ژ بۆ سەرۆکۆماریێ هەدەپێ بەربژێرێ خوە هەیە
هه‌ڤسه‌رۆکا هەدەپێ، په‌روین بولدان، د داخوویانیه‌کی دا گۆت کو، هەدەپە دێ ب به‌ربژێرێ خوه ته‌ڤلی هلبژارتنا سه‌رۆککۆماریا ترکیێ ببه. پشتی ڤێ داخوویانیا بولدان شرۆڤە و نرخاندنێن جودا هاتن کرن. ژ به‌ر کو هه‌تا بولدان ئه‌ڤ داخوویانی نه‌دایی، هەدەپێ دگۆت: “ئه‌گه‌ر ماسه‌یا ٦ قۆلی به‌ربژێره‌کی ل گۆرا پیڤانێن مه دەستنیشان بکن ئه‌م دێ پشگریێ لێ بکن” هه‌روه‌ها هەدەپێ ته‌نێ ناڤه‌ک ددا و دگۆت: ئه‌گه‌ر ماسه‌یا ٦ قۆلی سه‌رۆکێ شاره‌داریا ئه‌نقه‌ره‌یێ، مانسور یاڤاش، وه‌ک به‌ربژێرێ سه‌رۆککۆماریێ ده‌ستنیشان بکه ئه‌م پشگریێ لێ ناکن.
د بنگه‌هێ خوه دا ده‌ما داخوویانیێن هەدەپێ و تایبه‌تی یێن هه‌ڤسه‌رۆکێ به‌رێ ده‌مرتاش باش بهێنە نرخاندن، ڤه‌کری ئاشکرا دبە کو، دێ هەدەپە پشتگریا به‌ربژێرێ ماسەیا ٦ قۆلی کو ئه‌گه‌ر ئه‌و ژی سه‌رۆکێ جەهەپێ، کلچدارۆگلو، به بکه.
لێ د راستیا خوه دا نه داخوویانیێن هه‌ڤسه‌رۆکا هەدەپێ په‌روین بولدان و نه داخوویانیێن ده‌مرتاش و هه‌روه‌ها نه داخوویانیێن به‌رپرسێن دن یێن هەدەپێ د ڤێ ده‌ربارێ دا چو قیمەت و گرنگیا خوە نینە. ژ به‌ر کو ئه‌ڤێن ناڤێ وان ده‌رباس دبن نه خوه‌دی بریارن و جهێ بریارێ نه ناوه‌ندا هەدەپێ یه. جهێ بریارێ یان ئیمرالیه و یان ژی قه‌ندیله. هه‌رکه‌س دبینه ئه‌ڤه ده‌مه‌ک درێژه عەبدولا ئۆجەلان د ڤێ ده‌ربارێ دا چو داخوویانی نه‌دانه. لێ باش تێ زانین کو، ل ئیمرالی هه‌ڤدیتنێن ئاک پارتیێ دگه‌ل ئۆجەلان هه‌نه. په‌روین بولدان ڤێ یه‌کێ ژ هه‌رکه‌سه‌کیتر پتر دزانە. لێ هه‌رکه‌س ژ ئالیەکی دن ڤه داخوویانیا دنرخینه، ب ئاوایه‌ک دن ڤه‌کری مه‌یلا ده‌مرتاش ل سه‌ر ماسه‌یا ٦ قۆلی و تایبه‌تی ژی جەهەپێ یه. د ڤێ ده‌ربارێ دا ل بیرا مه‌یه کو د بوویه‌را پەقینا مه‌رسینێ دا، قەندیل بالا ده‌مرتاش کشاندبوو و هه‌تا ده‌مرتاش ب نێزکبوونا جەهەپێ تاوانبار کر بوو .
ژ ئالیه‌ک دن ڤه گه‌له‌ک ڤه‌کری و ئاشکه‌ره‌یه کو، ئه‌گه‌ر هەدەپە د هلبژارتنان دا ژ بۆ سه‌رۆککۆماریێ به‌ربژێرێ خوه هەبە، ئه‌ڤ ژی د به‌رژه‌وه‌ندیا ئاک پاره‌تیێ دا یه و ئاک پارتی ژی ڤێ یه‌کێ داخوازە. ڤێجا هلبژێرێن هەدەپێ دێ چه‌وا ڤێ ره‌وشێ بنرخینن و دێ چەوا ده‌نگن خوه بدن ئه‌ڤ بازاره‌ک دنه.
وه‌ک دن ژی هەدەپە دگه‌ل پارتیێن چه‌پێن مارژینالێن ترک د ناڤا تفاقه‌کێ دا یه. ئه‌ڤ ژی “تفاقا که‌د و ئازادیێ” یه. تفاقا که‌د و ئازادیێ به‌ری دو رۆژان داخوویانیه‌ک راگەهاند و ڤه‌کری گۆت: “ئه‌م وه‌که “تفاقا که‌د و ئازادیێ” د ڤێ مژارێ دا ب به‌رپرسیاریا خوه یا دیرۆکی دزانن و ژ هه‌ر ده‌مێ پتر ب بریارن کو ئه‌رکا خوه یا رزگارکرنا ترکیه‌یێ ژ شه‌رت و مه‌رجێن هه‌یی ب جهبینن. د پێڤاژۆیا دیارکرنا نامزه‌تێ خوه یێ د هلبژارتنێن سه‌رۆککۆماریێ دا، ئه‌م رادگەهینن کو ئه‌م زێده‌تر نێزیکی بژارده‌یا نامزه‌تێ هه‌ڤپارن کو ل گۆری پره‌نسیبێن مه یه و ب لهه‌ڤکرنێ بێته دیارکرنن.”
گه‌له‌ک جارا هاتیه نڤیساندن کو، ئاک پارتی و جەهەپە ل سه‌ر ده‌نگێن هەدەپێ حەسابێ دکن و هه‌ر ئالیه‌ک دگەل هەڤالێن خوە یێن د ناڤ هەدەپێ دا هەول ددن کو دەنگێن وێ بدەست بخن. ئاک پارتی ل سه‌ر ئۆجەلان و جەهەپە ژی ل سه‌ر ده‌مرتاش و هه‌تا راده‌یه‌کی ل سه‌ر قه‌ندیل دله‌یزه. به‌رپرسێن هەدەپێ و تایبه‌تی بولدان ژ نها ڤه زه‌مینێ هه‌لوه‌ستا کو هەدەپە ده‌ینێ هۆلێ چێدکه. ممکنه نه ئۆجالان و نه ژی هەدەپە ڤه‌کری پشگریه‌کی نه‌دن ئاک پارتیێ، لێ دێ ئه‌و ب ئاوایه‌ک کو به‌رژه‌وه‌ندیا ئاک پارتیێ را هه‌لوه‌ستا خوه بدن نشاندان.
ل باژاران ده‌نگده‌رێن هەدەپێ ڤه‌کری دبێژن کو، چو رۆلێ ئۆجەلان نه‌مایه و ژ بۆ ڤێ ژی هلبژارتنێن شاره‌داریا و هه‌لوه‌ستا ئۆجەلان ددن نشاندان.
دکارن به‌هسا “پێڤاژۆیه‌ک دن ئا چاره‌سه‌ریێ” بکن دا کو هه‌لوه‌ستا خوه مه‌شروع بکن. لێ دخوه‌یێ نها ئاک پارتی ژ ڤێ یه‌کێ گه‌له‌کی دووره. که‌سه‌ک ناخوازه سیاسه‌ته‌ک دن ئا “خه‌نده‌کا” ده‌رکه‌ڤه هۆلێ. بێ گومان ده‌ستپێکرنا پێڤاژۆیه‌ک دن دگه‌ل پەکەکێ ب هه‌ر ناڤی به دێ تراژیدیه‌ک دن بینه سه‌رێ مڵه‌ته کورد..
نووچە/ئەنالیز
