ب تایبه‌تی پشتی ئۆپه‌راسیۆنێن ترکیێ ل باشوورێ کوردستانێ ل دژی چه‌کدارێن پارتیا كاركەرێن كوردستانێ (پەکەکێ)، ئێریشێن پەکەکێ د وارێ سیاسی و راگەھاندنێ دا ل هەمبه‌ر پارتیا دەمۆكراتا كوردستانێ (پەدەکێ) گه‌له‌ک دژوار بوونه. ڕۆژانه د کەنالێن ته‌له‌ڤزیۆنێن گرێدایێ پەکەکێ و د ڕۆژنامه و مالپه‌رێن وێ دا شه‌ره‌ک بێ سنۆر و گەلەك دژوار ل دژی پەدەکێ دھێتە کرن.
پەكەك، هه‌روه‌ها، د وان ئێریشێن خوە یێن راگەھاندنێ دا پەدەکێ ب ئیتیهامێن مه‌زن تاوانبار دكە و گه‌له‌ک ده‌ره‌و و بێبه‌ختیێ ل هەمبه‌ر پەدەکێ دكە. ده‌ما پەکەکە ڤێ یه‌کێ دکه ئارمانجه‌کا وێ و هنده‌ک سه‌ده‌مێن تایبه‌ت هه‌نه. پەکەکە ژ بۆنا سیاسه‌تا خوه یا قرێژ ڤه‌شێره و کریارێن خوە یێن خراب کو ل هەمبه‌ر ته‌ڤگه‌را ئازادخوازا کورد دکه ژ چاڤان دوور بێخه شه‌رێ پەدەکێ دکه.
د بنگه‌هێ خوه دا، پەکەکە شه‌رێ ده‌ستکه‌فتیێن کوردستانێ و خه‌تا نه‌ته‌وی دکه. ل باشوورێ کوردستانێ، به‌شه‌ک مه‌زن کو د بن ده‌ستهلاتا یەكێتیا نشتمانیا كوردستانێ (یەنەکێ) دا یه ، پەکەکە ل وان دەڤەران خوه‌دی باندۆره. یەنەکێ و هێزێن د ناڤا وێ دا ڕێ دانه پەکەکێ و ئیرۆ ژی نکارن ل هەمبه‌ر شاشی و خه‌له‌تیێن پەکەکێ ده‌نگێ خوه بلند بکن. ژ ئالیه‌ک دن ڤە که‌سایه‌تێن وه‌ک لاهورشێخ جەنگی و هه‌ڤالێن وی د گه‌ل پەکەکێ دخه‌بتن و ئارمانجا وان یا هه‌ڤبه‌ش تێکبرنا پەدەکێ یه.
ئیرۆ ل کوردستانێ پەدەکە نوونه‌رتیا خه‌تا نه‌ته‌وی و کوردستانی دکه. ژ خوه ژ بەر ڤێ ژی پەکەکە ل دژی پەدەکێ د ناڤا شه‌ره‌ک سیاسی دا یه. هه‌رگاڤ ته‌هلووکه هەیه کو پەکەکە ئێریشێن دن ژی ل دژی پەدەکێ بکه.
لێ وه‌ک هه‌ر جار، پەکەکە سیاسه‌ته‌ک دوروو بڕێڤه دبه. ژ ئالیه‌کی ڤه یێن وه‌ک مورات کارایلان، په‌یامێن نه‌رم ددن و داخوازیا هه‌ڤکاریێ د گه‌ل پەدەکێ دکه، ژ ئالیه‌ک دن ڤە یێن وه‌ک دوران کالکان و به‌سێ هۆزات ل دژی پەدەکێ یا هه‌ری خراب دبێژن. مالپه‌را (لێکۆلین) کو سیاسه‌تا قه‌ندیل تەمسیل دكە، پەدەکێ ب خیانه‌تێ ئیتهام دکه. لێ ژ ئالیه‌ک دن ڤه ب ڕێیا ده‌زگه‌هێن گرێدایی پەکەکێ وه‌ک؛ کەنەکە و هەدەپێ ژی داخوازیا یه‌کتیی و براتیێ دکن و ب ده‌ڤنه‌رمیه‌کێ به‌حسا “یه‌کتیه‌ک نه‌ته‌وی“ دکن. ئه‌ڤ ته‌ڤگه‌را پەکەکێ هه‌موو ته‌کتیکه چ دروستیەك د ته‌ڤگه‌را وان دا نینە،
نها ھەلوەستا پەدەكێ گه‌له‌ک گرینگه. ده‌ما ده‌زگه‌هێن گرێدایی پەکەکێ به‌حسا یه‌کتیه‌ک نه‌ته‌وی دکن، دڤێ پەدەکە حسابێ ژ بۆ دروستبوونا وان ھەلوەستا بكە كا گەلۆ ب راستی ئەو دخوازن یەكێتیەك نەتەوەیی ئاڤا بكەن یان ژی خاپاندنە، دڤێ پەدەكە ب لەیزتكێن وان نەھێتە خاپاندن.
یا هه‌ری گرینگ دڤێ پەدەكە و ئالیێن سیاسی یێن کوردستانی تێبگەهن کو ده‌ردێ پەکەکێ یێ کوردستانیبوونێ نینە. پەکەکە و هه‌موو ده‌زگه‌ھ و هێزێن پێڤه گرێدایی نه کوردستانینه. سیاسه‌تا پەکەکێ ژ ئالیێ هنده‌ک ناوه‌ندێن ستراته‌ژیک ڤه تێ دیاركرن و ژ بەر ڤێ ژی هه‌موو ستراته‌ژیا وان ل سه‌ر تێکبرنا ده‌ستکه‌فتیێن نه‌ته‌وی و کوردستانی و تێكدانا جڤاتا کورده.
د ده‌مه‌ک نێزیک دا به‌رپرسێن پەکەکێ چه‌ند داخوویانی دان و دبێژن:
هه‌ڤسه‌رۆکا کەجەکێ، به‌سێ هۆزات: شه‌نگال نه به‌شه‌ک ژ کوردستانێ یه، شه‌نگال ئاخا عیراقێ یه.
دوران کالکان: ئه‌م کوردستانه‌ک ئازاد ل باشوور ناخوازن.
هاتپ دجله: که‌رکووک نه به‌شه‌ک ژ کوردستانێیه، به‌شه‌ک ژ عیراقێ یه و یا گه‌لانه.
موستافا کاراسو: ئه‌م ژیانه‌ک بێ ده‌وله‌ت و بێ زه‌واجا ژن و مێرا دخوازن.
ڕه‌مزی کارتال: کورد ده‌وله‌تێ ئاڤا بکن ئه‌م ڕێ نادن ڤێ یه‌کێ.
مرۆڤ دکاره ب ده‌هان میناکێن به‌رپرسێن پەکەکێ و ده‌زگه‌هێن پێڤه گرێدایی ب ڤی ئاوایی بده. هه‌ری داوی ئۆجالان د په‌یاما خوه ده دبێژه: چ پێوستیا کوردان ب ده‌وله‌ته‌ک جودا نینە.
گه‌لۆ مرۆڤ ب چ مه‌ژییی دکاره به‌حسا کوردستانی و کوردبوونا وان بکه؟ ئه‌گه‌ر ئیزاحا ڤێ هه‌بە بلا هنده‌ک ده‌رکه‌ڤن و بێژن. پەکەکە نه ته‌ڤگه‌ره‌ک کوردستانیه و هه‌ر كەسێ سیاسه‌تا پەکەکێ وه‌ک ته‌ڤگه‌ره‌ک کورد و کوردستانی بحه‌سێبینه و ل گۆرا ڤێ ل گه‌ل پەکەکێ بده و بستینه نه‌حه‌قیا هه‌ری مه‌زن ل خوه و سیاسه‌تا خه‌تا نه‌ته‌وی دکه.
ئانالیز/ن.فرات
2019-08-14
