نڤیسار

ژ خەلك و عالەمێ را حەلال و ژ كوردان را حەرام

ل ڤێ جیهانێ هه‌موو ده‌وله‌ت و هه‌موو مله‌ت تێکلیێن وان ب هه‌ڤره‌ هه‌نه‌. تێکلیێن جڤاکی، ئابۆری، سیاسی، دپلۆماسی، عه‌سکه‌ری، ئیستخباراتی و …ھتد

وه‌ختێ ڤان تێکلیان ب هه‌ڤره‌ ژی دادنن ته‌نێ ئارمانجەك هه‌یه‌ كو ئه‌و ژی
به‌رژه‌وه‌ندیێن هه‌ڤبه‌شن. ئه‌م هه‌رن ژ کێ بپرسن ئه‌و دێ ژ مه‌ ڕا‌ بێژن کو ئه‌ڤ یه‌ک گه‌له‌ک نۆرماله‌…

باشه‌، تشتا کو ژ بۆ خه‌لکێ نۆرمال چما ژ بۆ مه‌ کوردان دبه‌ قه‌به‌حه‌ت؟

میناک؛ ده‌وله‌تا ترکیێ ل ئەمریكایێ 1 بالیۆزخانە، 6 کۆنسولخانە، 1 نوونه‌راتی و 6 کۆنسولخانەیێن فه‌خری ڤه‌کرینه‌.

ڕۆژه‌کێ ژ ڕۆژان من بخوه‌ نه‌بهیستیه‌ کو سیاسه‌تمه‌داره‌ک ئان ڕۆژنامه‌، ته‌له‌ڤزیۆن، پارتی و …ھتد. ئان که‌سه‌کی ترک ڕابە و ب خه‌رابی بەحسا ڤی تشتی کربه‌. به‌س، دیسا من بخوه‌ ملیۆن جاران دیتیه‌ کو سیاسه‌تمه‌دار، ڕۆژنامه‌ و ته‌له‌ڤزیۆنێن ترکان هه‌ر ب خه‌رابی بەحسا تێکلیێن کوردان و ئەمریکایێ و ده‌وله‌ت ئان مله‌تێ دن کرنه‌.

وه‌ختێ ئه‌و دکن عه‌ده‌ته‌، وه‌ختێ ئه‌م دکن قه‌پحه‌ته‌! وه‌ختێ ئه‌و دکن حه‌لاله‌، وه‌ختێ ئه‌م دکن حه‌رامه‌! وه‌ختێ ئه‌و دکن مسلمان و مۆئمنن، وه‌ختێ ئه‌م دکن ئه‌م سەھیۆنیست و کافرن! وه‌ختێ ئه‌و دکن دیپلۆماسیه‌، وه‌ختێ ئه‌م دکن خیانه‌ت و سیخوریه‌!

ژ به‌ر کو دخوازن ئه‌م هه‌رده‌م ب ڕێیا وان تێکلیان ب جیهانێ ڕا‌ دەینن و تێکلیێن مه‌یێن سه‌ربخوه‌ ب چ که‌س و دەولەتان ڕا نه‌بن‌. دا ئه‌و ژی کاربن ل گۆر کێفا خوه‌ ئه‌مر و فه‌رمانا بدەنه‌ مه‌…

ئه‌م دێ بێژن ئه‌و دوژمنن، داگیرکه‌رن چ بێژن بلا بێژن خه‌م ناکه‌! مخابن ئه‌م دبینن هندەك که‌س د ناڤ مه‌ بخوه‌ دا‌ هه‌نه‌ کو ئه‌و ژی هه‌مان تشتان دبێژن…

باشه‌ حه‌یران، گه‌ر هوون مسلمانن کا ژ مه‌ ڕا قوورئانێ ڤه‌کن ئه‌م ببینن ل کووده‌را وێ نڤیساندیه‌ “چێنابه‌ و حه‌رامه‌ کورد تێکلیان ب ده‌وله‌ت و مله‌تان ڕا دەینن.”

گه‌ر هوون کریستیانن ئنجیلێ، گه‌ر هوون جهوو نه‌ ته‌وراتێ بینن…

گه‌ر هوون کۆمونیستن کا ژ مه‌ ڕا‌ داس کاپیتالێ ڤه‌کن ئه‌م ب هه‌ڤره‌ لێ بنه‌رن كا ل کووده‌را وێ میراتێ نڤیساندیه‌ کو “نابه‌ کورد تێکلیان ب خه‌لک و عاله‌مێ ڕا‌ چێبکن.”

تشتا ژ خه‌لکێ ڕا حه‌لال ژ کوردان ڕا ژی حه‌لاله‌ وه‌کی شیرێ دایکا وان!

که‌س نکاره‌ د بن ناڤێ چ ئیدیۆلۆژیێ، سیاسه‌تێ و دین/ئۆل دا‌ ڤی مافێ ڕه‌وا ل مله‌تێ کورد قه‌ده‌خه‌ بکه‌. که‌سێن کو دخوازن ڤی تشتی بکن ئان مله‌تێ کورد کێمی هه‌موو مله‌تان دبینه‌ و ب چاڤه‌کی بچووک ل کوردان دنێرە‌ ئان ژی د بن باندۆرا ده‌وله‌تێن داگیرکه‌رڤە دفکرن و ته‌ڤدگه‌رن. ب هه‌ر دو ڕه‌نگا ژی ئه‌ڤ که‌س ب ڤان نێزیکاتیێن خوه‌ خزمه‌تا مله‌تێ کورد ناکن. حه‌یف و مخابن کو ئه‌ندامێن مله‌ته‌کی نه‌ د خزمه‌تا مله‌تێ خوه‌ و وه‌لاتێ خوه‌ دا‌ بن.

حه‌رام، گونه‌ھ و شه‌رم و عه‌یبا هه‌ری مه‌زن ژی ئه‌ڤه‌یە!

سەرھاد مێردینی

2020.06.25

Back to top button