به‌رپرسه‌کێ پدک ێ دبێژه كو پ ک ک دخوازه به‌هانه‌یان بده ده‌ستێ ترکیێ دا کو هێزێن خوه ل ده‌ڤه‌را بارزان یا باشوورێ کوردستانێ بجھ بکه پاشێ بێژه پدک ێ هێزێن ترکیێ ل وێرێ بجیھ کریه! ئه‌ڤ ده‌مه‌کە پ ک ک وێنه و دیمه‌نێن ئێرش و چالاکیێن خوه یێن ل دژی ئارتێشا ترکیێ به‌لاڤ دکه. هنده‌ک جاران ژی ئیدیعا دکه کو ل ده‌ڤه‌را بارزان یان هنده‌ک ده‌ڤه‌رێن دن یێن باشوورێ کوردستانێ ئێرشی هێزێن ترکیێ کریه! ئه‌ندامێ سه‌رکردا‌تیا پدک ێ عه‌لی عه‌ونی ل سه‌ر ڤێ یه‌کێ ژ باس نیوسێ رە گۆت، ژ سالا ١٩٩١ ڤه هه‌تا نها به‌شه‌ک ژ ده‌ڤه‌رێن سینۆری یێن هه‌رێما کوردستانێ مینا ده‌ڤه‌رێن برادۆست، ڕێکان، نێروه، به‌رواری و گه‌له‌ک جهێن دن، ژ به‌ر هه‌بوونا هێزێن پ ک ک کاڤل و وێران مانه و خه‌لکێ وان دەڤەران نکاره وان گوندێن خوە ئاڤه‌دان بکه. ئه‌ڤ ژی نیشان دده کو هه‌بوونا پککێ ل وان ده‌ران، چ خێر و سوودا وێ ژبۆ گه‌لێ کوردستانێ نینه. عه‌لی عه‌ونی هه‌روها گۆت، به‌لاڤکرنا وێنه و دیمه‌نێن ئێرش و چالاکیان ژ ئالیێ پککێ ڤه نیشان دده کو پکک دخوازه هێزێن ترکیێ ده‌رباسی بارزان ببن پاشێ بێژن حکوومه‌تا کوردستانێ و پدکێ ئه‌و ل وێرێ بجیھ کرنه! ئه‌و هێزێن ترکیێ یێن ل ئامێدی و بامه‌رنێ ژی، ژ به‌ر هه‌بوونا پککێ ل وێرێنە. ژ به‌ر وێ ژی ئه‌گه‌ر پکک ب راستی بۆ کوردان خه‌بات دکه بلا ل باکوورێ کوردستانێ خه‌باتێ بکه. وی به‌رپرسێ پدکێ گۆت ژی کو ئه‌و ناخوازن پکک ل ناڤ خاکا باشوور شه‌رێ ترکیێ بکه ئوو گۆت: ئه‌گه‌ر ئه‌و کۆمپلۆیا پککێ ب سه‌ر بکه‌ڤه و ترکیه هێزێن خوه ل بارزان بجیھ بکه وێ چاخێ ئیران، حه‌شدا شه‌عبی و هه‌ڤال و هه‌ڤالبه‌ندێن وان دێ ئێرشی پدک و حکوومه‌تا کوردستانێ بکن و وان ب وێ یه‌کێ تۆهمه‌تبار بکن کو ب قه‌ستی هێزێن ترکیێ ل وێرێ بجیھ کرنه. ئه‌و دخوازن مه بکشینن ناڤ تشتێن دن. ژ به‌ر وێ ژی بلا پکک ل ڤر شه‌رێ ترکیێ نه‌که، ئه‌م ژی ناخوازن شه‌رێ ترکیه، ئیران و یێن دن بکن.
پ ك ك دخوازە بەرێ لەشكەرێ تركیێ بدە دەڤەرا بارزان
