رۆژا ۲٦ێ ئیلۆنێ ل دژی ئاڤاهیێ پۆلیسان ”مالا پۆلیس” چالاکیه‌ک چێبوو و د ئه‌نجام دا پۆلیسه‌ک هاته کوشتن و یه‌ک ژی بریندار بوو. که‌سێن کو چالاکی کرین ژی هاتن کوشتن. ل سه‌ر ڤێ بوویه‌رێ گه‌له‌ک گۆتوبێژ هاتن کرن و ئه‌ڤ بوویه‌ر ژ ئالیێ هنده‌ک سیاسه‌تان ڤه هاته شه‌رمه‌زار کرن.
پارتییا دەمۆکراتیک یا گەلان (هەدەپێ) د ده‌ربارێ ڤێ بوویه‌رێ دا داخوویانیه‌ک بەلاڤ کر و تێدا دبێژه: “ئه‌رکێ مه یه کو ئه‌م حسابێن وان که‌سێن دخوازن سیاسه‌تا ده‌مۆکراتیک بەرته‌نگ بکن و بێچالاکی بکن، پووچ بکن.”
هەدەپە ڤه‌کری دبێژه کو، یێن کو ئه‌ڤ چالاکی کرن دخوازن پێشییا سیاسه‌تا ئاشکەرا یا هەدەپێ بگرن.
ژ ئالیه‌ک دن ڤه سه‌لاحەدین ده‌مرتاش داخوویانیه‌ک دا و گۆت: ئه‌م دێ ل دژی هه‌موو جوره‌یێن شده‌تێ ده‌رکه‌ڤن. ئه‌م دێ د ل سەر سیاسه‌تا خوە یا ده‌مۆکراتیک مۆکر بکن. ئه‌ز دخوازم هه‌موو ئالی ڤێ یه‌کێ باش تێبگەهن.
پشتی داخوویانیا هەدەپێ و ده‌مرتاش، هێزێن پارستان گەل (هەپەگێ) ژی د ده‌ربارێ چالاکیا مێرسینێ دا داخوویانیه‌ک به‌لاڤ کر و داخوویانیا وان د هه‌موو مه‌دیایا پەکەکێ دا هاته وەشاندن. هەگەپە د د داخوویانیا خوە دا چالاکیا مێرسینێ گه‌له‌ک بلند دنرخینه و ب ئاوایه‌کی گوهێ هەدەپێ و ده‌مرتاش ژی دکێشه.
هەپەگە د داخویانیا خوه دا دبێژه: “شه‌ڤا ۲٦ێ ئیلۆنێ دو هه‌ڤرێیێن مه یێن فیدائی ل ناڤچه‌یا مه‌زیتلی یا ل مه‌رسینێ ل دژی هێزێن دژمن چالاکیه‌کا فیدائی کرن. ئه‌ڤ چالاکی به‌رسڤه‌ک بوو ل دژی زه‌ختێن ل زیندانان، کۆمکوژی و ئێریشێن ب چه‌کێن کیمیه‌وی یێن ل سەر گه‌ریلا .”
د به‌شه‌ک دن یا داخویانیێ دا هەپەگە دبێژه: “بلا که‌س ل به‌ندێ نەبه کو ملیتانێن فیدائی یێن ئاپۆیی ب ره‌نگه‌کی جودا ته‌ڤبگه‌رن. یێن کو زماندرێژیێ ل ڤێ چالاکیا ب هه‌یبه‌ت دکن، به‌ریا هه‌ر تشتی بلا بالا خوه بدن سه‌ر ئێریشێن ب چه‌کێن کیمیاوی یێن رژێما قرکه‌ر یا فاشیست یا ئاکەپ-مەهەپێ یێن ل دژی هێزێن مه یێن گه‌ریلا. یێن کو بکارانینا چه‌کێن کیمیاوی ژ ئالیێ رژێما فاشیست ڤه شه‌رمه‌زار ناکن، فیدائیێن کو ژ بۆ پاراستنا نرخ و گه‌لێ کورد خوه فیدا دکن ب زمانێ دژمن شه‌رمه‌زار دکن. هه‌ڤرێیێن مه یێن کو ژ بۆ پێشیێ ل قرکرنا گه‌لێ کورد بگرن خوه فیدا دکن، نرخێن مه یێن هه‌ری پیرۆزن. یێن کو زماندرێژیێ ل ڤان بهایان دکن، دڤێ زانبن کو نه گه‌لێ مه یێ وه‌لاتپارێز نه ژی حه‌قیقه‌تا فیدایێن مه ته‌مسیل ناکن.”
داویا داخوویانیێ دا هەپەگە دده خویاکرن کو، دێ ئێریشێن وان یێن ب ڤی جوره‌یی به‌رده‌وامبن. هەپەگە دبێژه: “هه‌تا کو ئێشکه‌نجه‌یا ل ده‌رڤه‌یی مرۆڤاهیێ یا رژێما فاشیست یا ئاکەپ-مەهەپێ یا ل سه‌ر زیندانان ده‌وام بکه، هه‌تا کو قرکه‌ریا ل سه‌ر گه‌لێ مه و بکارانینا چه‌کێن کیمیاوی یێن ل دژی گه‌ریلا نه‌سه‌کنه، چالاکیێن مه یێن ب ڤی ره‌نگی دێ ده‌وام بکن.
نها یا گرینگ ئه‌وه کو ،گه‌لۆ دێ هەدەپە یان ژی ده‌مرتاش به‌رسڤا ڤێ داخوویانیێ بدن یان دێ بێ ده‌نگ بمینن و مریدیا خوه به‌رده‌وام بکن. هەدەپە و دەمرتاش دبێژن ئه‌م ل دژی شده‌تێنه ،هەپەگە دبێژه دێ چالاکیێن مه به‌رده‌وام بن. مژارا ره‌وشا هەدەپێ و پەکەکێ مژاره‌ک یا مناقه‌شێ یه. ئه‌ڤ بوویه‌ر دبه دەلیڤەک نوو ژ بۆ هەدەپێ کو ل سەر هه‌لوه‌ستا خوه به‌رده‌وام به یان نا.
پێدڤیە هه‌ر ئالیه‌ک کورد کو ل باکورێ کوردستانێ سیاسه‌تێ دکن، چەوا ئێریشه‌ک یا ده‌زگه‌هێن ده‌وله‌تێ ل هەمبه‌ر خه‌لکه‌کی شه‌رمه‌زار دکن، دڤێ بکاربن ئێریشێن پەکەکێ ژی یێن ل هەمبه‌ر خه‌لکه‌کی شه‌رمه‌زار بکن. چه‌وا ل دژێ شده‌تا ده‌وله‌تێ ده‌ردکه‌ڤن لازمە جه‌ساره‌ت بکن ل دژی شده‌تا پەکەکێ ژی ده‌رکه‌ڤن.
هه‌تا کو سیاستا ئاشکەرا ل سەر بنگەهێ ده‌مۆکراتیک تەڤنەگەرە و رێیا دیالۆگێ ڤه‌کری نه‌هێله چو جارا سیاسه‌ته‌ک پاقژ نایێ رێڤه‌برن. هه‌تا سیاسه‌ته‌ک ڤه‌شارتی هه‌به دێ هه‌ر ده‌می بازارێن قرێژ د رۆژه‌ڤێ دا بن .
