چالاکڤان: مووسا خالد /دهوك
پرۆسەیا ئاشتییێ د دەمەکێ دایە کو رۆژهەلاتا ناڤین د قۆناغەکا هەستیار دا دەرباز دبیت، هەبوونا شەرێ 12 رۆژی د ناڤبەرا وەلاتێ ئێسرائیل و ئێرانێ دا، رۆژهەلاتا ناڤین د گوهۆڕینان دایە و هەلبەت ترکیا ژی بەشەكە ژ ڤێ پرۆسەیێ تایبەت بەرامبەری کوردێن باکور و ترکیا ژ هەمی ئالییان ڤە دخوازیت هەمی بزاڤان بۆ سەرخستنا ئاشتییێ بکەت. ئەڤ و سەرکەڤتنا ئاشتییێ دێ خزمەتا تورکیا و هەمی دەڤەرێ و ئالییان بکەت.
ل دووڤ بانگەوازا عەبدوللا ئۆجالانی و بجهئینانا بڕیارێن کۆنگرەیێ ١٢ یێ پارتییا کارکەرێن کوردستانێ ( پەکەکە)، پرۆسەیا چەکدانانا ئێکەم گرۆپێ پەکەکێ ل شکەفتا جاسەنە ل سنۆرێ پارێزگەها سلێمانییێ کو، جۆرێ چەکێ وان ژ کلاشنیکۆف، بیکەیسی، ئارپێچی و نیشانشکێنان پێکدهات، سۆتن وەك نیازپاقژیەك بۆ پرۆسەیا ئاشتییێ بەرامبەر ترکیا، ئەڤ چەکدانانە گاڤەکا دیرۆکییە بۆ دەستپێکرنا قویناغەکا نوو ل باکورێ کوردستانێ و تورکیا.
فەرە ئەڤ پێنگاڤە ببیتە دەستپێکا قۆناغەکا نوو ژ بۆ ئاساییکرنا پەیوەندییێن د ناڤبەرا هەمی ئالییان دا و ژ روویێ ئەمنی و ئابوری ڤە کارتێکرنەکا ئێکسەر ل سەر بهێزکرنا سەقامگیرییا دەڤەرێ هەبیت بۆ ئاسویەکێ نوو و کێمکرنا شەڕ و ئالۆزییان و ڤەکرنا لاپەرەیەکێ نوو. چەکدانانا پەکەکێ پێشهاتەکا گرنگە و پشکداربوون د دویماهیئینانا توندوتیژی و ڤەکرنا ئاسۆیەکێ نوو بۆ گیانێ لێکتێگەهشتن و پێکڤەژیانا ئاشتییانە ل دەڤەرێ و ترکیا بەرقەرار کەت.
ئەز وەسا نابینم پەكەكە بدانانا سیهـ كلاشنیكۆفان سەردا بچیت، ئێکەم مەرجێ پەکەکێ ئازادکرنا رێبەرێ وێ عەبدوللا ئۆجەلانە و پەکەکێ بڕیاردایە ب رێکا سیاسەتێ و دیالۆگێ پڕسا کورد ل ترکیا چارەسەر بکەت ل دووڤ دا پەكەكە دێ پێنگاڤێن دی جێبەجێکەت. ئۆجەلان دێ شێت بڕیارا چارەنڤێسێ پەكەكێ بدەت چونکە ژ هەمی کەسێن دی زێدەتر گەلێ تركیا ناسدکەت و گەلەک ب عەقلانە پێنگاڤان بۆ ڤێ پرۆسەیا ئاشتییێ دگەل تركیا دهاڤێژیت.
ژ بۆنا کو پرسا کوردی ب ڕێکێن ئاشتییێ بەرەڤ پێشڤە بچیت باشترین رێك بۆ وەلاتێ ترکیا سیاسەتەکا دیموکراسی بەرامبەری کوردان جێبەجێ بکەت، وەك :
1-ترکیا یا دەستپێشخەر بت و بەرسڤا ئۆجەلان بدەت و ب ئاشکرایی وی ژ زیندانێ ئازاد بکەت و دانوستاندنان لەگەل دەستپێبکەت .
2- ترکیا لێبورینا گشتی دەربخیت بۆ پەکەکێ و لایەنێن سیاسی یێن کورد و غەیری کورد، دیالۆگا نیشتیمانی فراوانتر دەستپێبکەت و دانپێدانێ ب مافێ گەلی كورد بکەت و نەتەوەیێ کورد ل ترکیا وەك دوەم نەتەوە بهێتە قەبیلکرن.
3-چەسپاندنا ئاشتییێ و بنەمایێن دیموکراتیێ ل ترکیا، پێدڤیە ترکیا ب رێکا پەرلەمانی و ب دانووستاندن دگەل لایەنێن سیاسی یێن ئۆپۆزسیۆنێ و لایەنێ سیاسی یێ کوردی، بۆ گوهۆڕینا دەستووری و پرۆژەی چارەسەریێ و دەستەڤەئینانا مافێن مەدەنی و سیاسی ل ترکیا پێنگاڤین جدی پاڤێژیت.
4-ئەڤ پێنگاڤە ژ روویێ سیاسی، ئابووری، چڤاکی، سەربازی و ئەمنی ڤە دێ مفایی گەهینینتە ترکیا و دێ بیتە ئەگەرێ سەقامگیریا ناڤچەیێ و ئاشتیا هەرێمی .
جارێ ئەڤە دەستپێکە ئەگەر ئەنجام نەبوون و ترکیا پێشێلکاری کر ئەڤە دێ بیتە جورە دەستکەفتەك بۆ پەکەکێ و رەنگە ناڤێ وێ ژ لیستا تیرۆرێ بهێتە دەرخستن و دێ ترکیا بەرامبەری وەلاتێن ناڤدەولەتی و جیهانێ شەرمزار بیت و ئاڵۆزیێن وێ دێ زێدەتر بن.
تایبەتی سەرۆک بارزانی ژ بۆنا دەستپێکرنا پروسەیا ئاشتییێ ل ترکیا و باکورێ کوردستانێ رۆلەک مەزن گێرایە. پەکەکە و ئالییێن پەیوندیدار رۆلا سەرۆک بارزانی بۆ چارەسەرکرنا پرسا کوردی ل باکورێ کوردستانێ ب باشی دنرخینن کو خزمەتەکا مەزن یا ئەنجام دای، ئۆجەلان ژی گەهشتیە ئەوێ باوەڕەیێ کو شەڕێ چەکداری یێ چەند سالانە د ناڤبەرا پەکەکێ و ترکیا دا هەیە مفا بۆ هیچ لایەکێ نەبوویە و نابیت.
چاڤێ جیهانێ هەمیێ ل ئەردۆگانی یە و ” تەپە ” د مەیدانا تورکیا دایە. د سیاسەتێ دا هەر تشتەک قابلی گوهۆرینێ یە، هێڤیدارین پرسا کوردی ل تورکیا ب ڕێکا دیالۆگێ بهێتە چارەسەکرن و هەردولا ب مافێن خوە شاد ببن. ئەڤا چەند رۆژان ڕوودایی پێنگەڤەکا مەزن بوو، لێ ئاشتی ب تنێ ئێك لایەنێ ناهێتە ئاڤاکرن بەلکۆ یا پێویستە هەردو لایەن کاری ل سەر بکەن
