سهرۆکێ ههرێما کوردستانێ نێچیرڤان بارزانی نهورۆز پیرۆز کر و گۆت، “نهورۆز سهمبۆلا تێکچوونا تاریتیێ و نووبوونا ژیانێ یه.”
نێچیرڤان بارزانی ههر وها گۆت، “چو هێز و چهک نکارن ئاگرێ ئازادیخوازیا کوردان ڤهمرینن.”
پهیاما سهرۆکێ ههرێما کوردستانێ:
گهلێ کورد و کوردستانییێن دهلال یێن ل ههر دهرێ جیهانێ بن،
ئەز ب گهرمی و ژ دل جهژنا نهورۆزا نهتهوهیی و سهرێ سالا نوو یا کوردی ل وه و ل مالباتێن سهربلندێن شههیدان، پێشمهرگهیێن قههرهمان و ههموو هێزێن ئهولهکاریێ پیرۆز دکم. هێڤیدارم ئهڤ جهژن ژ بۆ ههر کهسی، ببه سهدهما ئارامی، ڕهحهتی و بهختهوهریێ.
نهورۆز ئیفادهیهکە کووره ژ دیرۆکهک تژی تێکۆشین و داستانێن بهرخوهدانا نهتهوهیهکێ کو ههر دهم ب ئیرادهیهکا خورت ل ههمبهر زلمێ ڕاوهستیایه و قهت سهرئ خوە نەچەماندی یە. نهورۆز سهمبۆلا تێکچوونا تاریتیێ و نووبوونا ژیانێ یه، ئهو ڕاستیا دیرۆکێ یه کو ئیسبات دکه چو هێز و چهک نکارن ئاگرئ ئازادیخوازیێ د دلێ کوردان دا ڤهمرینه.
ئیرۆ ژی ئاگرێ نهورۆزێ ژ بۆ مه بانگاوازیهکا بهردهوامه ژ بۆ بهرخوهدان و ڕووبرووبوونا ئاستهنگیان و ژ بۆ ئاشتی و یهکیتیێ. هێز و شیانا مه یا خورته کو ئهم ب ئیرادهیهکا نهورۆزی، دهستکهفتیێن خوه یێن دهستووری بپارێزن و فهدهرالی و قەوارەیا سیاسی یا ههرێما کوردستانێ وهک بهرههما خوینا شههیدان و تێکۆشینا مه یا چهندین سالان، مەزن و بهێز بهێلن.
ئیسال د دهمهکی دا ئهم پێشوازیێ ل بهار و نهورۆزێ دکن، کو ههرێما مه د ڕهوشهکا ههستیار و ئالۆز دا دهرباس دبه. مهترسیێن شهر و ئهنجامێن وێ ژ ههر ئالیهکێ دیار دبن. لهوما ئهرکێ مه ههموویانه کو ئهم ب بهرپرسیاریهکا دیرۆکی بخهبتن دا کو ههرێما کوردستان و ئیراقێ ژ ڤان ئالۆزیان دوور بگرن. ئاشتی و ئاشتخوازی؛ هێزا مه یا ههری مهزنه و تهنێ د بن سیبهرا ئارامیێ دا ئهم دکارن پاشهرۆژهکح باشتر ئاڤا بکن.
د پهیوهندیێن مه یێن ب حکومهتا فهدهرالی یا ئیراقێ را، ژ بلی وێ یهکێ دهستخوهشیێ ل ههر پێنگاڤهکه ئهرێنی، ئهم دوباره دکن کو د ڤێ ڕهوشێ دا، ههڤکاریا زێدهتر ناڤبەرا ههولێر – بهغدایێ و بجهانینا ڕاستین ئا دهستوورێ و سیستهما فهدهرالی و پاراستنا مافێن ههموو پێکهاتهیان، تهنێ گارانتی یه ژ بۆ ئیراقهکا بهێز و ئارام. ئهم ل ههرێما کوردستانێ وهک ههر دهم فاکتۆرا ئارامی و ئهولههیێ دمینن و دهستێ لههڤکرنئ و دۆستانیێ ژ بۆ ههر کهسی درێژ دکن.
وهلاتییێن دهلال یێن کوردستانێ،
ژ وه داخواز دکم کو د دهما گهر و سهیرانێ دا، ب زێدهترین هشیاری ل ئهولههیا خوه و مالبات و ههزکریێن خوه ل بهر چاڤ بگرن. ب تایبهتی د ڤێ دهمێ دا کو ههرێما مه د ڕهوشهکا ئالۆز و تژی ئهنجامێن مهترسیدار یێن شهر دا دهرباس دبه، پێویسته کو ههر کهس زێدهتر های ژ خوه ههبه.
دڤێ هوون پێداگرێ ڕێکارێن هاتنووچوونێ و ئالیێن پهیوهندیدار بن، دا کو هوون ڤێ جهژنێ ب ئارامی و ئهولههی پیرۆز بکن و چو نهخوهشیهک بیرانینا نهورۆزێ ژ مه را تال نهکه. پاراستنا ژینگه و سرووشتا بهدهو یا کوردستانێ، ئهرکهک نهتهوهیی و نیشانا شارستانیا مه یه و دڤێ ئهم پێداگرێ وێ بن.
نهورۆز ل وان ههموو گهلێن کو ڤێ بیرانینێ پیرۆز دکن ژی پیرۆز به. خوهدایێ مهزن وه ههموویان و گهل و وهلاتێ مه بپارێزه و ئاشتی و ئارامی و ئهولههی سهرانسهرێ ههرێما مه و ل ههموو مرۆڤاهیێ بگره.
جهژنا وه پیرۆز به، ههر سال ب خوهشی و بەختەوەری.
نێچیرڤان بارزانی
سهرۆکێ ههرێما کوردستانێ
2026.03.20
