نڤیسین: بوبێ ئەسەر
من گه‌له‌ک جاران گۆتیه، ئه‌ز دێ ھەر دبێژم، ژ به‌ر ڤێ ئەز دخوازم دیسا بێژم و گۆتنا داوی د پێشیێ دا ڤه‌بێژم، دا کو هندەك که‌س خوه نه‌وه‌ستینن و هه‌تا دیماھیكێ ڤێ نڤیسێ نه‌خوینن…
من ھەر گۆتیه کو د رۆژا ئیرۆ دا یێن ژ بۆنا مه کوردان دکارن یان بکاربن کوردستانه‌کا ئازاد و سه‌ربخوه راگەهینن، ته‌نها بارزانی نه.
چما؟
دڤێ ئه‌م جاره‌کێ، بێلایەن ل ره‌وشا کوردستانێ ژ رۆژا هاتیه پا‌رچه‌کرن و هه‌تا نها بنێرن، بنێرن هوون دێ بینن کو شۆپا خەباتا بارزانیان ل سه‌ر عه‌ردێ هه‌ر چار پارچەیێن کوردستانێ هه‌یه و ب ره‌هه‌تی دھێتە دیتن.
ئه‌م دزانن و دخوینن کو رۆژا بارزانیان ده‌ست ب ته‌کۆشینا ئازادیا کوردستانێ کر، ژ بۆنا خوه و ژ بۆنا مله‌تێ خوه ده‌ستوور و رێبازەك نەتەوەیی دانان و وان ل سەر وێ رێبازا نەتەوەیی دەست ب ته‌کۆشینا ئازادی و سه‌رخوه‌بوونا کوردستانێ كر.
چ بوو ئه‌و؟
ئه‌و ده‌ستوور و به‌رنامه‌یا نه‌ته‌وه‌یی ل سه‌ر ئەساسێ به‌رژه‌وه‌ندیا گه‌لێ کورد بوو. لۆما ب رێزێن زێرین ل سه‌ر کاخزا سپی نه‌خشاندن کو دڤێ کورد ل گۆر وێ ته‌ڤبگه‌رن دا کو بکاربن بگەهژن مافێ خوه یێ ره‌وا.
ئه‌و ده‌ستوور، به‌رنامه و رێبازا بارزانیان نڤیسیبوون و پێشکێشی گه‌لێ خوه کربوون، ب دلێ داگیركەران نەبوو. له‌ورا ژ بۆنا تێکبرنا وێ ھەردەم هه‌ر چار داگیرکه‌رێن مه، ژ بۆنا نەھێلانا وێ رێبازا کو تێ دا کوردستانه‌کا سه‌ربخوه خویا دکر، ژ هۆلێ راکن، کار و خه‌بات ب هه‌ڤرا دکرن و هێشتا ژی دکن.
داگیرکه‌ر نه به‌س بوون، وان هندەك خوه‌فرۆش و به‌رژه‌وه‌ندیپه‌ره‌ستێن کورد ژی کرین و ئه‌و ژی به‌را پێخلا بارزانیان دان، ئه‌و ب کار ئانین و دئینن.
ئه‌م هه‌می باش دزانن و ب وێ یه‌کێ باوه‌رن کو داگیرکه‌رێن مه د وێ خه‌ونێ دا بوون و دا‌نه کو چ ده‌ما بارزانی نه‌مینێن دێ دۆزا گه‌لێ کورد و کوردستانێ ژی نه‌مینه. داگیرکه‌رێن مه د ڤێ دیتن و هه‌لوه‌ستا خوه دا راستن و راست بوون.
هه‌گه‌ر ئه‌م ل دیرۆکێ بنێرن ئه‌م دێ ببینن کو ژ بۆنا ژناڤبرنا بارزانیان ھەرگاڤ ژی پیلان و پرۆژه‌یێن داگیرکه‌رێن مه یێن هه‌ڤبه‌ش هه‌بوون و هه‌نه.
لێ ده‌ردێ گران، برینا بێ ده‌رمان ئه‌وه کو کورد نه دیرۆکا خوه دزانن و نه خوه فێر دکن، نه ژی دخوازن فێر ببن.
ژ به‌ر ڤێ ئەز دبێژم؛ هه‌گه‌ر کوردان دیرۆکا خوە زانیبا و ناسیبا ئیرۆ دێ هه‌می کوردان خوه ل دۆر بارزانیان كربانە یه‌ک دا کو ب رێڤەبەریا وان ئه‌م کورد ژی ببانا خوه‌دی ده‌وله‌ت و ل ئاخا خوه ب ئازادی ژیابان. هه‌لبه‌ت دێ ئه‌ڤ ببه. لێ.
هه‌زار مخابن کورد د ڤی واری دا فێمکۆرن. که‌ڕ و لالن. پرانیا کوردان ژی ب چاند، فکر و رامانێن دژمنێن دخوازن کوردان ژ هۆلێ راکن، مه‌زن بوونه ئان په‌روه‌رده‌یا خوه یا ئه‌ول ژ ور گرتنه.
ب سه‌دان سالن کو کورد ده‌ردێ بێ ده‌وه‌له‌تبوونێ دکێشن. لێ دیسا ل خوه های نابن. مله‌تێ دیرۆکا خوه فێر نه‌بە و نزانە، دێ چ جاران نکاربە خوه ب ره‌هه‌تی ئازاد بکه.
ئیرۆ شانسا کوردان ژ هه‌ر ده‌مێ زێده‌تر هه‌یه کو ل باشوورێ کوردستانێ ببه ده‌وله‌ت. ل ور هه‌ما بێژن ئێدی سه‌رێ ده‌وله‌تا کوردی خویا دبه.
لۆما داگیرکه‌رێن مه هار بوونه، هه‌ر یه‌ک ژ ئالیکی ڤە ئێریشێن خوه یێن بێ واته دبن سه‌ر وێ هه‌بوونا کو دێ کوردان بکه خوه‌دی ده‌وله‌ت.
ئه‌ڤ نه به‌سه، داگیرکه‌رێن مه ھندەك پارتیان دكن سه‌ده‌ما ئێریشێن خوه، دا کو د قادا ناڤنه‌ته‌وه‌یی دا خوه ب هه‌ق ده‌ربێخن. لێ دیسا ژی ئەو کوردێن د خزمه‌تا داگیرکه‌ران دا نه، ب لڤ و تەڤگەرێن خوه، داگیرکه‌ران دکێشن ناڤا ئاخا ئازاد.
چاره‌سه‌ری؟
ته‌نها چاره‌سه‌ری، ل گۆر من، رابوونا گه‌لێ کورد یێن ل په‌رچێن دیه. لێ مخابن داگیرکه‌رێن مه کوردێن باکورێ کوردستانێ هه‌می خه‌ساندنه لۆما نکارن ده‌نگ ژ خوه ده‌رخن.
د ڤێ ره‌وشا خه‌ته‌ر دا، هێشتا ژی هندەك پارتی و رێخستنێن کوردان ل سه‌ر ناڤێ وان، بێده‌نگن. ما گه‌لۆ دێ ژ ڤێ خه‌رابتر چ هه‌به و چ ببە. ئه‌و پارتیێن ب ئارمانجا کوردستانه‌کا سه‌ربخوه ده‌رکه‌تنه، لێ ئیرۆ ل هه‌مبه‌ر ئێریشکاریا داگیرکه‌ران یا ل سه‌ر برایێ وان، بێ ده‌نگن.
هه‌گه‌ر ئه‌م وه‌که کورد دلخوازێ کوردستانه‌کا ئازاد و سه‌ربخوه‌نه، دڤێ ئه‌م وێ چه‌رخا د ده‌ستێ داگیرکه‌ران یا ژ بۆنا دژایتكرنا بارزانیان ژ هۆلێ راکن، بشکینن. دڤێ ئه‌م ب هه‌می هێز و قوەتا خوه ژ بارزانیان را ببن پشتەڤان.
هه‌گه‌ر ئه‌م ڤێ نه‌کن، ئه‌م دێ نکاربن چ کوردستانه‌کا ئازاد و سه‌ربخوه راگەهینن و ببینن. داگیرکه‌رێن مه رۆژ ب رۆژ دکه‌ڤن عه‌ردێ پیرۆز و ئازاد. هه‌ڤالبه‌ندێن وان ژی هه‌ر وان گەرم دكن کو زووترین ده‌مێ ب هه‌ڤرا بارزانیان ژ هۆلێ راکن.
دڤێ هه‌ر کورد ڤێ باش بزانە؛ د رۆژا ئیرۆ دا،ژناڤبرنا بارزانیان وه‌نداکرنا هه‌ر چار پا‌رچێن کوردستانێ یه. لێ وێ دژمن چ جاران نه‌گەهژن ڤێ ئارمانجا خوه. ژ به‌ر کو هه‌تا زارۆکه‌ک بارزانیان ژی هه‌به، ئه‌و دێ ل هه‌مبه‌ر داگیرکه‌ران و وه‌لاتفرۆشان ل به‌رخوه بده.
بارزانی تێرا خوه هه‌نه ژ به‌ر کو ل سه‌ر خه‌تا نه‌ته‌وه‌یی نه. که‌سێن نه‌ته‌وه‌یی بن ژی وێ رۆژه‌کێ بگەهژن مافێ خوه یێ ره‌وا.
ژ به‌ر ڤێ د ده‌مه‌که نێزیک دا وێ بارزانی کوردان بکن خوه‌دی ده‌وله‌ته‌کا سه‌ربخوه. بلا قه‌ت ترس و شکا کوردێن ژ وه‌لاتێ خوه هه‌ز دکن، چێ نەبه.
ئاها ژ به‌ر ڤێ یه هه‌بوونا بارزانیان ئیرۆ گرنگه. ل گۆر ڤێ گرنگیێ ژی دڤێ کورد ته‌ڤبگه‌رن و پرسا ”چما بارزانی”بەرسڤ بدن. ژ به‌ر کو ئازادی و سه‌رخوه‌بوون د وێ ده‌ستوور و رێبازا وان دا یه…
2020.07.05
