نڤیسار

چما سیاسه‌ت ل باکورێ کوردستانێ قرێژ بوو یه‌

ئیرۆ پرانیا مه‌، ئه‌م دبێژن کو ل باکورێ کوردستانێ سیاسه‌ت قه‌دیا یه‌ یان ژی قرێژ بوو یه‌. ئه‌ز ب خوه‌ دبێژم؛ قرێژ بوویه‌. من 5 سال به‌رێ نڤیسه‌ک ب سه‌رناڤێ ”ل باکورێ کوردستانێ سیاسه‌ت قرێژ بوویه‌”. نڤیسیبوو.
نها چما دیسا دخوازم ل سه‌ر ڤێ ڕاوه‌ستم؟ ژ به‌ر کو ئێدی ل باکورێ کوردستانێ سیاسه‌ت ب ته‌مامی خه‌تمی یه‌. یێن ڤێ خه‌تماندنێ دکن و کرنه‌ پارتی و ڕێڤه‌برێن ته‌مه‌ن مه‌زن و نه‌ خوه‌ندەوارن.

هه‌لبه‌ت ئه‌ڤ پرسه‌ک و گونه‌هکاریه‌کا مه‌زنه‌ کو مرۆڤ وه‌ها بێژه‌. ده‌ما ته‌ ئه‌ڤ گۆت و نڤیساندن دێ هندەك ژ وان سیاسه‌تمه‌دارێن کو ئه‌ز دێ به‌هسا وان بکم دێ ”خوه‌ هلینن و ل ئه‌ردێ خن”. وێ ئێریش بکن، وێ گۆتنێن نه‌خوه‌ش بێژن. لێ خه‌م ناکه‌.
خه‌م ناکه‌ ژ به‌ر کو سیاسه‌تمه‌دارێن باکورێ کوردستانێ چ جاران ڕاستیا خوه‌، یا پارتی و هه‌ڤالێن خوه‌ نه‌دیتیه‌ و نه‌گۆتیه‌. ئەگەر دیتبن ژی ژ به‌ر هندەك ئەگەران چاڤێن خوه‌ ل سەر گرتنه‌.
نها هوون هه‌می دزانن کو سیاسه‌ت ب که‌سێن ڕاستی ژ سیاسه‌تێ فێم دکن، خوه‌ندەوار بن، خوه‌ پێگەھاندبن و زانا و که‌سێن ژیر بن دھێتە كرن. لێ مخابن سیاسه‌ت و ڕێڤه‌بەرێن پارتیان نها عه‌کسێ وێ یه‌.

به‌ری هه‌ر تشتی سیاسه‌ت ژ بیرۆکراتان، خوه‌ندەوار و بیره‌وران، دۆکتۆر، پارێزگه‌ر و ..ھتد ده‌ست پێ دکه‌. یێن به‌ری خه‌لکێ مه‌سه‌لێ فێم دکن و دزانن کو چه‌رخا سیاسی چاوا دگه‌ره‌ ئه‌ون. لۆما کارێ سیاسی ژی ژ وان ده‌ستپێ کری یه‌ و دکه‌. ده‌ما که‌سێن وه‌ها ده‌ست ب سیاسه‌تێ ژی دکن. ل گۆر ده‌مێ، ل گۆر به‌رژه‌وه‌ندیا گه‌لێ خوه‌ ده‌ستوور و به‌رنامه‌یان داتینن. ل گۆر ده‌ستوور و به‌رنامه‌یا خوه‌ ژی ئه‌ندامان په‌یدا دکه‌. کۆمیتان دادمه‌زرینه‌ و ده‌ست ب کار و خه‌باتێ دکن دا کو بکاربن وه‌لاتێ خوه‌ ئازاد بکن.

د ده‌ستپێکا ته‌ڤگه‌را باکورێ کوردستانێ دا ئه‌ڤ یه‌ک هه‌بوو و گه‌له‌ک خورت بوو. هه‌ر چقاسی مه‌ ژ زارۆکاتی و بێ ته‌جروبه‌یی ده‌ست ب کارێ سیاسی کر ژی، لێ دیسا ل گۆر ده‌مێ، که‌سێن بێ ته‌جروبه‌، ده‌ما ئه‌و باش نه‌هاتبانا ناسین و زانین نکاریبوون د کۆمیته‌یێن بلند دا جھ بگرتانا. ئه‌ڤ نه‌دهات وێ مانه‌یێ کو ئه‌و ژ یێن دن کێمتر ئان باشتر بوون. لێ ل گۆر زانین و تێگەهشتنا خوه‌، گه‌له‌کان ب خوه‌ ژی د کۆمیته‌یێن بلند دا جه نه‌دگرتن.
لۆما ژی ده‌ما ئه‌م ل سالێن 1960-1980 دنێرن دبینن کو ڕێڤه‌به‌رێن وێ ده‌مێ هه‌می ژ که‌سێن زانا، خوه‌ندەوار و بیرۆکراتان پێک هاتبوون.

له‌ورا ژی وان سیاسه‌ت ل گۆر ده‌م و ده‌ورێ، ل گۆر تێگەهشتنا ڕه‌وشا جیهانێ و وه‌لاتێ خوه‌ کارێ خوه‌ یێ سیاسی ب ڕێڤه‌ دبرن. د مه‌ژی و ئاقلێ که‌سان دا به‌رژه‌وه‌دیێن شه‌خسی و مالباتی نەبوون. ژ بۆنا یه‌ک ببا ڕێڤه‌بره‌کێ بلند ب ده‌هان پرتووک دخوه‌ندن. سه‌مینار، کۆنفه‌رانس ددان و ب که‌سێن دژبه‌ری خوه‌ هه‌ما بێژه‌ هه‌ر ڕۆژ د ناڤا موناقه‌شه‌یێن سیاسی دا بوون.

گه‌له‌ک ژ ڕێڤه‌برێن وێ ده‌مێ، خوه‌نده‌کارێن زانکۆیان، پارێزگه‌ر، مامۆستا، دۆکتۆر، موهه‌ندس و یێن وه‌که‌ وان بوو. د ناڤا ته‌ڤگه‌را کوردستانیان یا وێ ده‌مێ دا ته‌ یه‌کێ نه‌خوه‌ندەوار د ڕێڤه‌بەرتیا پارتیان دا نه‌ ددیت. ژ به‌ر کو هه‌رکه‌س ل گۆر زانین و تێگەهشتنا خوه‌ کار ل سه‌ر خوه‌ قه‌بوول کربوون و دکرن.

کا ئه‌م هنده‌کێ ل ڕه‌وشا ئیرۆ بنێرن.

ئیرۆ ئه‌م دبینن کو پرانیا ڕێڤه‌برێن پارتی و ده‌زگه‌هێن هه‌نه‌، گه‌له‌ک ژ وان، ژ که‌سێن نه‌خوه‌ندەوار و سالمه‌زنان پێک تێن. گه‌له‌ک ژ وان، د ده‌مێن خوه‌ ده‌ 3 پرتووک نه‌خوه‌ندنن. های و بایا گه‌له‌کان ژ ڕه‌وشا سیاسی یا جیهانێ و کوردستانێ نینە.
ب ئاوایه‌کی زانستی و ب باوه‌ریه‌کا تێگەهشتی کارێ خوه‌ ناکن. ناکن ژ به‌ر کو ئه‌و زانین و تێگەهشتنا وان تێری وی کاری ناکه‌. لۆما ژی کار هه‌تا درەكە دچە و ژێرێرێ و پێڤه‌ دسه‌کنه‌.

ئەگەرا ڤێ ژی یه‌ک ژ به‌ر وان که‌سێن سالمه‌زن، نه‌خوه‌ندەوار، نه‌زان و خوه‌دی ده‌ستهلاتن. لۆما یێن زانا و بیره‌ور خوه‌ ژ ڕێخستنێ دوور دخن. ژ به‌ر کو فێم دکن سه‌ری ب که‌سێن نه‌زان ڕه‌ نایێ کشاندن.

شه‌رت و مه‌رجێ رەوشا نھا وەسا لێھاتیە كو ئیرۆ یێن خوه‌دی په‌ره‌ بن، ئه‌وێن کو دبن ڕێڤه‌بر و زانین و تێگەهشتنا که‌سان ئێدی نەپیڤانن. ل گۆر ڕه‌وشا وان یا ئابۆری تێنه‌ ده‌ستنیشانکرن.
ده‌ما سه‌رۆکاتیا پارتیان که‌ته‌ ده‌ستێ، شڤان و گاڤانان ئه‌و ژی دێ ئه‌ندامێن خوه‌ وه‌ک وان ئاژالان بناسه‌ و بزانە و ل گۆر وێ دێ ڕێڤه‌بریا خوه‌ ل سه‌ر سه‌رێ وان بکه‌. ئه‌ڤ ژی تێ وێ واته‌یێ کو سیاسه‌ت دخه‌تمه‌ و ب ڕێڤه‌ ناچە.

ئاها ئیرۆ ڕه‌وشا مه‌ یا کوردێن باکورێ کوردستانێ ئه‌ڤه‌. هه‌گه‌ر هوون باوه‌ر ناکن، بلا هه‌ر ڕێخستن ل سه‌ر ڕێڤه‌برن خوه‌ لێکۆلینه‌کێ بکن دا کو ببینن ڕێڤه‌به‌ر پتر ژ که‌سێن چاوا پێک هاتنه‌.
ژ بۆنا ڕێخستنه‌کا پاک و ده‌لال دڤێ ڕێڤه‌بر، ژ که‌سێن خوه‌ندەوار، زانا و د مه‌سه‌لا سیاسی دا سه‌رده‌ست بن، پێک بھێت. وێ گاڤێ ئه‌م دێ گاڤ ب گاڤ نێزیکێ ئازادیا کوردستانێ ببن. هه‌تا ڕه‌وشا سیاسی یا ل باکورێ کوردستانێ وه‌که‌ یا من ل ژۆر گۆتی به‌، دێ چ پێشکه‌تن د ناڤا سیاسیێن مه‌ و سیاسه‌تا باکورێ کوردستانێ پێک نه‌ھێن.

بووبێ ئه‌سه‌ر
2020.0417

Back to top button