چیرۆکا جەلدەدانا رۆئیا حەشمەتی
که‌چا کورد ئا ژ باژارێ سنە یێ رۆژهلاتێ کوردستانێ رۆئیا حه‌شمەتی ل دادگه‌ها ۷ یا ته‌هرانێ ب ۷٤ قامچیان/جەلدەیان هاتە سزادان.
که‌چا کورد یا ژ سنەیێ، رۆئیا حه‌شمەتی ل سه‌ر حه‌سابێ خوه یێ ئینستگرامێ چیرۆکا جیبجیکرنا سزایێ قامچیدانا خوه ڤه‌دگێرە: “ده‌ما ئه‌م چوون ژۆرڤە من حیجابا خوه ژێکر و ده‌رباسی سالۆنێ بووم، دەنگێ قێرین و هەواران ل سەر دەرجکان دهات دیار بوو کو، هندەک دبرن بۆ ژۆرا جیبجیکرنا سزایێ وان.
رۆئیا دبێژە: “ئه‌م چوون بەشی ئێکێ یێ دائیره‌یا سه‌پاندنا جه‌زا. کارمەندەکێ وێ دائیرەیێ هات و گۆتە من حجابا خوە بکە سەرێ خوە دا ژ بۆ تە چو ئاریشە دروست نەبن. من ب ئارامی و ب حورمه‌ت ژێ را گۆت کو ئه‌ز ژ بۆ ڤێ هاتمه کو ل سەر ڤێ پرسێ قامچیان ل من بدەن، ئەس حجابێ ناکم سەرێ خوە. گازی کرن ئه‌فسه‌رێ جیبجیکرنا سزایێ قامچیلێدانێ، ئەو ژی هات و ژ من را گۆت حجابا خوە بکە سەرێ خوە و ل دووڤ من وەرە. من ژێرا گۆت ئەز ناکم سەرێ خوە. تو ناکی سەرێ خوە؟ ئەز دێ وسا قامچیان ل تە بدەم داکو تو بزانی تو ل کیڤەیی. ئه‌ز دێ دۆزه‌ک نوو ل سەر تە ڤه‌کم کو هوون جارەک دن ببن مێڤانێ مە و ۷٤ قامچیێن دن بخون. من دیسا نه‌کر. ئه‌م داکه‌تن قاتا خوارێ و ژ بەر ڤه‌خوارنا شه‌رابێ چه‌ند خۆرت ئانیبوون وێرێ. دیسا زلامه‌ک هات و ب حشکی گۆت: “ما ئه‌ز نابێژم بکە سەرێ خوە؟ من هەر نه‌کر سەرێ خوە. دو ژنێن روومەت نیقابکری هاتن و حجاب دانین سەر سەرێ من. من دیسا ژێ کر و چەند جاران دوباره کر. داویێ ژ پاش ڤه ل من خستن و دەستێن من کەلامچە کرن و حجاب دانین سەر سه‌رێ من. ئه‌م ژ هه‌مان ده‌ره‌جان داکه‌تن قاتا خوارێ کو، دادوەر، کارمەندێ جیبجیکرنا سزایی و ژنەک ل وێری راوەستایی بوون
رۆئیا دبێژە: “وی زەلامی قامچیه‌ک ژ چه‌رمێ ره‌ش ژ ناڤ قامچیێن ل پشت ده‌ری هلدا. دو جاران ل دۆرا ده‌ستێ خوه پێچا و به‌ر ب ته‌ختێ من ڤە هات. دادوەر گۆتێ گەلەک ب هێز لێ نەدە. مێرک ده‌ست ب لێدانێ کر. ملێن من. پشتا من. سینگا من. رانێن من. لنگێن من. و دیسا ژ سەری دەست پێ کر ڤە… من هه‌ژمارا قامچیان نه‌هه‌ژمارت، قه‌دیا. ئه‌م ده‌رکه‌تن دەرڤە. من ژی وەسا خوە نیشا وان نەدا کو ئەو هەست بکن وان ئەز ئێشاندمە.
