ژ پەرلەمەنتەرین کورد تێ خوەستن ل مەجلیسا ترکیێ ب کوردی باخڤن
به‌رده‌ڤکێ پلاتفۆرما زمانێ کوردی شه‌ره‌فخان جزیری بانگ ل پەرلامه‌نته‌رێن کورد کر: “ل پەرله‌مه‌نتۆیێ ب کوردی باخڤن”.
به‌رده‌ڤکێ پلاتفۆرما زمانێ کوردی، شه‌ره‌فخان جزیری، ژ بۆنا کو ل تیرکیێ زمانێ کوردی ببه زمانێ فه‌رمی و په‌روه‌رده‌یێ دخه‌بته، داخوازا ئاڤاکرنا سازیا زمانێ کوردی یا کو ناڤه‌ندا وێ ل ئامه‌دێ به کر. جزیری ب هێجه‌تا کو نامزه‌تێن شاره‌داریان دڤێ ب کوردی زانبن، بانگ ل پەرلامه‌نته‌رێن کورد کر کو: “ل مه‌جلیسێ ب کوردی باخڤن”.
به‌رده‌ڤکێ پلاتفۆرما زمانێ کوردی شه‌ره‌فخان جزیری دیار کر کو ۱۰۰ سالن ل سه‌ر زمان و ناسنامه‌یا کوردی پێڤاژۆیا ئاسیمیلاسیۆنێ ددۆمه.
جزیری گۆت: “ده‌وله‌ت گه‌له‌ک جاران نزانه ژ کوردان چ دخوازه” و بەردەوامی بئاخاڤتنا خوە دا: “گۆتن ئه‌م دێ کوردان ژناڤببن. ل سه‌ر پرۆژه‌یان خه‌بتین. گه‌له‌ک تشت کرن، ژ زه‌واجا کورد و ترکان بگرن هه‌تا قه‌ده‌غه‌کرنا کوردی ل دبستانان، هه‌تا د وارێ په‌روه‌رده‌یێ دا کورد ل په‌ی خوه هشتن. ژ بۆ ل کوردستانێ زانینگه‌ه نه‌یێن ڤه‌کرن، ۱۰۰ سالن ده‌وله‌ت دخوازه کوردان بحەلینە و نەهێلە، لێ ئه‌م دبینن، کورد ۱۰۰ سالن ل به‌ر خوه ددن و ئاسیمیله نه‌بوونه، زمان، ناسنامه و دیرۆکا خوه پاراستیه. لێ ژ نها و پێ ڤه نابه کو ئه‌م ته‌نێ ب ڤێ میراته‌یا سه‌دسالی رازی ببن، دڤێ ئه‌م ڤێ یه‌کێ پێش بخن، ژ نها و پێ دا کوردی بکن پیڤانه‌ک سیاسی، د راستیێ دا دڤێ ئه‌م د لێکۆلینێن سیاسی دا بکن پیڤانا هه‌ری گرینگ.”
دڤێ نامزه‌تێن سه‌رۆککۆماریێ ب کوردی زانبن
شەرەفخان جزیری/به‌رده‌ڤکێ پلاتفۆرما زمانێ کوردی
جزیری ده‌ستنیشان کر کو ئه‌وێ ل تاخ و کۆلانان ژ بۆ به‌لاڤکرنا زمانێ کوردی بخه‌بتن و ده‌ستنیشان کر کو دڤێ سیاسه‌ت ژی ب به‌رپرسیاریا خوە رابه و بال کشاند سه‌ر گرینگیا رێڤه‌به‌ریێن هه‌رێمی. جزیری ب بیر خست و داخوازا کو زمانێ کوردی ببه زمانێ فه‌رمی و په‌روه‌رده‌یێ، داخوازا ئاڤاکرنا سازیا زمانێ کوردی ل ئامه‌دێ نوو کر.
جزیری ئیشاره‌ت ژ بۆ هلبژارتنێن هه‌رێمی یێن پاشه‌رۆژێ ئه‌ڤ پێشنیار ژ پارتیێن سیاسی یێن باژارێن کوردان را کر:
- دڤێ د رێڤه‌به‌ریێن هه‌رێمی دا بکارانینا کوردی ئه‌ساس بێ گرتن.
- دڤێ زانینا کوردی ببه پیڤانه‌ک هه‌ڤپار ژ بۆ هه‌موو نامزه‌تێن کو وێ به‌شداری هلبژارتنێن هه‌رێمی یێن هه‌رێما مه ببن. ئه‌م داخواز دکن کو هه‌موو نامزه‌دێن کورد ب کوردی باخڤن، گۆتووبێژان بکن، به‌شداری جڤین، کۆنفه‌رانس و پانه‌لان ببن.
- که‌سێن کو ژ بۆ شاره‌داریان تێن وه‌زیفه‌دارکرن دڤێ دوزمانی، کوردی و ترکی بن و د وارێ خوه دا پسپۆر بن. ئه‌م پێشنیار دکن کو د ڤی واری دا ئاماده‌کاری بێن کرن. ب ڤێ سه‌پانێ زمانێ کوردی قیمه‌تێ دستینه و دهێله کو کارمه‌ند د ده‌ما خزمه‌تا گه‌ل دا ب ره‌هه‌تی دانووستاندنێ بکن. ب ڤی ئاوایی کارێ گه‌لێ هه‌رێمێ هێسانتر دبه و د سازیێن فه‌رمی دا شانازیا ئاخافتنا ب کوردی تێ دیتن.
