د هلبژارتنێن ئه‌نجومه‌نێن پارێزگه‌ها که‌رکووکێ دا ژ به‌ر پارچه‌بوون و به‌شدارنه‌بوونا ئالیێن کوردستانی ب یه‌ک لیسته، کورد دێ زێده‌تری ٥۳ هه‌زار ده‌نگان ژ ده‌ست بدن.
ل گۆری ئه‌نجامێن رۆژا سێشه‌مێ ۱۹-۱۲-۲۰۲۳، کۆمیسیۆنا بلند ئا سه‌ربخوه یا هلبژارتنان، پارتیێن کوردستانی ل که‌رکووکێ ۲۱۷ هه‌زار و ۸۱٥ ده‌نگ ب ده‌ست خستنه و ده‌نگ ب ڤی ئاوایی نه: یه‌کیتیا نشتمانی یا کوردستانێ ۱۳۹ هه‌زار و ۳۷۳ ده‌نگ؛ پارتیا ده‌مۆکراتا کوردستانێ (پدک) ٤٦ هه‌زار و ۷٤۹ ده‌نگ؛ ته‌ڤگه‌را نه‌وەی نووێ ۲٤ هەزار و ٦٢٠ ده‌نگ؛ هه‌ڤپه‌یمانیا مه‌شخەلا که‌رکووکێ کو ژ یەکگرتوو و کۆمه‌ل پێک دهێت، ٦ هه‌زار و ٦٥٥ ده‌نگ و پارتیا سۆسیالیست ده‌مۆکرات ئا کوردستانێ ژی ۳۷۷ ده‌نگ بده‌ست خستن.
لێ به‌لێ پارتیێن کوردستانی ب یه‌ک لیسته به‌شداری هلبژارتنان نه‌بوون و ده‌نگێن نه‌وه‌ی نووێ، هه‌ڤپه‌یمانیا مه‌شخەلا که‌رکووکێ و پارتیا سۆسیال ده‌مۆکرات تێرا وه‌رگرتنا کورسیان نه‌کر. ئه‌ڤ ده‌نگ کو دبنە ٥۳ هه‌زار و ٦۱۷ ده‌نگ هەمێ دێ پووچ بن و ب ئاڤێ دا چن
ژ به‌ر وێ یه‌کێ پارتیێن کوردستانی ژ ۱٦ کورسیێن پارێزگه‌هێ ته‌نێ ۷ کورسی بده‌ست خستنه و ئه‌نجامێن وێ ژی وها نه: یه‌کیتیا نشتمانی یا کوردستانێ (ینک) خوه‌دیێ ٥ کورسیان و پارتیا ده‌مۆکراتا کوردستانێ (پدک) ژی خوه‌دیێ ۲ کورسیانه.
