رۆژه‌کێ مریشکا گوندیەکی تێ دزین
کورێ مالێ ژ بابێ خوه را دبێ “یابۆ، مریشکا مه هاتیه دزین”.
باب ژ کورێ خوه را دبێ، ” کورێ من ل مریشکا خوه بگەرهە”.
لاو گۆتنا بابێ ناکه تشته‌ک، د دلێ خوه دا دبێ، “ده مریشکه‌که، هه‌ما چوو چوو ما دنیا خراب نابه”.
پشتی چه‌ند رۆژان ئیجار چه‌ند په‌زێ وان تێ دزین. باب دیسا ژ کورێ خوه را دبێ، “کورێ من ل مریشکێ بگەرهە”.
کور دیسا فێهم ناکه و گۆتنا بابێ خوه ناکه تشته‌ک.
چه‌ند رۆژێن دن ئیجار چێله‌ک، پشترا که‌ر و هه‌سپێ وان تێن دزین.
باڤ دیسا ژ کورێ خوه را دبێ “هەرە ل مریشکێ بگەرهە”.
کور عاجز دبه و ژ بابێ خوە را دبێ: “که‌ر و هه‌سپ هاتنه دزین تو به‌هسا مریشکێ دکی یابۆ”.
باب دبێ: “کورێ من، هه‌گه‌ر ته بدایا دووڤ مریشکا خوه، که‌سێ په‌ز، چێله‌ک، که‌ر و هه‌سپێ ته نه‌ددزی”.
ئه‌ڤ سه‌رپێهاتی پارچه‌یه‌ک ژ راستییا مه و دیرۆکا مه یه و هه‌تا ب ئیرۆ ژی بەردەوام دکە.
ئه‌م هه‌ر تشتی، هه‌ر کوژتنێ، هه‌ر داگیرکرن و پارچه‌کرنێ ب نه‌یار و دژمنێن خوه، ب ده‌وله‌تێن بیانی ڤه گرێددن. مریشکا مه هات دزین مه ده‌نگێ خوه نه‌کر، په‌ز و ده‌وارێن مه هاتن دزین مه ده‌نگێ خوه نه‌کر، عه‌رد و زه‌ڤییێن مه هاتن دزین مه ده‌نگێ خوه نه‌کر. و د داوییێ دا وه‌لاتێ مه بێیی ئیراده‌یا مه هات پارچه‌کرن و دزین مه دیسا ده‌نگێ خوه نه‌کر.
یانی، پشتی ترێ که‌زیکورێ!
پشتی کو هه‌ر تشتێن مه، هه‌ر نرخێن مه ژ ده‌ست مه چوون، ژ نوو ڤه مریشک تێ بیرا مه و ئه‌م ددن دوو خوه‌زییان.
ژ به‌ر کو مه نه‌دایه دوو تشتێن بچووک، مه تشتێن مه‌زن ژی ژ ده‌ست ره‌ڤاندنه. هه‌ر چقاسی په‌یمانا لۆزانێ د دیرۆکا مه کوردان دا خوه‌دییێ جهه‌کی تایبه‌ت و کاره‌ساته‌ک هه‌ری مه‌زن و رووپه‌له‌ک رووره‌شییێ به ژی، بچووک یان مه‌زن نموونه‌یێن ب ڤی ئاوایی د دیرۆکا مه ده پرن. هه‌ر چقاسی تێ گۆتن کو ئه‌ڤ په‌یمان بێیی ئیراده‌یا کوردان هاتیه چێکرن ژی، د ئه‌ساسێ خوه دا ب ئیراده‌یا مه، ب داخوازا مه هاتیه ئیمزاکرن. ژ خوه هه‌گه‌ر ئیراده، هه‌ست و هه‌لوه‌سته‌ک نه‌ته‌وی، هزر و هشمه‌ندییه‌ک کورده‌واری و کوردستانی ب مه را هه‌بوویا، په‌یمانێن وه‌ک لۆزانێ ژی وێ بێیی ئیراده‌یا مه نه‌هاتنا ئیمزاکرن. ژ به‌ر ئیراده نینە خوه‌دییێ وێ ئیراده‌یێ ل هۆلێ نینە و کوردستان وه‌ک ماله‌کا بێخوه‌دی، وه‌ک ملکێ خه‌زینێ ل مه‌یدانێ یه، هه‌رکه‌س دکاره لێ خوه‌دی ده‌رکه‌ڤه. وه‌ک دبێژن، پشیک نه ل مال به مشک ئه‌ڤدره‌حمان ه.
د دیرۆکێ دا گه‌له‌ک ده‌رفه‌ت که‌تن ده‌ستێ کوردان، لێ ب کار نه‌ئانین. نه‌بوونا تفاق و یه‌کیتییێ، قه‌لسبوونا ئیراده و هشمه‌ندییا نه‌ته‌وی، به‌رژه‌وه‌ندییێن مالباتی، عه‌شیرتی و پارتیتییێ، رێ ل به‌ر ئیراده‌یه‌ک نه‌ته‌وی گرت و بوون سه‌به‌بێ بنده‌ستی و داگیرکرنا کوردستانێ. ئه‌ڤ یه‌ک پێر ژی ولۆ بوو، دۆهی ژی ولۆ بوو، و ئیرۆ ژی ولۆ یه. د ئه‌ساسێ خوه دا کوردستان نه‌هاتیه پارچه‌کرن، نه‌هاتیه داگیرکرن، هه‌ست و هه‌لوه‌ست، ئیراده و مه‌ژییێ مه هاتیه داگیرکرن. کوردستان نه ب ده‌ستێ خه‌لکێ، ب ده‌ستێ مه ب خوه هاتیه پارچه‌کرن. هه‌م ژی نه ته‌نێ لۆزانه‌ک، ب ده‌هان په‌یمانێن لۆزان ب ده‌ستێن مه هاتنه ئیمزاکرن.
دبێژن تشتێ چوو نه‌دن دوو. یا گرینگ ئه‌ڤه کا ئه‌م دێ چاوا کاربن رێ ل به‌ر لۆزانێن نوو بگرن، کو ب ڤی حالێ خوه ئه‌ڤ ژی نه ممکن و نه مسۆگه‌ره. ب ڤی حالی و ب ڤێ ره‌وشا کو ئیرۆ ئه‌م کورد تێ دا نه، ده‌ڤ ژ لۆزانێ به‌ردن، ئه‌م نکارن رێ ل به‌ر پارچه‌کرن و داگیرکرنا گونده‌کی بگرن. ژ بۆ رێ ل به‌ر لۆزانێن نوو بگرن، د سه‌ری دا دڤێ ئه‌م وه‌ک لبێن تزبییێ یه‌کۆ یه‌کۆ و ب ده‌ستپێکه‌ک نوو ده‌ست ب دۆزێ بکن. دڤێ ب روحێ کوردایه‌تییێ، نه ب مه‌ژییه‌کی داگیرکری لێ ب مه‌ژییه‌کی سافی و زه‌لال خوه ژ پاشه‌رۆژێ را ئاماده بکن. دڤێ ئه‌م ژ لۆزانێ ده‌رسێن دیرۆکی بستینن، ب یه‌کیتی و براتییێ به‌رێ خوه بدن پاشه‌رۆژێ.
هه‌گه‌ر ئه‌م جوداهییێن خوه، ناکۆکی و به‌رژه‌وه‌ندییێن خوه نه‌دن ئالییه‌کی، ئه‌م دێ د گه‌له‌ک لۆزانێن نوو دا بفه‌تسن و هه‌رن. پاراستنا کوردستانا مه‌زن، پاراستنا زمان، ناسنامه و نرخێن نه‌ته‌وی بنگه‌ها هلوه‌شاندنا لۆزانێن نوو نه.
ب کورت و کورمانجی؛ کوردستان نه ل لۆزان یا سویسرەیێ ل کوردستانێ و ب ده‌ستێ کوردان ب خوه هات پارچه‌کرن و هوون ساخ….
نووری چه‌لیک
