن.
پارتیا یه‌کێتیا ده‌مۆکرات (پەیەدە) د کۆنگره‌یا خوه دا ب سیاسه‌ت و به‌رنامه‌یێن خوه دا چوویه و هه‌ول دایه باندۆر و هه‌ژموونا پەکەکێ ل سه‌ر خوه نه‌هێله، ئه‌ڤه ژی د بریار و هه‌لوه‌ستێن وێ دا ره‌نگ ڤه‌دایه. ئەمریکا سه‌ده‌ما سه‌ره‌کیا گوهه‌رینا ڤێ بریارا پەیەدێ یە.
د وێ کۆنگره‌یێ دا کو پەیەدێ د۲٤ ێ شباتا ئیسال ل ڕمێلان ئه‌نجام دایه، گوهه‌رتن د به‌شه‌ک ژ سیاسه‌تێن خوه دا کریه و ب به‌ره‌ڤاژیا بریار و هه‌لوه‌ستێن به‌رێ یه، د به‌شه‌ک به‌ر ب چاڤێ کارنامه‌یا پارتیا خوه دا به‌هسا چاره‌سه‌رکرنا کێشه‌یان د ناڤ پارتیێن سیاسیێن کوردی و ئه‌نجامدانا گوفتووگۆیا د گه‌ل وان ته‌رخان کریه.
ھەروەسا ب کرداری نه‌رمی به‌رانبه‌ر ئه‌نجوومه‌نا نشتمانیا کورد ل سووریێ “ئه‌نەکەسە” نیشان دایه، ژ بۆ وێ یه‌کێ ژی ئه‌نەکەسێ نڤیسینگه‌هێن خوه یێن ل ڕۆژاڤایێ کوردستانێ ڤه‌کرن.
هه‌ر د چارچۆڤه‌یا گوهه‌رتنان و نه‌هشتنا باندۆرا پەکەکێ دا، هه‌ر یه‌ک ژ عه‌یشه هه‌سۆ و ئه‌نوه‌ر موسلیم، کرنه هه‌ڤسه‌رۆکێ وێ پارتیێ کو به‌رده‌وام ڕه‌خنه ل وان هاتیه گرتن کو کێمتر گرێدایی سیاسه‌تێن پەکەکێ نه ل ڕۆژاڤایێ کوردستانێ.
پەکەکە د لیستا ڕێخستنێن ته‌رۆریستیێن ئەمریکایێ دا یه
ئیبراهیم قه‌فتان سه‌رۆکێ پارتیا پاشارۆژا سووریێ، ڕاگەهاند کو ئه‌و ب هووری چاڤدێریا کۆنگره‌یا پەیەدێ دکن و مێهڤان ژی بوونه، هه‌وله‌ک ژ به‌رنامه و سیاسه‌تا وان یا نوو دا هه‌یه زێده‌تر به‌ره‌ڤ چاکسازی و ڕه‌فۆرم و نێزیکبوونا ئالیێن کوردی یه. ئه‌ڤه ژی دکاره وها بێ دیتن کو ئێدی پەیەدە ب خوه و سه‌ربخوه‌یانه بریارێ ته‌ڤاهی بده و ڕه‌فتاران بکه.
قه‌فتان وها گۆت: “ره‌نگه هێسان نه‌بە ئه‌و پارتی ڕاسته ڕاست د بن زه‌ختا پەکەکێ ده‌رکه‌ڤه، لێ به‌لێ ڤێ کۆنگره‌یێ بریارێن گرینگ د ڤی واری دا دانه کو به‌رێ پەیەدە د بن زه‌ختا پەکەکێ دا ب ته‌ڤاهی دژی بوو، ب تایبه‌ت نێزیکبوونا وان یا د ئه‌نەکەسێ و ڤه‌کرنا ده‌رگه‌هان ژ بۆ وان یان ژی هاتنا وان بۆ ڕۆژاڤایێ کوردستانێ”.
نها کو ئەمریکا هه‌ڤکاریا دارایی و فێرکرن و ڕاهێنان و دابینکرنا چه‌ک ژ بۆ ھێزێن سووریا دەمۆكرات (هەسەدە) دکه، زه‌خته‌کا مه‌زن ل سه‌ر وێ پارتیێ هه‌یه ژ بۆ ده‌رکه‌تنا وان ژ بن باندۆر و هه‌ژموونا پەکەکێ، ژ به‌ر کو پەکەکە د لیستا ڕێخستنێن ته‌رۆریستیێن ئەمریکایێ دا یه، ئه‌ڤه ژی وها ل پەیەدێ کریه كو ژ بۆنا به‌رژه‌وه‌ندیێن خوه وێ گاڤێ باڤێژه.
لێ به‌لێ کێشه‌یا ل پێش پەیەدێ د ڤی واری دا ئه‌وه کو هه‌ژموونا پەکەکی ل سه‌ر وێ گه‌له‌ک خوورته و ڕه‌نگه ئه‌گه‌ر ب ئاوایه‌که ڕاسته ڕاست وێ گاڤێ باڤێژه، پەکەکە کێشه‌یان ژ بۆ وان دروست بکه و وها بکه هه‌ری کێم باله‌ک ژ وێ هێزێ جوودا بکه. ژ بۆ وێ یه‌کێ پەیەدە و سیاسه‌تمه‌دارێن وێ دڤێ گاڤێن نه‌هشتنا وێ باندۆر و هه‌ژموونێ دا ب زیره‌کانه و ب بێهنفره‌هیێ وێ باندۆرێ نه‌هێلن.
هه‌ر د چارچۆڤه‌یا دوورکه‌تنا پەیەدێ ژ هه‌ژموونا پەكەكێ، پەیەدە به‌رێ خوه دایه ئه‌نەکەسێ و نها د گوفتووگۆیێ دانه و ئه‌نەکەسێ ژی نڤیسینگه‌هێن خوه یێن ل ڕۆژاڤایێ کوردستانێ ڤه‌کرنه.
کاوه عه‌زیزی ئه‌ندامێ سه‌رکردایه‌تیا ئه‌نەکەسێ ژی گۆت: “ئه‌نەکەسە بریار دایه هه‌موو باره‌گه‌هێن خوه یێن ل ڕۆژاڤایێ کوردستانێ ڤه‌که، زێده‌ترێ وان ژی هاتنه ڤه‌کرن، ئاوایێ رێڤەچوونا گوفتووگۆیان دلخوه‌شکه‌رن بۆ کو ڕێکه‌فتن بێ کرن و ناڤمالا کورد بێ ڕێکخستن و کورد یه‌ک بگرن”.
د ده‌ربارێ گوهه‌رینا سیاسه‌تا پەیەدێ، عه‌زیزی گۆت: “هیچ چاره‌یه‌ک دن ل پێش پەیەدێ نینه، ئه‌گه‌ر گوفتووگۆ نه‌بن، نها ئه‌و د مه‌ترسیا وێ به‌ربه‌لاڤیێ دا تێگهشتنه، ژ بۆ وێ یه‌کێ ئاماده‌نه گوفتووگۆ بکن، لێ به‌لێ پەیەدە ژ ئالیێ پەكەكێ ڤه بریار ژ بۆ وان تێ دایین و ئه‌و ب خوه نه‌یێ بریارێ نه، ئه‌م باوه‌رن هه‌تا پەیەدە د بن بریارا پەكەكێ دا بە، ئه‌م ل سووریێ بێ کێشه نابن و نکارن د گه‌ل هه‌ڤدوو ب ئاشتی و بهێزی بمینین”.
به‌رێ ژی پەیەدێ ۱٥۰ کادرێن بلندێن ئه‌نەکەسێ گرتبوو و نێزیکی ٥۰ باره‌گه‌هان ژی داخستبوون، لێ به‌لێ نها گرتی ئازاد کرنه و باره‌گه‌هێن ئه‌نەکەسێ ژ
