سیاسی

ڤێ جارێ بەرسڤا وی هاتە دان

دوران کالکان ئه‌ندامێ رێڤه‌به‌ریا پارتیا کارکەرێن کوردستانێ(پەکەکێ)، گه‌له‌ک جارا د ئاخاڤتنێن خوه‌ دا پارتیا دەمۆکراتا کوردستانێ (پەدەکە) ب هنده‌ک تشتان تاوانبار دکه‌. پرانیا جاران پەدەکە گوهێ ناده‌ ڤان گۆتنان و بێ ده‌نگ دمینه‌. لێ جارنا ژی هنده‌ک به‌رپرسێن پەدەکێ پێوست دبینن کو به‌رسڤا کالکان بدن و ده‌ره‌وێن وی ئاشکه‌ره‌ دکن.

ئه‌ندامێ سه‌رۆکاتیا پەدەکێ، عه‌لی عه‌ونی به‌رسڤا تۆهمه‌تێن دوران کالکان دده‌ و دبێژه‌: “بێگومان بیره‌وه‌ریا دوران کالکان گه‌له‌ک کورته‌، پەدەکە ب سالان به‌ریا پەکەکێ هاتیه‌ دامه‌زراندن. به‌ریا ئاکەپێ پەدەکە هه‌بوو و د ته‌کۆشینێ دا بوو و گەلەک دەستکەفتی ژ بۆ کوردان ب ده‌ست خستنه‌. نموونه‌یێن وەکی دوران کالکان و هه‌ڤالێن وی ئه‌گه‌ر کوردایه‌تیێ فێر بووبن، ئه‌و ژ بارزانی و پەدەکێ فێر بوونه‌. چو نیه‌تا مه‌ ب ئاکەپێ را نینه‌، لێ ئه‌م ژ بۆ ئازادیا گه‌لێ کورد تێدکۆشن و مه‌ ل باشوور حکوومه‌ته‌ک ئاڤا کر و ئه‌م هه‌موو کاره‌کی دکن ژ بۆ کو حکوومه‌ت بمینه‌ و خوه‌ بپارێزه‌ و نه‌به‌ پرۆبله‌م ژ بۆ وه‌لاتێن جیران. یێ کو ژ بۆ ڤی وه‌لاتی و وی وه‌لاتی ڤێ رۆلێ دلیزه‌ و وان وه‌لاتان دکشینە هه‌رێما کوردستانێ پەکەکە یه‌. یێ کو ئارتێشا ترکی دکشینه‌ ناڤا خاکا کوردستانێ پەکەکە یه‌. هنده‌ک ژ پەکەکێ بەشەک ژ سازیا ئه‌رگه‌نه‌کۆنێ و ده‌وله‌تا ترکن، هنده‌ک ژی گرێدایی هێزا پاسادارێن ئیرانێ قرارگەها رەمه‌زانێ نه‌، هنده‌ک ژ وان مووچه‌یێ خوە ژ حه‌شدا شه‌عبی وەردگرن و مریێن وان ئێن ل شنگالێ وه‌که‌ شه‌هیدێن حه‌شدا شه‌عبی هاتنه‌ تۆمارکرن. هه‌رچ قرێژیا وان هه‌یه‌ دخوازن ل سه‌ر یێن دن، یانی دخوازن ده‌ستێن خوه‌ یێن قرێژ ل سه‌ر مه‌ پاقژ بکن.”

ل سه‌ر هه‌ولا پەکەکێ بۆ شه‌ره‌کی ناڤخوه‌یی ژی عه‌لی عه‌ونی دبێژه‌: “دخوازن مه‌ بخن ناڤا شه‌رێ ناڤخوه‌یی، پەدەکە، حکوومه‌ت و هه‌موو هه‌رێما کوردستانێ ناخوازن دژی پەکەکێ شه‌ر دورست ببه‌. ئه‌م ناخوازن ئەو نه‌خشه‌یا پەکەکێ و ئاغایێن وێ دخوازن ل هه‌رێما کوردستانێ وه‌ره‌ جیبجیکرن.

ئه‌م د وێ باوه‌ریێ دا نه‌ کو ل شوونا کو ئه‌م ب پەکەکێ را شه‌ر بکن، باشتره‌ کو ب ئاغایێن پەکەکێ و یێن کو پێشه‌نگیا پەکەکێ کرنه‌ را موزاکه‌ره‌ و دیالۆگ بکن، دا کو ئه‌ڤ شه‌ر ژ هه‌رێمێ دوور بکه‌ڤه‌، بلا پاشڤه‌ ڤه‌گه‌ره‌.”

Back to top button