کوردنۆ هەم شیار بن و هەم ژی ئاگاهدار بن
بووبێ ئه‌سه‌ر
ترکیه ڕۆژ ب ڕۆژ به‌رب فه‌لاکه‌تێ ڤه دچە، چەند کو تەعدایی و زۆری ل تركیێ تێ كرن ئه‌و ژی که‌لا (کین) خوه د سه‌رێ کوردان ڕا ده‌ردخه.
ژ به‌ر کو نها ئه‌و ته‌نێ دشێتە كوردان، هه‌گه‌ر ئه‌م ژی خوه‌دی ده‌وله‌ته‌کێ بانا، ترکان نەدكاری هه‌می تشتێن خه‌راب و نه د جھ دا بینیتە سه‌رێ مه و گه‌لێ مه.
ئەڤ کریار و بوویه‌رێن ترکان ڕۆژ ب ڕۆژ زێده دبن. ڕۆژ ب ڕۆژ ئه‌و هار و دین دبن. ژ به‌ر کو وان ل باکورێ کوردستانێ ل سه‌ر ده‌ستێ پەکەکێ کوردێن وه‌لاتپارێز بێ ده‌نگ کرنه و دکن.
ئەگەرا بێ ده‌نگیێ پر ئالی یه. یه‌ک ژ وان ژی ئه‌وه کو هه‌گه‌ر ته ده‌نگه‌کی نزم ژی ل هه‌مبه‌ر ڤێ ده‌وله‌تا داگیرکه‌ر و فاشیست ده‌رخست، ئه‌و ته یه‌ک سه‌ر دگره، کارێ ته ژ ده‌ستێ ته دھەرە. ب ڤێ یه‌کێ پشتا ته دشکینه کو تو ئێدی نکاری ئالیکاریا مالا خوه، زارۆکێن خوه بکی دا کو بکاربن بژین.
ژ به‌ر ڤێ سه‌ده‌مێ یه کو ئیرۆ ل باکورێ کوردستانێ بێده‌نگی و ترس هه‌یه کو ڤێ ژی په‌ردا بێده‌نگیێ کشاندیه سه‌ر وه‌لاتپارێزان.
لێ نها تشته‌ک ژ ده‌ستێ مه نایێ. ژ به‌ر کو وه‌لاتپارێزن مه، پارتی و ڕێخستنێن مه، دام و ده‌زگه‌هێن مه، گه‌ل و خه‌لکێ مه هه‌می ب هه‌ڤره که‌تنه بێ ده‌نگیه‌کێ کو ئه‌ڤ ژی نه ژ خێرێ ڕا یه. ئه‌ڤ دێ چ ده‌مێ ژ سه‌ر وان ڕابه، ئان ڕاکن هێشتا نه دیاره.
هه‌ر کو گه‌ل و پارتیێن ئارمانجا وان ئازادیا کوردستانێ بن، بێ ده‌نگ دمینن، پێلا داگیرکه‌ران یا ژ بۆنا چنه‌کرنا کوردان زێده‌تر دبه. هه‌ر کو بێ ده‌نگی ددۆمه، تەعدایی و زلما داگیرکه‌رێن ترکان بەردەوام دكە.
ترک هه‌می نها بوونه نژادپه‌ره‌ست و ل هه‌مبه‌ر کوردان هه‌می بوونه یه‌ک ده‌نگ کو کوردان ل باکورێ کوردستانێ نەھێلن. ئه‌و ژی ڤێ ژ ئه‌ردۆگانێ دژمنێ کوردان دستینه.هه‌ر وه‌ها ئه‌ردۆگان ژی ڤێ زلما ل کوردان دکه، ب قوه‌ت و پشتگریا مەهەپە یا فاشیست دكە.
مەهەپە یا ل سه‌ر بنگەھێ نژادپه‌ره‌ستیا ترک هاتیه دامه‌زران، ژ ڕۆژا دامه‌زراندنا خوه و هه‌تا نها چ جاران فکر و ڕامانێن وان ب ده‌ستێ وان نه‌که‌تیه ژیانێ. ئه‌و دبێژن ئه‌ردۆگان ژی دکه. ژ به‌ر کو ئه‌ردۆگان دترسه کو ده‌ستهلاتیا خوه و‌ندا بکه، خوه ب هه‌ر ئاوایی ب مەهەپێ ڤه گرێدایە. یانی بوویه خولامۆکێ مەهەپێ.
ئه‌ردۆگان ژ بۆنا ده‌سهلاتیا خوه و مەهەپێ ژی ژ بۆنا وان فکر و ڕامانێن خوه یێن فاشست بخن ژیانێ ل هه‌ڤ کرنه و هه‌می کار و خه‌باتا وان ب تەنێ بوویه کوشتن، گرتن و وێرانکرنا کوردان وکوردستانێ.
هه‌لبه‌ت ئه‌و ژی نه ب سه‌رێ خوه ڤان خه‌رابیان دکن. پارتیا کو ل سه‌ر ناڤێ کوردان دامه‌زراندنه ژی ل گه‌ل وانه، ل پشتا وانه. تشتێن ئاکەپە و مەهەپە نکارن بکن ئان ناخوازن ل سه‌ر ناڤێ وان بێ کرن ڤێ جارێ ژی ب سایا پەکەکێ دخن ژیانێ.
د شه‌رت و مه‌رجێن ئیرۆ دا ئه‌ڤ بێده‌نگی ب خوه را ته‌سلیمبوونێ تینه. ئه‌م باش دزانن کو ل ڤێ جهانێ گه‌له‌ک وه‌لات ژ ڕه‌وشا ئیرۆ یا باکورێ کوردستانێ خه‌رابتر بوونه. ب ده‌ستێن موسسۆلین و هیتله‌ر گه‌له‌ک عه‌جێب، کوشتن و مالوێرانی دتبوون. لێ خه‌لکێ وان ب یه‌کێتیا ناڤا خوه زۆرا وان برن و ژ بۆنا خوه جڤاكێن دەمۆكراتیك ئاڤا كرن.
د شه‌رت و مه‌رجێن ئیرۆ دا کو هه‌می مه‌تۆدێن ئێشکه‌نجه و مالوێرانیێ ل سه‌ر کوردان تێنه جه‌رباندن. لێ دڤێ کورد ب هه‌ڤرا ڕێیا چاره‌سیێ په‌یدا بکن دا کو ڤێ زلمێ ژ سه‌ر خوه و گه‌لێ خوه ڕاکن.
هه‌گه‌ر ئه‌ڤ نه‌یێ کرن، ئیرۆ ل کوردستانێ گرتن و کوشتن هه‌یه، سبێ وێ ڤێ ده‌رباسی ئه‌ورۆپا ژی بکن. ژ به‌ر کو د ده‌ستێ ئه‌ردۆگان دا ڕێخستنه‌کا وه‌که پەکەکە و داعیش هه‌یه. ژ بیر نه‌کن کو گه‌له‌ک وه‌لاتپارێز ب ده‌ستێ پەکەکێ ل ئه‌ورۆپا هاتن کوشتن، گه‌له‌ک هاتن ته‌هدیتکرن دا کو ل دژ پەکەکێ ڕاستیێ نه‌بێژن و نه‌نڤیسینن…
هه‌ردو ب هه‌ڤره ئاکەپ و پەکەکە ئانگۆ ئه‌ردۆگان و عه‌ڤدلا ل دژی باشوورێ کوردستانێ چالاکیان ل دار دخن دا کو وێرێ نەگەھە ئارمانجا خوه و ده‌وله‌تا کوردی یا سه‌ربخوه ڕانه‌گەهینن.
یان ئه‌م دێ وه‌ها بێده‌نگ بن هه‌تا کو ئه‌م یه‌ک ب یه‌ک بێنه گرتن و کوشتن، یا ژی دڤێ ئه‌م ڕێیه‌کێ کو ڤێ بێده‌نگیێ ڕاکن ببینن. ئه‌و ژی ب تەنێ ب ئاڤاكرنا ئه‌نیه‌ک ئان ھەڤپەیمانیەكا ڕێخستنێ مه ل سه‌ر خه‌تا نه‌ته‌وه‌یی دبە، لێ مخابن ئه‌و ژی ڤێ ناکن…ئێدی هوون دزانن…
