ڕۆژەڤ بابەتێ کۆچا ب کۆم یا (گەنجان)ـە، گەنج ب جارەکێ ژ بێکاریێ و بێئومێدیێ داگرتینە. د ئەڤێ بەینێ دا، کوڕە هەژارەکێ گەنج، د ناڤا جەرگێ پایتەختێ وەڵاتێ لوبنانا عەرەبی دا، مژوولی شەڕێ بدەستڤەئینانا ناسناڤێ سەرکەڤتییێ ئێکێیە بۆ خەلکێ هەرێما کوردستانێ. ئەو کوڕە گەنجێ ماندینەنیاس (کاپتن حەجی عەبدلسەلام ڕێکانی)ـیە. دەرئەنجام؛ پشتی ئەنجامدانا هژمارەکا زنجیرەییا ڕاهێنانێن گران، کاپتن حەجی ڕێکانی شیا ناسناڤێ (ئێکەم ل سەر ئاستێ هەمی کیشوەرێ ئاسیا) د ئەوێ یارییا لەشجوانییێ دا، بدەستخوەڤە بینیت.
دەم دەمێ ڤەگەڕیانا کاپن حەجی ڕێکانی یە بۆ کوردستانێ، کاپتن تامەزروویێ چرکاندن و پێناساندنا سەرکەڤتنا بدەستڤەهاتییە بۆ خەلکێ کوردستانێ ب گشتی و خەلکێ دهۆکێ ب تایبەتی. جارنا د خەیالا خوەدا چاڤەڕێی پێشوازی و پێشدەمە دەستخوەشییا لایەنێن پەیوەندیدار یێن پارێزگەها دهۆکێ یە. بەلێ دگەل گەهشتنا ئەوی بۆ باژێڕێ دهۆکێ، چو ئالیەکێ پەیوەندیدار پێشوازی و دەستخوەشییا پێشدەم ئاراستەیی ناڤبری نەکر! ئەڤ چەندە ژی بۆ ئەگەر کو کاپتن حەجی ڕێکانی خەمگرتی ببیت و بۆ دەمەکێ سوشیال میدیا ژ بابەت و سەرپێهاتییا ئەوی پڕ ببیت.
یا ڕاستی حەجی ڕێکانی (ب ڕەنگەکێ نەڕاستەوخوە) ب نوینەرێ گەنجێن پشتگوهخستی یێن باژێڕێ دهۆکێ هاتە زانین، لەوڕا ژی ناسیار و نەناسیارێن کاپتنی (ب تایبەتی ژ تەخا گەنجان) ب جارەکێ هەلویست نیشاندان و گلەیی ژ کێمخەمییا ئالیێن پەیوەندیدار کرن، د هەمان دەم دا دەستخوەشی و پیرۆزباهی ئاراستەیی گەنجێ سەرکەڤتنی (کاپتن حەجی ڕێکانی) کرن.
* کاپتن حەجی ڕێکانی د گەلەک پێشبرکەیێن لەشجوانیێ دا ناسناڤێن جیهانی و هەرێمی ب دەست خستنە و د هەمی سەرکەڤتناندا، خەلاتێن خوە پێشکێشی خێزانێن شەهیدان و شەهیدێن زیندی یێن شەڕێ داعش و پێشمەرگە یێن قەهرەمان کرینە و د دوماهیک گوتنا خوەدا، حەجی ڕێکانی دبێژیت: “هیڤیخوازم کو ئەز بشێم خەلاتێ ئێکەم ل سەر ئاستێ جیهانێ د پێشبڕکێیا یارییا لەشجوانییا بهێت دا، بدەستخۆڤە بینم و ئەوی خەلاتی پێشکێشی بابێ مەزن (سەرۆک مەسعود بارزانی) بکەم”.
