د ڤان ڕۆژێن داوی دا د مه‌دیایێ و ب تایبه‌تی د مه‌دیایا جڤاکی دا به‌حسا ناکۆکیێن دژوار یێن د ناڤبه‌را ڕێڤه‌به‌ریا یەكێتیا نشتمانیا كوردستانێ (یەنەك)ێ دا دھێتە کرن. ب تایبه‌تی تێ گۆتن کو ناکۆکیێن كوور و ڤەشارتی د ناڤبه‌را هه‌ردو هه‌ڤسه‌رۆکێن یەنەکێ دا هه‌نه. کورێ جه‌لال تالەبانی، باڤێل تالەبانی، و لاهۆر شێخ جه‌نگی هه‌ردو هه‌ڤسه‌رۆکێن یەنەکێ نه، لێ د پراکتیکێ دا، یێ یەنەکێ بڕێڤه دبه لاهۆرشێخ جەنگی و مالباتا وی یه. ژ به‌ر کو پشتی کۆنگره‌یا یەنەکێ، لاهۆر گه‌له‌ک ده‌زگه‌هێن ب هێز ب خوه‌ڤه گرێدانه و ڕۆژ ب ڕۆژ باڤێل خوه کێمتر و بێ ده‌ستهلاتتر دبینه.
هه‌روه‌ها گه‌له‌ک پسپۆرێن سیاسی د ناڤا یەنەکێ دا ددن خوویاکرن کو، ئه‌ڤ ناکۆکی د ناڤبه‌را مالباتا جه‌لال تالەبانی و شێخ جه‌نگی دا یه.
نھا ژ بەر گوھەرتنا ھندەك بەرپرسێن دەزگەھێ زانیاری و دژەتەرۆرێ ناكوكی و ئالۆزی د ناڤبەرا ھەردو پسمامان دا (باڤل و لاھۆر) چێبوونە. وەكی تێ زانین دەزگەھێ زانیاری و دژەتەرۆر ب سەر ھەر یەك ژ ھەڤسەرۆكێ یەنەكێ دا ھاتبوونە دابەش كرن.
رۆژا 8ێ ڤێ مەھێ، سه‌رۆکێ ده‌زگه‌هێ زانییاری(محه‌مه‌د تەحسین تاله‌بانی ) کو برایێ ئالا تاله‌بانی یه، ب ئه‌مرێ باڤل تاله‌بانی ژ کار هاتیە دوورخستن (ھندەك چاڤكانی دبیژن كو دەستەسەرە) و ل جهێ وی (ئه‌ژی ئه‌مین ) برایێ موسه‌نا ئه‌مین کو په‌رله‌مه‌نته‌رێ یه‌کگرتوویا ئیسلامی یه، دانایه.
ھەروەسا ب فەرمانا باڤل تالەبانی وەھاب ھەلەبجەیی ل جھێ پۆلات تالەبانی، برایێ لاھۆر جەنگی، وەكو سەرۆكێ دژەتەرۆرێ دانایە. لاھۆر و دەستەكا خوە ڤان گوھەرتنان ب دژی خوە دزانن و وەكە كۆدەتایەكێ ل دژی مالباتا شێخ جەنگی حسێب دكن.
بەری لاھۆر ببە ھەڤسەرۆكێ یەنەكێ، ئەو سەرۆكێ دەزگەھێ زانیاری بوو و پشتی بوو ھەڤسەرۆكێ یەنەكێ، وێ محه‌مه‌د تەحسین تاله‌بانی ل جھێ خوە دانا، لێ ھەتا ناھا دامەزراندنا وی نەببو فەرمی ژ ئالیێ ئەنجومەنا ئەولەكاریا ھەرێما كوردستانێ ڤە نەھاتبوو ئیمزا كرن.
ل گۆر ھندەك چاڤكانیان ئەڤ گوھەرتن ژ ئالیێ ھێزەكا كۆماندۆ سەر ب جعفه‌ر شێخ موستافا هاتییه پێکئانین. ب ڤێ ئێکێ دەربه‌ک مه‌زن ل ڕۆل و پێگەھێ لاهۆر د که‌ڤه، چوونکی هه‌م ژ ده‌رڤە و هه‌م د ناڤا یه‌کێتیێ دا هێزا بنگه‌هین ل پشت لاهۆر ده‌زگه‌هێ زانیاری و دژەتەرۆرێ یە.
ئه‌ڤ بوویه‌ر وه‌که خوەفەرزكرنا مالباتا تالابانی ل هه‌مبه‌ر مالباتا شێخ جه‌نگی تێ دیتن پرانییا کادرۆیێن که‌ڤن یێن یەنەکێ پشتگرییێ ددن مالباتا تاله‌بانی.
پرانیا ھێزیێن سەربازی و ئەمنی د رەوشەكا ئامادەباشیێ دانە ل دژی مالباتا شێخ جەنگی پشتەڤانیا ماباتا تالەبانی دكن.
ڤان ناكۆكیان جارەكە دن یەنەك ب سەر چەند باسكان دا دابەش كرو جارەك دن ژ رایا گشتی را دا زانین كو ناكۆكیێن ناڤ یەنەكێ بداوی نەھاتنە و بەلكی مەزنتر و كوورترن. ھەر چەندە ھندەك بەرپرسێن یەنەكێ ئیدیعا دكر كو پشتی كۆنگرەیەێ ھەموو ناكۆكی چارەسەر كرنە، لێ ڤان بوویەرێن داویێ بەرڤاژی دسەلمینن.
گەلەك ژ شارەزایێن سیاسی پێشبینی دكن كو ئەڤ ناكۆكیە دێ دەرباسێ ناڤ رێخستنێن یەنەكێ بن و ھەموو یەنەكێ ڤەگرن. ژ بەر كو پشتی كۆنگرەیێ گەلەك بەرپرس و كادرێن كەڤن یێن یەنەكێ خوە مەغدور دبینن و چو دەستھلات د دەستێ وان دا نەمایە و لاھۆر كەسێن نێزیكێ خوە ل جھێ وان دامەزراندنە.
هه‌روه‌ها پشتی ئه‌ڤ بوویه‌ر ڕوودایی به‌رھەم سالح ژی ژ بۆ ناکۆکیێ کێم بکه و ناڤبەینكاریێ بکه دەملدەست هاتیه سلێمانیێ و ل گه‌ل هه‌ردو ئالیان هه‌ڤدیتنان دکه.
