نڤیسین: کــاژین شــەوکەت
هەبوونا ژنان پێگەهـ و ئافراندنا مرۆڤایەتیێ و نەتەواتیێ یە. مەبەست ژ ڤێ یەکێ ژی ئەوە کو د راستیێ دا ژن چاڤکانیا مرۆڤاتی و نەتەواتیێ بوویە.
پەیوەندیا زمانی و ژنان، پەیوەندییەکا راستەوخۆە و ب باندۆرە ل سەر نەتەوان، چونکی “زمانێ دایکێ” زاردەڤەکێ سەلمێنەر و راستەقینەیێ
پەیوەندییێن دیرۆکی و جیوپۆلیتیکی یە. راستە کو مرۆڤ (ژن، مێر) بۆنەوەرەکێ ئاخفتنکەرە و هەر ڤێ ئاخفتنێ مرۆڤ و ئاژەل ژێک جوداکرینە، لەورا هەر ژن بوویە رێنیشاندەر ژ بۆ پێگەها زمانی.
پرسا”زمانێ دایکێ” پرسەکا ئاڵۆزە ژ بۆ کوردان دناڤا نەتەوێن داگیرکەر دا. پەروەردە و راهێنان ژ بۆ ژنا کورد جوداترە ژ پەروەروەیا ژنێن وەلاتێن دی، ئەرکێ ژنا کورد قورستر و گرانترە ژ ئەرکێ ژنێن وەلاتێن دی، ژ بەر کو گەلێ کورد هێشتا ب مافێن خۆ یێن دەسپێکی و نەتەوەیی شاد نەبوویە و هەتا نها ژ بۆ بدەستڤەئینانا مافێن نەتەوەیی بگرانی دخەبتن.
پێدڤیە ژنا کورد ژ بن باندورا کلتور و زمان و هونەرا دەولەتێن داگیرکەرێن كوردستانێ ( ترک، ئەرەب و فارس) دەربکەڤن کو یا دیارە کلتور و زمان و هونەرا داگیرکەران زاڵ بویە ل سەر جڤاکێ کوردی بتایبەتی و کوردستانێ بگشتی.
ل ڤێرێ من دڤێت بێژم کو پێدڤیە هەمی ژن ل زمانێ نەتەوەیا خۆ خودان دەرکەڤن، چونکی هەر ژنە ئافرێنەر و پێگەها نەتەواتیێ ژ بۆ زاروک و جڤاکێ خۆ، دیسا ژی ئەز ب ئەرک دبینم کو هەمی ژن زارۆکێن خۆ ل سەر بنیاتێ نەتەواتیێ پەروەردە بکەن و بێ بەهرنەکەن ژ زمان و کلتور و هونەرا کوردی هەتا کو زمانێ مە زێندی بمینە دناڤا زمانێن دەولەتێن داگیرکەر یێن کو ئەم نها دناڤا وان دا و زمانێ مە قەدەغەکریە و ل سەرا زمانێ خۆ دهێینە زیندانکرن و بدارڤەکرن. پێدڤیە ئەم ل زمان و کلتور و هونەرا خۆ خودان دەرکەڤین داکو زمانێن داگیرکەران ل سەر مە زاڵ نەبن، ژ بەر کو زمان، کلتور و هونەرا مە پیرۆزی و هەبوون و زێندیمانا نەتەوەیا مەیە
