نڤیسار

ڕوویێ ڕه‌ش نه‌ هه‌وجه‌یی ته‌نیێ یه‌

مسته‌فا سه‌لیمی وه‌لاتپارێزه‌ک کورد ژ ڕۆژهلاتا کوردستانێ یه‌، سه‌لیمی ژ ئالیێ رژێما ئیرانێ ڤه‌ هاته‌ دارڤه‌کرن. مسته‌فا سه‌لیمی ژ بۆ کو پێشمه‌رگه‌یاتی کریه‌ و ژ بۆ کو چالاکڤانه‌ک سیاسی کورد بوو هاتبوو گرتن و ۱۷ سالان د زندانێ ده‌ مایه‌. پشتی ۱۷ سالان ب ئاوایه‌کی کاریه‌ ژ زیندانێ بره‌ڤه‌ و بۆ ئازادیێ به‌رێ خوه‌ دایه‌ باشوورێ کوردستانێ، سه‌لیمی سه‌رکه‌فتیه‌ و خوه‌ گەهاندیه‌ باشوورێ کوردستانێ. لێ مخابن ژ ئالیێ چه‌کدارێن یەكێتیا نشتمانیا كوردستانێ (یەنەکە) ڤه‌ هاتیه‌ گرتن و ئه‌و جاردن ڕاده‌ستی ئیرانێ کرنه‌ و سه‌لیمی هاتیه‌ دارڤه‌کرن.

بوویه‌ر ئه‌ڤه‌یە، چ نرخاندن ل سه‌ر ڤێ بوویه‌رێ ناھێن کرن. ڤه‌کری نشتمانپه‌روه‌ره‌ک کورد ژ زیندانا ئیرانێ ڕه‌ڤیایە و خوه‌ گەهاندیه‌ کوردستانا ئازاد. لێ ژ ئالیێ ئاکتۆرێن خیانه‌تا 16 ئۆکتۆبه‌رێ ڤه‌ هاتیه‌ گرتن و جاردن ڕاده‌ستی ئیرانێ کرنه‌.

ل هەمبه‌ر ڤێ بوویه‌رێ، سه‌رۆکوه‌زیرێ کوردستانێ داخوویاکرن کو دێ لێکۆلنه‌کێ بکن. لێ چ لێکۆلین ناگەهه‌ ئه‌نجامه‌کی. ژ به‌ر کو بوویه‌ر کفشه‌ و زه‌لاله‌. ئاسایشا یەنەکێ سه‌لیمی ڕاده‌ستکریه‌. تشتا بێ کرن ئه‌وه‌ کو، به‌رپرسێن بریارا ڤێ یه‌کێ داینە دڤێ بێنه‌ گرتن و دادگه‌هکرن.

یەنەک به‌یانا ده‌رتێخه‌ و دبێژه‌ كو ئاگاهداریا وێ ب ڤێ بوویه‌رێ نینە، ده‌ره‌وا دکن، ئەگەر ئاگاهداریا هه‌موویان ژێ نەبە ژی، لێ ئاگاهداریا لاهۆر شێخ جه‌نگی ژێ هه‌یه‌ و ئه‌و ژ تەسلیمكرنا سەلیمی به‌رپرسیاره‌. لاهۆر جه‌نگی هه‌ڤسه‌رۆکێ یەنەکێ یه‌. هه‌تا ژ بۆ ڤێ بوویه‌رێ ڕۆژا 11ێ نیسانێ وه‌زاره‌تا ده‌رڤه‌یا ئەمریكایێ ب ڕێیا جیگرێ یاریده‌ده‌رێ وه‌زیرێ ده‌رڤه‌یێ ئەمریكایێ ژ بۆ کاروبارێ عیراقێ (نڤیسینگه‌ها ڕۆژهلاتا ناڤین) و ب رێیا جیگرێ یه‌که‌مێ یاریده‌ده‌رێ وه‌زیرێ ده‌رڤه‌یێ ئەمریكایێ (نڤیسینگه‌ها ڕۆژهلاتا ناڤین) ب رێیا تەلەفۆنێ پەیوەندیێ ب لاهۆر شێخ جه‌نگی دکن و ب تووندی ھشیار دكن و بالا وی دکشینن، کو ئه‌ڤا لاھور شێخ جەنگی كری بنپێکرنا سزایێن ئەمریكایێ یە ل سه‌ر ئیرانیێ.

د ڤێ بابه‌تی دا هه‌لوه‌ستا پارتیێن کوردستانا ڕۆژهلات ژی گه‌له‌ک بالکێشه‌. د ڕاستیێ دا ژ بۆ خوه‌ ڕاستیێ نابێژن و هه‌ریه‌ک ژ ئالیێ خوه‌ ڤه‌ ب ئاوایه‌کی به‌حسا ڤێ پرسگرێکێ دکه‌. پارتیا دەمۆكراتا كوردستانا ئیرانێ ئه‌ول دا خویاکرن کو وان هاژ بوویه‌رێ نینە و سه‌لیمی نه‌ پێشمه‌رگه‌یێ وانه‌. لێ پاشی داخویانیه‌ک دویه‌م ڕاگەهاند و دبێژه‌: “مسته‌فا سه‌لیمی یه‌ک ژ وان که‌سان بویه‌ و پشتی خوه‌ گەهاندیه‌ تخووبێن هه‌رێما کوردستانێ، ڕاده‌ستی کۆمارا ئیسلامیا ئیرانێ هاتیه‌ کرن”.

باسكێ دن یێ پارتیا دەمۆكراتا كوردستانا ئیرانێ د داخویانیا خوە دا ڕاده‌ستکرن و سێداره‌دانا زیندانیێ سیاسی مسته‌فا سه‌لیمی شه‌رمه‌زار دکه‌.

سه‌لیمی پێشمه‌رگه‌یه‌کو بوو و ژ بۆ به‌ره‌ڤانیا وه‌لاتا خوه‌ 17 سالا زیندانا دژمنان دا مایه‌ و گاڤه‌ک ژ بۆ ئازادیێ ئاڤێتیه‌ و جاردن ژ ئالیێ خاینێن 16 ێ ئۆکتۆبه‌رێ ڤه‌ کو نها به‌رپس و ڕێڤه‌به‌رێن یەنەکێ نه‌ ڕاده‌ستی رژێما ئیرانێ هاتیه‌ کرن. گه‌ره‌ک کێماسی پەدەکە ڤێ یه‌کێ ڕه‌خنه‌ بکه‌ و د ڤێ ده‌ربارێ دا ببه‌ خوه‌دی هه‌لوه‌سته‌کی.

ده‌ما بوویه‌ره‌ک ڕوودده‌ پرانیا پارتیێن هه‌موو به‌شێن کوردستانێ داخوویانیا به‌لاڤ دکن و هه‌لوه‌ستا خوه‌ ددن خوویاکرن. لێ د ڤێ پرسێ دا پرانیا وان بێ ده‌نگن. ئه‌ڤ نه‌ ڕاسته‌. که‌سه‌ک ناخوازه‌ ناڤبه‌را وان و یەنەکێ ژ بۆ ڤێ پرسێ خراب بکه‌. ده‌ما شاشیەك بێ کرن کی کربه‌ دڤێ بێته‌ ڕه‌خنه‌ کرن. ڕه‌خنه‌ کرن نه‌ دژمناتیه‌. ئه‌م هه‌موو دزانن کو ئیرۆ ب سه‌دان که‌س ژ به‌شێن دن یێن کوردستانێ ژ بۆ خه‌ته‌را گرتنا وان هه‌یه‌ به‌رێ خوه‌ دانه‌ باشوورێ کوردستانێ و ل وێ ده‌رێ ژیانا خوه‌ ب ئاوایه‌کی به‌رده‌وام دکن.

مخابن ده‌ما ل کوردستانێ بوویه‌ره‌ک ڕوودده‌ ژ بوویه‌رێ پتر هه‌رکه‌س به‌رێ خوه‌ دده‌ کا گه‌لۆ ئه‌ڤ بوویه‌ر ژ ئالیێ کێ ڤه‌ هاتیه‌ کرن و ل گۆرا وێ نرخاندن تێنه‌ کرن.

د پرسا دارڤه‌کرنا مسته‌فا سه‌لیمی دا، مه‌دیا کوردی ژی گرنگیا پێوست نه‌دا بوویه‌رێ. دڤێ ئه‌ڤ بوویه‌ر ده‌مه‌ک درێژ د ڕۆژه‌ڤێ دا بە و نرخاندن ل سه‌ر بێنه‌ کرن. پرس نه‌ ئه‌وه‌ کو نشتمانپه‌روه‌ره‌ک کورد هاتیه‌ دارڤه‌کرن، ڕۆژانه‌ ل ئیرانێ رژێم کوردا دارڤه‌ دکه‌ و وان دکوژه‌. لێ پرسا سه‌لیمی گه‌له‌کی جودایه‌ ئه‌و ژ ئالیێ پارتیه‌ک کورد ڤه‌ دھێتە ده‌سته‌سه‌رکرن و ڕاده‌ستی ئیرانێ دکن و ل ئیرانێ دھێتە دارڤه‌کرن.

ڕۆژنه‌مه‌ڤان عه‌لی جوانمه‌ردی ئه‌ڤ بوویه‌ر شۆپاند و ڕاستیا بوویه‌رێ ژ ڕایا گشتی را دا خوویاکرن. ڕاستی پێوستیا کوردستانێ ب ڤان جوره‌یێ ڕۆژنه‌مه‌ڤانا هه‌یه‌. ده‌ستێ جوانمه‌ردی ساخبه‌.

یەنەک گه‌ره‌ک ڤێ پرسێ د ناڤا خوه‌ ده‌ بنرخینه‌ و ببه‌ خوه‌دی هه‌لوه‌سته‌کی، نابه‌ ته‌نێ بده‌ خوویاکرن کو هایێ وان ژ ڤێ بوویه‌رێ نینە.

حوکومه‌تا هه‌رێما کوردستانێ گه‌ره‌ک هه‌موو هێزا خوه‌ ب کاربینه‌ و به‌رپرسێن ڤێ بوویه‌رێ بدە دادگەھێ.

هه‌تا هنده‌ک ئالی وه‌ک چه‌ته‌یێن مافیا د ناڤا پارتیان دا خوه‌دی چه‌کدار بن و ب سه‌رێ خوه‌ ته‌ڤبگه‌رن، کوردستان گه‌له‌ک زه‌حمه‌ته‌ کو بگهه‌ ئارمانجا خوه‌ یا مه‌زن. پێدڤیە ڕۆژه‌ک زووتر هه‌موو هێزێن چەکدار کو ل کوردستانێ هه‌نه‌ بکه‌ڤن د بن فه‌رمانا حوکومه‌تێ دا و چ هێزه‌ک چەکدار گرێدایی پارتیان و ڕێخستنا نه‌مینە. هه‌تا هنده‌ک چه‌ته‌ هه‌ولبدن چه‌کداران ل دۆرا خوه‌ بهێلن لازمە بھێنه‌ تێکبرن. ئه‌ڤ یه‌ک ته‌نێ ڕێ ل پێشیا ده‌وله‌تبوونا کوردستانێ ڤه‌دکه‌.

هنده‌ک تشت هه‌نه‌ ده‌ما کو مرۆڤ به‌حس دکه‌ ، نه‌ کو ڕاستیا کوردستانێ نزانه‌، لێ گه‌لۆ دێ ئه‌ڤ کێشه‌ هه‌تا که‌نگێ به‌رده‌وام بن؟

دارا بیلەك
2020.04.13

Back to top button