سه‌رۆک نێچیرڤان بارزانی ته‌که‌ز ل سه‌ر پابه‌ندیا پرۆسه‌یا ڕه‌فۆرم و چاکسازیا ل وه‌زاره‌تا پێشمه‌رگه کر و ژ بۆ هه‌ڤکاری و پشتگیریا وان یا ل ڤێ پرۆسه‌یێ دا، سپاسی بریتانیا و وه‌لاتێن د هه‌ڤپه‌یمانیا ناڤده‌وله‌تیا دژی داعیشێ دا کر.
د جڤینا رۆژا سێشه‌مێ 2019.10.15 د گه‌ل گه‌نه‌رال ژۆن لۆرمه‌ر شێورمه‌ندێ بلندێ بریتانیا یێ ژ بۆ کاروبارێن ڕۆژهلاتا ناڤین، نێچیرڤان بارزانی سه‌رۆکێ هه‌رێما کوردستانێ سپاسیا بریتانیا و هه‌ڤپه‌یمانیا ناڤده‌وله‌تی کر کو د شه‌رێ دژی ته‌رۆرێ دا هه‌ڤکاریا هه‌رێما کوردستان و عیراقێ کرن و ته‌که‌ز ل سه‌ر پێویستیا به‌رده‌وامیا پشتگیریا بریتانیا و جڤاکا ناڤده‌وله‌تی یا ژ بۆ پاراستنا ده‌ستکه‌فتێن سه‌رکه‌فتنا ل سه‌ر ته‌رۆرێ دا و ڕێگریکرنا ل مه‌ترسیا سه‌رهلدانا داعیش دا کر.
گه‌نه‌رال لۆریمه‌ر ته‌که‌ز ل سه‌ر پابه‌ندیا بریتانیایێ یا ژ بۆ به‌رده‌وامیا پشتگیری و هه‌ڤکاریا هه‌رێما کوردستان د ڕووبرووبوونا گه‌فێن ته‌رۆرێ دا کر و ئاماده‌هیا وه‌لاتێ خوه یا ژ بۆ به‌رده‌وامیا هه‌ڤکاریکرنا وه‌زاره‌تا پێشمه‌رگه د پرۆسەسا چاکسازی و مه‌شق و ڕاهێنانا ب پێشمه‌رگه دووپات کر، خوه‌شهالیا خوه ژی ب هه‌ڤکاریکرنا وه‌زاره‌تا پێشمه‌رگه یا ل ڤی واری دا نیشان دا.
د جڤینێ دا كو وه‌زیرێ پێشمه‌رگه‌یێ هه‌رێما کوردستانێ و کۆنسۆلێ گشتی یێ بریتانیایێ ل هه‌رێما کوردستانێ ئاماده بوون، هه‌ر دوو ئالیا گرینگیا هه‌ڤاهه‌نگیا د ناڤبه‌را پێشمه‌رگه و ئارتێشا عیراقێ ل ناڤچه‌یێن کێشه ل سه‌ر و ڕووبرووبوونا مه‌ترسیێن سه‌رهلدانا ته‌رۆرێ، په‌یوه‌ندیێن هه‌ولێر – بەغدا، ڕه‌وشا عیراقێ و خوه‌پێشاندانێن به‌غدایێ و پارێزگه‌هێن دن، پێشهاتێن سووریه و ئۆپه‌راسیۆنا سه‌ربازیا ل ڕۆژهلاتا فراتێ ب تایبه‌تی و ڕه‌وشا مرۆڤی و ڕه‌وشا ناڤچه‌یێ ب گشتی گوفتووگۆ کرن.
