شه‌لال گه‌دۆ ل سه‌ر ئێریشا چه‌کدارێن پەیەدێ/پەکەکێ ل سه‌ر خوه‌پیشاندانا ئه‌نەکەسێ ل قامشلۆ ژ کوردستان۲٤ێ را گۆت: “ئێریشێن هۆڤانه یێن چه‌کدار و ئالیگرێن پەیەدێ ل سه‌ر ئه‌ندام، ئالیگر و سه‌رکرده‌یێن ئه‌نەکەسێ، نه جارا یه‌که‌مه و نه یا داوی یه، ژ به‌ر کو ئه‌و چو جاری نکارن که‌سه‌کی، وه‌کی هه‌ڤپار، ئان ژی وه‌کی ئۆپۆزیسیۆن قه‌بوول بکن.”
به‌رده‌وامیا ئاخاڤتنا خوه دا گه‌دۆ گۆت: “ئێریش و ره‌فتارێن پەیەدە/پەکەکێ یێن ل رۆژاڤایێ کوردستانێ، ئه‌نجاما دیرۆکه‌کێ یه ڤه‌دگه‌ره ژ سالا ۱۹۸٤ان، ده‌ما ل باکورێ کوردستانێ هاتیه دامه‌زراندن، وان چو جاری نه‌خوه‌ست ب کوردان را دانووستاندنان بکن. کار و ئارمانجا پەیەدە/پەکەکێ ل سووریه‌یێ، تێکبرنا دۆزا کوردی ل وی وه‌لاتی یه، ژ بۆ ڤێ یه‌کێ ژی ژ ئالیێ ئارتێشا به‌شار ئه‌سه‌د ڤه هاتنه چه‌کدارکرن و خوه ل سه‌ر کوردان فه‌رز کرنه، تا کو کوردان بێده‌نگ بکن.”
نوونه‌رێ ئه‌نەکەسێ د ئۆپۆزیسیۆنا سووریێ دا دبێژه: “تشتێ کو پەیەدە ب کوردێن سووریێ دکه و زیانا کو گەهاندیە کوردان، هه‌تا نها نه د ده‌ما به‌شار ئه‌سه‌د، حافز ئه‌سه‌د و نه ژی به‌ریا وی دا، ژ ئالیێ چو رێژێمه‌کا سووریێ ڤه نه‌هاتیه کرن.”
ئه‌نەکەسێ ل دژی گرتنا ئه‌ندامێن خوه ژ ئالیێ رێڤه‌به‌ریا خوه‌سه‌ر ڤه، دوهی ل قامشلۆ ل به‌ر ئاڤاهیا نەتەوەیێن یەکگرتی ده‌ست ب گره‌ڤه‌کێ کربوو، ئه‌ڤ چالاکیا ئه‌نەکەسێ ژی راستی ئێریشا چه‌ته‌یێن ب ناڤێ ته‌ڤگه‌را جوانێن شۆره‌شگه‌ر و ئاسایشا پەیەدێ هات.
ئه‌نەکەسێ ژی د داخویانیه‌کێ دا راگەهاند:”پشتی کو چه‌کدارێن سه‌ر ب پەیەدێ ڤه رێ ل گره‌ڤا ئه‌نەکەسێ گرت، چه‌کداران ئێریشی گره‌ڤێ کرن و سه‌رۆکێ ئه‌نەکەسێ سلێمان ئۆسۆ و ئه‌ندامێن ده‌سته‌یا سه‌رۆکاتیا ئه‌نەکەسێ فه‌یسه‌ل یووسف، نیمه‌ت داود، محه‌مه‌د ئیسماعیل و عه‌بدولسه‌مد خه‌له‌ف برۆ بنچاڤ کرن. پشترا ژی ئه‌و هه‌موو هاتن ئازادکرن.”
ئه‌نەکەسێ پێشتر راگەهاندبوو، ژ ۳۱ێ ئادارا بۆری ڤه ۱٥ ئه‌ندامێن وێ و پارتیێن د ناڤا ئه‌نەکەسێ دا ژ ئالیێ چه‌کدارێن سه‌ر ب پەیەدێ ڤه هاتن ره‌ڤاندن، ژ به‌ر وێ ژی بانگا گره‌ڤه‌کێ ل پێش ئاڤاهیا نەتەویێن یەکگرتی ل قامشلۆیێ کربوو.
