چما بارزانی و دیسا بارزانی

ده‌ما ئه‌م ل ته‌ڤگه‌را ئازادیخواز یا بارزانیان دنێرن و دخوینن ئەم دبینن کو ژ بۆنا به‌رده‌وامیا شۆره‌شا کوردستانێ ئەو هەرتم د ناڤا خەبات و هه‌ولدانان دا بوونه‌. ژ بۆنا کو که‌دا، ته‌کۆشین، به‌رخوه‌دان و سه‌رهلدانێن وان یێن ل دژی داگیرکه‌ران تێکنەچن ئەو هەر تم ب حازری، ئارامی و ب ئاقلانه‌ ته‌ڤگه‌ریا نه‌.

د ته‌ڤگه‌رێن هه‌ر چار پارچەیێن کوردستانێ دا چو که‌س و رێخستنان وه‌کی بارزانیان دۆست و دژمنێ خوه‌ ناسنه‌کرنه‌. له‌ورا ژی وان هەرتم ل سه‌ر ڤی ئەساسی ب ناسکرنا دۆست و دژمانێن خوه‌ کارێ خوه‌ هه‌تا نها مه‌شاندنه‌ و وێ ژ نها و پێدا ژی بدۆمینن.

من خوه‌ست بێژم کو دڤێ کورد ب ته‌ڤگه‌ر و پارتیێن خوه‌ ڤە، ب ده‌هان جاران دیرۆکا بارزانیا بخوینن و ببینن کا وان چاوا هه‌تا رۆژا ئیرۆ دەست ژ ته‌کۆشینا ئازادیا کوردستانێ به‌رنه‌دانه‌ و چاوا کورد ل باشوورێ کوردستانێ کرن خوه‌دی فه‌ده‌رالی کو سبێ ئه‌و دێ ببه‌ ده‌وله‌ته‌کا سه‌ربخوه‌ ژی.
پشتی سالێن ۱۹۰۰ ته‌ڤگه‌ر و رێڤه‌بریا وان ب دو که‌س و که‌سایه‌تیان هاتیه‌ ب رێڤه‌برنێ. د ده‌ما خوه‌ دا نه‌مران شێخ ئه‌حمه‌د و مسته‌فا بارزانی بوون کو ژ بۆنا ئازادی و سه‌رخوه‌بوونا کوردستانێ ته‌ڤگه‌ر ب رێڤه‌ دبرن.

د ناڤا وێ ته‌ڤگه‌ر و خەباتێ دا وان هه‌ر هزر دکر کو رۆژه‌کێ ئه‌و دێ کۆچاداوی بکن دێ کی شوونا وان بگه‌ره‌ دا کو ته‌ڤگه‌ر و خەبات بەردەوام بە. لۆما ژی ب حازری و ناسینا بارزانیێ نه‌مر هه‌ر وی دو که‌س ده‌ستنیشان کرن کو پشتی وی ته‌ڤگه‌رێ برێڤه‌ ببن. یه‌ک ژ وان نه‌مر ئیدریس بارزانی و یێ دن ژی رێزدار مه‌سعود بارزانی بوون. له‌ورا پشتی کۆجکرنا نه‌مر بارزانی، ته‌ڤگه‌ر و به‌رخوه‌دانا مله‌تێ کورد یا ب سه‌رپه‌رشتیا بارزانیان نه‌سه‌کنی ل خوه‌ نه‌ حه‌یرین و رێزدار مه‌سعود بارزانی کرن سه‌رۆکێ پارتیێ و رێڤه‌برێ ته‌ڤگه‌را ئازادیخواز.

لێ هه‌ر چقاسی رێزدار مەسعود بارزانی سه‌رۆک بوو، لێ هەردەم ئه‌و و نه‌مر ئیدریس بارزانی ل گه‌ل هه‌ڤ و ب یه‌ک بریارێ کارێ خوه‌ دمه‌شاندن. پشتی کۆچکرنا نه‌مر ئیدریس بارزانی. ئێدی بارێ گران مابوو ل سه‌ر پشتا رێزدار مه‌سعود بارزانی کو ئه‌و ژی که‌سایه‌تیه‌کی ب هه‌لوه‌ست و گۆتنێن خوه‌ بوویه‌ که‌سایه‌تیه‌کی ناڤنه‌ته‌وه‌یی.

هه‌ر بارزانیان حازری کرن کو پشتی رێزدار مه‌سعود بارزانی ژی ڤالاهی د ته‌ڤگه‌را ئازادیخواز و سه‌رخوه‌بوونخوازا یا گه‌لێ کورد دا نه‌به‌، وان د ناڤا خوه‌ دا ڤێ جارێ ژی رێزدار نێجیرڤان و مه‌سروور بارزانی حازر کرن کو پارتی و ته‌ڤگه‌را وان بەردەوام بکن.

ژ به‌ر کو بارزانیان دیرۆکا خوه‌ و یا گه‌لێ کورد باش دزانن و دزانن چ ده‌ما سه‌رۆکاتیا گه‌لێ کورد تێک چوو یه‌، ته‌ڤگه‌را ئازادیخواز نه‌مایه‌. لۆما ژ بۆنا گه‌لێ کورد بێ سه‌رۆکاتی نه‌مینه‌ و ته‌ڤگه‌رێن وان تێکنەچن، وان ژ رۆژا ئه‌ول دا ئه‌ڤ یه‌کا دزانیبوون و ل گۆر وێ ژی ب حازری کارێ خوه‌ مه‌شاندنه‌ و ددۆمینن.

لێ نها ئه‌م بالا خوه‌ ددنێ کو بارزانیان هه‌ر ئه‌ڤ یه‌کا کرنه‌ و دکن. لۆما ژی که‌د، به‌رخوه‌دان و سه‌رهلدانێن وان ب ئاڤێ دا نه‌ چوو ئیرۆ ئه‌م کورد ل باشوورێ کوردستانێ کرنه‌ خوه‌دی ده‌وله‌ته‌که‌ فه‌ده‌ره‌ل.

بارزانی دزانن کو ژ بۆنا کوردستانه‌کا سه‌ربخوه‌ وێ ده‌م و وه‌خت زێده‌ درێژ بە، لۆما هێ ژی کارێ خوه‌ یێن بکاربن ل دوو هه‌ردو رێزداران بدۆمینه‌ ژ نها ده‌ حازریا خوه‌ دکن. ژ به‌ر ڤێ ژی ژ نها دا ئه‌و هێژا ئیدریس نچیرڤان بارزانی و ئارین مه‌سروور بارزانی، حازر دکن کو سبێ کورد و پارتی بێ سه‌رۆک نه‌مینن.

گه‌لۆ د کیژان ته‌ڤگه‌ر و پارتیێن باکورێ کوردستانێ دا ئه‌ڤ سیسته‌م هه‌یه‌؟ نینە. ژ به‌ر کو پشتی ۱۹۸۰ێ ئێدی مرۆڤ و زارۆکێن سه‌رۆکێن ته‌ڤگه‌رێن باکورێ کوردستانێ ب خوه‌ ژی نه‌ ل گه‌ل باڤێ خوه‌ نه‌. ده‌ما تو نکاربه‌ زارۆکێن خوه‌ بخه‌ ناڤا کارێ سیاسی گه‌لۆ تێ چاوا بکاربه‌ زارۆکێن خه‌لکێ ژ وان بخوازی؟ باش تێ زانین کو بێ جوانان، چو وه‌لات نکاره‌ ئازادیا خوه‌ ب ده‌ست بخه‌. هه‌ر چقاسی ئه‌ڤ تێ زانین ژی لێ یێن مه‌، زارۆکێن خوه‌ دوور و خوه‌ ژی وه‌که‌ نوور دخن ناڤا پارتی و ته‌ڤگه‌رێن باکورێ کوردستانێ. ئه‌و ژی و ئه‌م ژی دزانن کو ته‌نێ ب سالمه‌زنان چو وه‌لات نکاره‌ ئازادیا خوه‌ ب ده‌ست بخه‌.

ب ڤێ موناسه‌به‌تێ ئه‌ز ٦۰ سالیا پێشمه‌رگه‌بوونا سه‌رۆکێ کوردستانێ رێزدار مه‌سعود بارزانی پیرۆز دکم و ژ وی را ته‌مه‌نه‌کی درێژ دخوازم. ب هێڤیا کو ئه‌و دێ سه‌رخوه‌بوونا کوردستانێ وه‌که‌ مزگینیه‌کێ بده‌ گه‌لێ خوه‌.