حكومەتا نوو و مزگینیا سەرخوەبوونا كوردستانێ
نڤیسین: بوبێ ئه‌سه‌ر
پارله‌مه‌نا کوردستانێ د ڕۆژا 2019.05.28 ێ دا سه‌رۆکێ هه‌رێما کوردستانێ ب پرانیا ده‌نگان و ب ئاوایه‌کی ده‌مۆکراتیک هلبژارت. ڤێ هلبژارتنێ ب ڕه‌نگ و ده‌نگێ خوه، چ د ناڤ کوردان و چ ژی د قادا ناڤنه‌ته‌وه‌یی دا ده‌نگه‌کێ هێژا، ده‌لال ده‌رخست و بایێ ده‌مۆکراسیێ چ ل کوردستانێ و چ ژی ل جیهانێ وه‌شاند.
چ ده‌ما کورد ئیمکان، ڕێ و ڕێبازێن خه‌باتێ ببینن، دکارن گه‌له‌ک تشتێن هێژا و ده‌لال ژی بکن. دکارن ده‌مۆکراسیا کو هندەك ده‌وله‌تێن قاشۆ ب سالان سال ده‌وله‌تن ژی لێ ھێشتا ژی فێری ده‌مۆکراسی نه‌بوونه، کورد نها وان ژی فێر دکه و دده زانین كا ده‌مۆکراسی ژ بۆنا ڕێڤه‌به‌ریا وه‌لاته‌کی چقاس هێژا یه.
بفکرن کو هێشتا ژی کوردستان د قادا ناڤنه‌ته‌وه‌یی دا وه‌که ده‌وله‌ته‌کا سه‌ربخوه نه‌هاتیه ناسین. ل گۆر ڤێ ژی ده‌ما ئه‌م بالا خوه ددنێ، ب ڤی حالێ خوه ژی وه‌که ب سالان سال ده‌وله‌ت به کار دکه.
چ د وارێ ده‌مۆکراسیێ دا، چ د وارێ ئیجاتێن نوو دا، چ د وارێ سپۆرێ (وه‌رزش) دا و چ ژی د قادا خه‌بات و خوه‌دی ل وه‌لاتێ خوه ده‌رکه‌تنێ دا کورد هه‌ر ل پێشن.
ئه‌ڤانا مزگینیا سبه‌رۆژه‌کا کوردستانه‌کا ب هێز و قوه‌ت دده مه کوردان. هه‌لبه‌ت وێ هندەك تشتێن نه خوه‌ش ژی ده‌رکه‌ڤن، ئه‌و ژی گرێدایی داگیرکه‌رانه. ژ بۆنا کورد ئارامیێ نه‌بینن، ژ بۆنا کورد نه‌بن خوه‌دیێ وه‌لاتێ خوه چ ژ ده‌ستێن وان تێ ته‌خسیر ناکن.
ل گۆر ڤان زانیاریان و ب سه‌ر ڤان حالان دا ژی ل باشوورێ کوردستانێ، ڕێڤه‌برێن مه یێن وێرێ ل سه‌ر خه‌ت و ڕێبازا بارزانیێ مه‌زن کارێ خوه دکن، هه‌ر چقاس هندەك ئاسته‌نگی ده‌رکه‌ڤن ژی لێ تالیا تالی دێ سه‌رکه‌تن یا گه‌لێ مه ل باشوورێ کوردستانێ و وێ ڕێبازا پیرۆز به.
من گه‌له‌ک جاران گۆتیە و دیسا دبێژن؛ هه‌گه‌ر نه ئه‌و ڕێباز با، ب ده‌ستێن خوه‌فرۆش و جاشان نها کوردستان هه‌می هاتبوو فرۆتن و وێ کورد هه‌ر کۆله بمانا. لێ یێن کوردان ژ کۆله‌تیێ ئازاد بکه ته‌نها ئه‌ڤ ڕێبازا پیرۆزه…
ئه‌م باش دزانین کو د ڕێبازا بارزانیێ نه‌مردا، خالا هه‌ری گرینگ خالا ده‌مۆکراسیێ و ڕێڤه‌برنا وه‌لات ل سه‌ر ڤێ تێ مه‌شاندنێ یه. له‌ورا هندەك ڕێخستنێن باشوورێ کوردستانێ ژ ڤێ ده‌مۆکراسیا ل گۆر ڕێبازێ هاتیه هوناندن، هندەك خه‌رابیان دکن و دخوازن وێ وه‌که کاره‌کی ده‌مۆکراتیک ئه ڕێ بدن.
ل گۆر ڤێ ڕێبازێ دڤێ ل باشوور چ ببه ئان بێ کرن؟
مه دیت کو پشتی هلبژارتنا سالا 2018 ێ هه‌تا ده‌مه‌ک درێژ یەكێتیا نشتمانیا كوردستانێ (ینک) یا کو ئیرۆ که‌تیه ناڤده‌ستێ ئیرانێ نه دخوه‌ستن سه‌رۆکێ هه‌رێما کوردستانێ هلبژێرن دا کو کارێ به‌رب سه‌رخوه‌بوونێ ڤە نه‌که‌ڤه ڕێ. ژ خوه وان ب وێ هه‌لوه‌ستا خوه، ده‌نگێ خوه ب کار نه‌ئانین و دیار کرن کو ئێدی ئه‌و بوونه ڕێگر.
لێ دیسا ب ئاوه‌یه‌کی ده‌مۆکراتیک پارله‌مه‌نا کوردستانێ سه‌رۆکێ هه‌رێما کوردستانێ ڕێزدار نێچیرڤان بارزانی هلبژارتن. نها کار مایه کو پارله‌مه‌ن بجڤه و ڕێزێدار نێچیرڤان ژ بۆنا دامه‌زراندنا حوکومه‌تا نوو ئه‌رک و وەزیفێ بده ڕێزدار مه‌سروور بارزانی.
پشتی ده‌ستنیشانکرنا وی ئه‌رکێ ژی دڤێ ڕێزدار مه‌سروور بارزانی ده‌ستێن خوه زوو بگره، ل به‌ندا فه‌ن، فووت و ئاسته‌نگێن ینک نه‌سه‌کنه. حوکومه‌تا خوه دامه‌زرینه، وه‌زیرێن خوه ده‌ستنیشان بکه و ژ بۆنا کوردستانه‌کا سه‌ربخوه و ئاڤادانا کوردستانێ ده‌ست ب کارێ خوه بکه.
هه‌لبه‌ت ئاسته‌نگی پرن. پێشی ل کارێ کوردستانه‌کا سه‌ربخوه گرتنێ هه‌بوو، وێ هه‌به. لێ بارزانیان هه‌تا نها گه‌له‌ک قۆناغێن زۆر ده‌رباس کرنه. ل هه‌مبه‌ر هه‌می خوه‌فرۆش، جاشان ته‌کۆشین دانه و ددن. لۆما وان ب ڤێ که‌د و جاهدێن خوه ئه‌م ئانینه ڤێ مه‌رحه‌له‌یا ئیرۆ کو کوردستانه‌کا سه‌رب خوه نێزیک بوو یه.
نها هه‌می کوردێن جیهانێ چاڤ ل ڕێیا کوردستانه‌کا سه‌رب خوه نه. دخوازن ب گوهێن خوه وی ده‌نگێ سه‌رخوه‌بوونێ ببیهیزن. ل گۆر مه‌ژییێ ل سه‌ر ڕێبازا بارزانی ببن خوه‌دی ده‌وله‌تا خوه.
ژ به‌ر ڤێ یه دڤێ زووترین کات پارله‌مه‌نا کوردستانێ بجڤه و سه‌رۆکێ هه‌رێما کوردستانێ ڕێزدار نێچیرڤان بارزانی ئه‌رکێ ده‌ستنیشانکرنا حوکومه‌تا نوو بده ڕێزدار مه‌سروور بارزانی دا کو ئه‌و ژی کارێ خوه بکه.
هه‌گه‌ر ینک بکه‌ڤه حوکومه‌تێ باشه، لێ هه‌گه‌ر نه‌که‌تنێ و دیسا بخوازن ئاسته‌نگیان ده‌رخن دڤێ ئێدی ل به‌ندا وان نه‌یێ سه‌کناندن. ژ به‌ر کو ئێدی وێ پر ب زه‌لالی ئه‌شکه‌ره ببه کو ئه‌ڤ هه‌لوه‌ست نه یا ینک یا ئیرانێ ب خوه یه کو ل سه‌ر ینک فه‌رز دکن کو حوکومه‌تا کوردستانێ نه‌یێ دامه‌زراندنێ
ئه‌م کورد ل باشوورێ کوردستانێ گهانە قۆناغا ده‌وله‌تبوونێ. له‌ورا ژی هه‌می داگیرکه‌رێن مه ل سه‌ر کارن کو ئه‌ڤ نه‌به. دڤێ ئه‌م کورد ژی ب هه‌می هێز و قوه‌تێن خوه ژ بۆنا حوکومه‌ته‌کا ب هێزتر، ژ بۆنا سه‌رۆکوه‌زیره‌کێ ب قوه‌ت کار بکن، هه‌یه
تێبنی: ئه‌ز جه‌ژنا ڕەمازانێ ل هه‌می کوردێن مسلمان پیرۆز دکم. ب هێڤیا کو ئێدی ئۆلدارێن مه ژی ژ بۆنا کوردستانه‌کا سه‌ربخوه به‌رپرسیاریێ هلگرن سه‌ر ملێن خوه. دڤێ ئه‌م ژ بیر نه‌کن کو ئۆلدارێن هه‌ر مله‌ته‌کی ژ بۆنا گه‌لێ خوه کار دکن…
2019.06.02
