ڕۆژئاڤا شەڕ و کەتن یان چ
ل ڤان ڕۆژێن داویێ و پشتی بڕیارا سەرۆک ترامپ، سەرۆكێ ئەمریكایێ، یا ڤەکێشانا ھێزێن ئەمریکی ژ ڕۆژھەلاتێ چەمێ فورات، ڕۆژئاڤایێ کوردستانێ، نەمازە پشتی زێدەبوونا گەفێن ئەردۆگان ب ئەنجامدانا ھێرشێن لەشکەری دژی ھێزێن پەیەدێ، بھێجاتا گرێدانا ڤان ھێزان ب پەکەکێ ڤە، دکەڤە ھەمبەر گەلەک سیناریۆیان، سیناریۆیا ژھەموویان مەتڕسیدارتر ڕووبڕووبوونەکا لەشکەریە دگەل ھێزێن دەولەتا تورکیا یا داگیرکەر.
ھەلبەت گەلەک جاران بێی ھەبوونا ئاراستەیەکێ یان خواستەیەکێ ژبۆ ئەنجامدانا شەڕی ھەمبەر ئالیەکێ دن، لێ دیسان ژی شەر روو ددە، ئەۆژی ژبۆ بدەستڤەئانینا چەند ئارمانجان. دبە ئەڤ ئارمانج مادی بن، مینا داگیرکرنا دەڤەرەکێ تەمەعکاری دسامانێن خوەزایێ یێن وێ دەڤەرێ دا، یان ژی ژبەر ستراتیژیەتا وێ ھەرێمێ ژ ئالیێ لەشکەی ڤە و دوورکرنا مەتڕسیان ژ سنۆرێ ئالیێ ھێرشکەر، یان ژی بمەبەستا بندەستکرنا خەلکێ وێ ھەرێمێ و بەرفرەھکرنا دەسھەڵاتداریا ھێزا داگیرکەر.
دڤی شەڕێ دھێت چاڤەڕێکرن دناڤ بەرا دەولەتا تورک و ھێزێن شەڕڤانێن پەیەدێ دا، ئارمانجا دەولەتا تورک یا ئاشکرا ئەوە مەترسیا پەکەکێ ژ (سنۆرێن خوە) دووربێخە و ل وێ دەڤەرێ چ ستاتۆیێن دن یێن کوردی مینا ئەوا ل (باکۆرێ) عێراقێ چێبووی، وەک ئەو بناڤ دکەن، چێ نەبن.
خودێ نەکە، لێ ئەگەر ئەڤ شەرە قەومی، ب باوەریا من دێ تەڕ و ھشک پێکڤە ھێنە سۆتن. ئەوژی ژبرر چەند ئەگەران:
١- نەبوونا ھەڤسەنگیا ھێزێ ژ ئالیێ چەندی و جۆری ڤە، ھەلبەت نەبیتە پرۆپەگاندە، ڕاستی و کەتوار دبێژە کۆ سۆپایێ تورک دووەم ھێزا پەیمانا ناتۆیە، خوەدی ھێزەکا پەژایی، ئەسمانی و دەریایی مەزنە، زێدەباری ڤێ ژی، پێشکەفتیترین تەکنۆلوژیا لەشکەری د دەست دا ھەیە، کەنال و بازاڕێن کرینا چەکی یێن ھەموو جیھانێ ژێ رە ڤەکرینە، ھێزەکا ئابۆری مەزنە كو گەلێ تورکیا شانازیێ پێ دكە.
د بەرامبەردا، پەیەدە ھێزەکا نوو یە و ژئالیێ چەندی ڤە کێم و خوەدی چەکەکێ کێمە، نەبوونا پەیوەندیێن ناڤدەولەتی و بازاڕێن کرینا چەکێ پێشکەفتی، نەخاسمە چەکێ دژێ ھێزێن ئەسمانی، دھەمان دەم دە دەسھەلاتێ خوە بھێزا چەک کریە دیفاکتۆ، چڤاکا ڕۆژئاڤا سەرەرای کۆ ب ھەموو ئاوایان دژی لەشکەرکێشی و گەفێن دەولەتا تورکە، لێ چڤاک تەڤ نە دگەل پەیەدێ یە و پشتگیریێ نادن وێ.
٢- ئەڤ شەڕ دی ل ئەنیێن شەری یێن ئاشکرا ھێتە کرن، واتە نەشەڕێ پارتیزانی یە، بەلکۆ دێ ببە مینا شەرێ دوو وەڵاتان، وەڵاتەک زلھێز، ڤەکری و خوەدی کووراتیەکا ستراتیجی ل ھەمبەر ھەرێمەکا بچووک، گرتی، خوەدی ھێزەکا کێم و بێ پشتەڤان.
٣- ھەموو پێگەھ، بنگەھ، دامەزراوێن ژۆژئاڤا، سڤیل بەری شەڕڤانان دێ بن ئارمانجێن ھێرشێن ھێزێن ئەسمانی و تۆپبارانا ھێزێن دەولەتا تورکیا، بێ ھەبوونا چەکەکێ کاریگەر و کۆ بکاربە ڕێ لھەمبەر ڤان ئێرشان بگرە، یان بکێماسی زیانێن وان کێم بکە.
٤- تەڤی باوەریا من ب جانفیداییا شەڕڤانان و ئەز باوەر دكم كو دێ بەرخودانەکا کێم وێنە ھێتە کرن و دێ دربێن کەمەر شکێن داوەشینن ھێزێن تورکی ،لێ ژبەر وان ئەگەرێن ل ژۆر مە دیارکرین، ھێزێن شەڕڤانان نکارن درێژیێ بڤی شەڕی بدەن و ل داویێ دێ ئەردۆگان ئارمانجێن خوە پێک بینە، ڕۆژئاڤا دێ ھێت داگیرکرن، ھەڵبەت، پشتێ ب ھزاران شەھید و برینداران وسۆتن و کاڤلکرنا تەڤایا ڕۆژئاڤا.
خودێ نەکە، ئەگەر ئەڤە ھات کرن، نەممکنە، جارەک دن ترک ژڤێ ئاخێ دەرکەڤن، سەربۆڕێن قۆبرس، باشوڕ و عەفرینێ ڤێ چەندێ پشتڕاست دکە.
لەوما پرسیاڕا لڤێرە تێتە ھۆلێ ئەڤە:
چما ئەم شەڕەکی بکەین کۆ پێش وەخت ئەم ئەنجامێ وی شەڕی بزانین؟ گەلۆ ژبلی شەڕی بەدیلەك دن ھەیە؟ ئانکۆ دەلیڤە ژبۆ ڕێگرتنێ ژڤی شەڕی ھەیە؟
.لەوما دپرسم: ڕۆژئاڤا شەڕ و کەتن یان چ؟ بەرسفێ ژبۆ خاندەڤانان دھێلم
ئیدریس تروانشی
23.12.2018
