بۆچی یا گرنگە وەزارەتا ناڤخوە یا هەرێما کوردستانێ بۆ پارتی بیت؟
هەڤبەشیا دەسەڵاتێ ب گشتی و وەزارەتا سیادی و هەستیار (وەزارەتا سیادی وەکو وەزارەتا پێشمەرگەی پارێزگاریا ئاخ و نیشتمانی دکەت و وەزارەتێن هەستیار وەکو وەزارەتا ناڤخوەیی و وەزارەتا دارایی) د حکومەتا هەرێما کوردستانێ دا ل دووڤ رێکەفتنان دهێتە دابەشکرن. وەزارەتا ناڤخوە ئێکە ژ وەزارەتێن گرنگ و بدەستکەفتێن مەزن دهێتە دیارکرن بۆ پاراستنا هەڤسەنگیا سیاسی یا لایەنێن د هەرێمێ دا.
وەزارەتا ناڤخوە یا گرێدایە ب ئاسایش و کارگێری و خزمەتگوزاریێن راستەوخوە ب هاولاتیان ڤە، دەسەلاتەکا مەزن و کاریگەرا سیاسی و جەماوەری دبەخشیت، ژبەر ڤێ چەندێ بۆ پارتی یا گرنگە، ژبلی کو مافێ پارتی یە وەرگریت ژبەر پرانیا دەنگان و پرانیا هەژمارا کورسیان.
گرنگییا وەزارەتا ناڤخوە یا هەرێما کوردستانێ بۆ پارتی دیموکراتی کوردستان د چەند خالێن سەرەکی دا دیاردبیت
ئێک: کونترۆلا ئاسایش و هێزێن ئێمناهیێ و سەقامگیریا هەرێمێ
پاراستنا دەسەڵاتێ ئیک ژ ئەرکێن هەرە سەرەکی یێن وەزارەتا ناڤخوەیی یە ب رێکا (پۆلیس، هاتووچۆ، بەرگریا شارستانی، هێزێن ئێمناهیێ، ئاسایشا سنوری و دەزگەهێن پەیوەندیدار سەقامگیریا ناڤخو دپارێزیت. ئەڤ پاراستنە مەرجەکێ سەرەکی یە بۆ بەردەوامبوونا حکومەتێ و جێبەجێکرنا کارنامەیێن حکومەتێ کو پارتی بەشەکێ هەرە مەزن یێ حکومەتێ یە.
هەروەسا پارتی داکوکیێ ل سەر پاراستنا ژێرخانا سیاسی و ئابووری یا هەرێما کوردستانێ دکەت، ژبەرهندێ ژی ئەرکێ وەزارەتا ناڤخوەیی یە رووبروویێ هەرەشە و تیرۆر و نەئارامیێ ببیت کو، پارتی سەقامگیریا هەرێما کوردستانێ ب ئەرکێ خۆ دزانیت.
دوو: دەسەڵاتا کارگێری و خزمەتگوزاری
وەزارەتا ناڤخوەیی رۆلەکێ سەرەکی هەیە د دیارکرنا پارێزگار و دەڤەردار و سەرپەرشتیکرنا یەکەیێن کارگێری (پارێزگەهـ، قەزا و ناحیە) ژ بەر ڤێ چەندێ وەرگرتنا وەزارەتا ناڤخوەیی بۆ پارتی کاریگەریەکا مەزن هەیە ل سەر جێبەجێکرنا پرۆژە و خزمەتگوزاریێن گشتی، چونکی چەندین خزمەتگوزاریێن گرنگ پێشکێشی هەڤوەلاتیان دکەت ژوان ژی (نیشتنگەهـ، پاسپۆرت و کارتێن نیشتەجێبوونێ و رەگەزنامە، ئەڤە بەشەکن ژ پەیوەندیێن راستەوخۆ یێن هەڤوەلاتیان ب حکومەتێ ڤە کو رەزامەندیا وان زێدەدکەت بەرامبەری حکومەتێ.
هەروەکی بەرێز کاک فازل میرانی د هەڤپەیڤینەکا خوە دا دبێژیت: ل وی دەمێ ئەز وەزیرێ ناڤخوەیی بووم، ترۆمبێلێت مە یێت نەجدێ بەرازیلی بوون، کونسلخانە نەبوون، ڤیزە نەبوون، پاسپۆرت ژی نەدهاتنە واژووکرن هەڤوەلاتی نەدشیان بهێنە کوردستانێ و نەدشیان بچنە دەرڤە. گرنگیا وەزارەتا ناڤخوەیی ل ڤی دەمی یا جودایە ژ یا وی دەمی
هەروەسا دابینکرن و رێکخستنا ئاسایشا شارستانی ب رێکا پولیسان کو خزمەتگوزاریەکا بەردەواما ژیانا رۆژانەیا هەڤوەلاتیانە. ئەڤە ژی دبیتە ئەگەرێ بەرفرەهبوونا پێگەهێ جەماوەری یێ پارتی.
سێ: جێبجێکرنا یاسایێ و بەلاڤکرنا هۆشیاریێ
وەزارەتا ناڤخوە رۆلەکێ کاریگەر هەیە د جێبەجێکرنا یاسایێ دا ب تایبەتی د کۆنترۆلکرنا چەکی دا؛ جێبەجێکرنا یاسایا چەکی وەکو داماڵینا چەکێ بێمولەت و تومارکرنا وێ کو وەزارەتا ناڤخوەیی چەندین جارا راگەهاندیە و داخاز ژ لایەنێن سیاسی ژی کریە هاریکاربن د جێبەجێکرنا ڤێ یاسایێ دا، چونکی ئەڤ یاسایە بۆ سەلامەتیا گشتی یە و ئێک ژ ئارمانجێن گرنگ یێن حکومەتانە.
ژبەر ڤێ چەندێ وەزارەتا ناڤخوەیی ژ بۆ پارتی یا گرنگە و ئارمانجا پارتی سەقامگیریا هەرێما کوردستانێ یە
کـــاژین شـــەوکـــەت\دهۆک
١٥ێ تشرینا دووێ ٢٠٢٥
