شاندەیا ده‌م پارتییێ پشتی هه‌ڤدیتنا ب سه‌رۆکۆمار ئه‌ردۆگان را ل به‌شته‌په‌یێ داخویانیه‌کا نڤیسکی بەلاڤ کر. شاندەیێ، دیار کر کو هه‌ڤدیتن ئه‌رێنی ده‌رباس بوو و گۆت، “ئه‌م ب ڕوومه‌تن کو ئه‌م ژ ته‌ڤاهیا وه‌لاتێ خوه را ڕادگەهینن کو ئیرۆ ژ دوهی زێده‌تر هێڤیدارن.”
سه‌رۆکۆمارێ ترکیێ ئه‌ردۆگان ل کولیا سه‌رۆکۆماریێ پێشوازیا هه‌یئه‌تا ئیمرالیێ یا ده‌م پارتییێ کر. پشتی ۱۳ سالان ئه‌ڤ جارا یه‌که‌مه ئه‌ردۆگان ب وان را تێکەلدار دبە.
ژ ده‌م پارتییێ سڕ سوره‌ییا ئۆنده‌ر( ب ئەسلێ خوە ترکە) و په‌رڤین بولدان ( ئەسل عەرەبە) به‌شداری جڤینێ بوون. جڤینا کو ڕێڤه‌به‌رێ میتێ ئیبراهیم کالن و ئالیکارێ سه‌رۆکێ گشتی یێ ئاک پارتییێ ئه‌فکان ئالا ژی ئاماده بوون سەعه‌تەک و ۲٥ ده‌قیقه‌یان ده‌وام کر. هه‌ر وها گه‌له‌ک وێنه‌یێن لووتکه‌یێ ژی هاتن بەلاڤ کرن.
پشتی جڤینێ پارتییا ده‌مێ داخویانیه‌کا نڤیسکی دا رایا گشتی. د داخویانیێ دا دبێژه: “هه‌ڤدیتنا کو مه ب سه‌رۆکۆمار ڕه‌جه‌پ تەیییپ ئه‌ردۆگان و هه‌یئه‌تا پێ را کر، د ئاتمۆسفه‌ره‌ک پر ئه‌رێنی، چێکه‌ر، به‌رهه‌مدار و ژ بۆ پاشه‌رۆژێ ب هێڤی ده‌رباس بوو.
هات دیارکرن کو دڤێ سەردەما توندی و په‌ڤچوونان نه‌مینه و قادا ده‌مۆکراتیک و سیاسی وه‌ره خورتکرن ژ بۆ وه‌لات، وه‌لاتیێن مه و هه‌رێما مه خوه‌دی گرینگیه‌کا ژیانی یه. هه‌یئه‌تا مه و پارتییا مه دێ د ده‌ما پێش دا ژی خه‌باتێن خوه یێن ژ بۆ پێکانینا بانگا ئاشتی و جڤاکا ده‌مۆکراتیک ب ئیراده و بالداریه‌کا خورتر بدۆمینن. ئه‌م ب شانازن کو ئه‌م هه‌موو وه‌لاتێ خوه ئاگاهدار دکن کو ژ ئیرۆ پێ ڤه ئه‌م ژ دوهی پتر ب هێڤی نه.
ئه‌م سپاسیا هه‌موو ئالیێن سیاسی و پێکهاته‌یێن جڤاکی دکن کو هه‌تا نها ب پێشنیار، هشیاری و ڕه‌خنه‌یێن خوه پێڤاژۆ ب هێزتر کرنه.”
