ئه‌ندامێ کۆمیته‌یا رێڤه‌به‌ر یا پەکەکێ، موراد کارایلان د هەڤپەیڤینەکا خوە دا دگەل ته‌له‌ڤزیۆنه‌کا نێزیکی پەکەکێ دا هنده‌ک سرێن هه‌ڤدیتنا یەپەگە-پەیەدێ و ترکیێ ئاشکه‌ره دکە.
موراد کارایلان د وێ هەڤپەیڤینا خوە دا دبێژه: “هه‌ڤسه‌رۆکێ پەیەدێ، سالح موسلم، چه‌ند جاران چوو ترکییێ. وێ ده‌مێ د ناڤبه‌را مه و ده‌وله‌تا ترکییێ دا ژی ئاگربه‌ست هه‌بوو. پێڤاژۆیه‌ک ژێ را دهاته گۆتن “پێڤاژۆیاچاره‌سه‌ریێ” لێ نه چاره‌سه‌ری بوو.”
کارایلان دبێژە کو د د جڤینێن سالح موسلم یێن دگەل بەرپرسێن دەولەتا ترکییێ دا، ده‌وله‌تا ترک داخواز کریە کو، کورد ژی شەرێ شامێ بکن و دەولەتا ترک ب ڤەکری داخواز دکر کو کورد دەست دەینن سه‌ر قامشلۆیێ و ژ وێرێ بەر حه‌له‌بێ ڤە بچن، ترکیێ دخوه‌ستن حه‌له‌بێ تێک ببن، ب ده‌ست خوه بخن و بچن شامێ.
کارایلان دا زانین کوردان ئه‌و داخوازێن ترکیێ قه‌بوول نه‌کرن و گۆت: “مرۆڤ دکاره ببێژه ئه‌ردۆگان سیاسه‌تا ل سه‌ر کوردان، ل سه‌ر ڕۆژاڤا گوهه‌رت، یه‌ک ئەگەر ژی ئه‌ڤ بوو. ڕاسته به‌لکی نه هه‌موو سه‌ده‌م به، لێ به‌لێ ئەگەرەک ژی ئه‌ڤ بوو. سیاسه‌تا کورد د خه‌ته‌کێ دا ئیسرار کر، ل دژی سووریه‌یێ شەر نەکە. ئه‌گه‌ر کوردان ل دژی سووریێ شەر بکرایە وێ سووریه ژ هەڤ بکەتایە. نها سووریه پالا خوه دده رووسیایێ، دده ئیرانێ. لێ به‌لێ ده‌ستپێکێ، مه‌سه‌لا هین د ۲۰۱۲ئان دا، ۲۰۱۳ئان دا ئه‌گه‌ر کو کورد ژی وه‌که کو ترکیه دبێژه به‌شداری وان ببوویا، وێ تێک بچوویا.”
کارایلان وها گۆت: “دڤێ به‌شار ئه‌سه‌د شاشتیان نه‌که و ل دیرۆکێ ڤه‌گه‌ره و ببینه کو چاوا حافز ئه‌سه‌د ل هه‌موو ئه‌نیان ل به‌ر خوه دا، ئه‌ڤ یه‌ک ب پشته‌ڤانیا کوردان بوو، چ ب فه‌رمی و چ ژی نه ب فه‌رمی.”
ب گۆتنا کارایلان “سیاسه‌تا ئه‌ردۆگان سووریێ گەهاند ره‌وشا نها، کو چه‌ته ل دۆرا خوه کۆم کرن و سووریێ وێران کر. دڤێ ئه‌سه‌د باوه‌ریا خوه ب ئه‌ردۆگان نه‌ینه، ژ به‌ر ژ بۆ سه‌رکه‌فتنا د هلبژارتنان دا ئه‌ردۆگان دخوازه به‌شار ئه‌سه‌د ب کار بینه.”
