ئەی مللـەتێ من، ئەز کوردستانم، نە بتنێ پارچەیەکا ئەردی، بەلکو ئەز مێژوو و ناسنامەیا هەوە مە. ئەز ئەو خووینم یا کو دناڤ دەمارێن باب و باپیرێن هەوەدا دگەڕیا، و ئەز شاهدا وان ڕۆژێن سەختم یێن کو مان و نەمانی تێدا موعجیزەیەک بوو.
ل سەر سینگێ من، لەشکەرێن داگیرکەرا هاتن و چوون، لێ ئەز هەر ب پێیان مام. من چیایێن خۆ کرنە سەنگەر، و نهالێن خۆ کرنە کەلهە، و خۆ کرە قەلغانەک ژ بۆ پاراستنا هەوە ژ هەر دەستەکێ کو ب خرابیێ بەرەو هەوە دهات.
من چ جاران بەرامبەر وان هەمی قوربانیان داخوازا چ تشتى ژ هەوە نەکریە، بتنێ داخوازا من ئەو بوو کو هوین ئێکگرتى بمینن، هەروەکی کو هین ژ زکێ ئێک دایک بووین. لێ ئەڤرۆ ئەز دبينم هوین ژ ئێکدو دوور دکەڤن، وەکو وان بەرێن ڕویبارى یێن کو دەما ئاڤ نامینیت ژێکجودا دبن.
هەوە ئالایێ منێ پیرۆز دناڤبەرا بەرژەوەندیێن حزبی دا پارچە پارچە کر، و هەوە ئەز کرمە مەیدانا کێبرکێ و ناکۆکیان، ل جهێ کو ئەز بمە سیبەرا ئارامی و هەمبێزا ئێمناهیا هەوە.
هشیار بن، هەرگاڤا هوین ژ ئێکدو دوور بکەڤن، ئەز لاواز دبم، و هەرگاڤا ناکۆکی بکەڤیتە دناڤبەرا هەوە، دژمن پتر نێزیکی دلێ من دبیت. ئەو دەستکەفتێن بۆ مە ماین گەلەک نینن، و پارچەبوونا هەوە، وێ کێمێ ژى کێمتر لێدکەت، حەتا کو چ نامینیت.
فێرگەهـ و نەخۆشخانە و ڕێک و پر و هەمی دامەزراوەیێن من، مولکێ چ کەس و لایەنەکى نینن، بەلکو ئەڤە بەرهەمێ خووینا شەهیدان و خوهـ و مانديبوونا دەیكانە.
ئەز نە کارتا یارییا سیاسەتمەدارانم، و نەژی میراتەکم کو هەر کەسەک ل دووڤ حەز و ئارەزوویێن خوە ل سەر دابەش بکەت. ئەز وەلاتەکم، ئەگەر ئەز ژ دەست چوم، هەمی تشت دێ دگەل من ژ دەست چیت.
ئەز هەوە ئاگەهدار دکەم… ئەگەر هوین ل سەر ڤێ ڕەوشا پارچەبوونێ بەردەوام بن، هوین دێ من ژ دەست دەن، بێی کو دژمن پێدڤی ب تەقاندنا ئێک گولـلەیێ ژی ببیت.
و لبیرا هەوە بیت، دەمێ ئەز بکەڤم… نە چیایەک و نە ڕویبارەک دێ دگەل من کەڤیت، بەلکو هوین بخوە دێ کەڤن، و هوین دێ بنە بیانی ل سەر وى ئەردێ کو ڕۆژەکێ ژ ڕۆژان هین خودانێن وى بوون.
