د ده‌ما شه‌رێ جیهانێ یێ دویه‌م و به‌رفره‌هبوونا سۆسیالیزما سۆڤیه‌تێ ل ئه‌ورۆپایا رۆژهلات، ئیدیۆلۆژیا چه‌پگر ل کوردستانێ و وه‌لاتێن د حالەتێ پێشکه‌فتنێ دا به‌لاڤ بوو و یەکەم قوربانی ل کۆمارا کوردستانێ ژ کوردان وه‌رگرت.
ژ وێ ده‌مێ ڤه ئیدیۆلۆژیا چه‌پگر د کوردستانێ دا پرسگرێکه‌ک بۆ ئیدیۆلۆژیا نه‌ته‌وی چێکریه کو کوردان هه‌رتم به‌ردێل دایه و ئیدیۆلۆژیا چه‌پگر ناهێله کو کورد ل سه‌ر مافێن خوه یێن نه‌ته‌وی بفکرن و ژ بۆ به‌رژه‌وه‌ندیێن خوه ب ئاوایه‌کی یه‌کگرتی تێبکۆشن. تێکۆشین و هه‌ولدانێن چه‌ند ئالیێن سیاسی یێن کوردستانی د ڤی واری دا بوونه قوربانی و هه‌ولێن وان ژی پووچ بوونه.
د ڤی واری دا گه‌له‌ک نموونه هه‌نه ب تایبه‌تی د ناڤ پارتیێن ده‌مۆکرات دا. ب کورتی گۆتارا خوه ژ بۆ کو خوه‌نده‌ڤانان وه‌ستیایی نه‌کم، ئه‌ز دێ ته‌نێ تێکۆشینا پارتیا ده‌مۆکرات ئا کوردستانێ (پدک) وەک میناکه‌کێ بدم کو ژ سالا ۱۹٤٦ێ ڤه ژ بۆنا بدەستخستنا مافێن نه‌ته‌وه‌یی یێن کورد دخەبتە و د ژیانا خوە یا ۷۷-سالی دا چه‌ندین جاران باجا نه‌ته‌وه‌ییبوونا خوە دایه:
۱. د سالا ۱۹٦٤ێ دا ئیبراهیم ئه‌حمه‌د و هه‌ڤالێن وی یێن مائۆئیست شۆره‌شا ئیلۆنێ فرۆت رژێما شاهێ ئیرانێ.
۲. د سالا ۱۹٦٦ێ دا هه‌مان گرووپا کو ژ ئالیێ مه‌لا مسته‌فا بارزانی و سه‌رکرده‌یێن پارتیا ده‌مۆکرات ڤه هاتبوون عەفوکرن، ڤێ جارێ ملێ خوە دان رژێما ئیراقێ و ل دژی نه‌ته‌وه‌یا خوه ب چه‌کان رووبروویێ پێشمه‌رگه‌یێن کو ژ بۆ مافێن گه‌لێ خوه شه‌ر دکرن، کرن.
۳. د سالا ۱۹۷۰ێ دا ئه‌ڤ جاش ژ بۆ جارا دویه‌م هاتن عەفوکرن و ڤه‌گه‌ریان ناڤ ره‌فێن شۆره‌شێ، لێ د ناڤ دلێ پارتییا ده‌مۆکرات دا کۆمه‌لا کۆمونیست ئاڤا کرن و بوون سه‌ده‌ما به‌لاڤبوون و گه‌نده‌لیێ د شۆره‌شێ دا و رێ ژ بۆ شکەستنا شۆرەشێ سالا ١٩٧٥ێ خوەش کر.
٤- د ده‌ما شۆره‌شا گولانێ دا، د بن ناڤێ شۆره‌شا نوو دا، نێزیکی ١٠٠٠ پێشمه‌رگه ژ هه‌ورامانێ هەتا قه‌لادزه‌یێ کۆم کرن و د سالا ۱۹۷۸ێ دا چوون و ۲٥۰ پێشمه‌رگه‌یێن پارتیا ده‌مۆکرات ل بادینان ژ ناڤ ببن ئان ژی ژ بادینان ده‌ربخن. د ۱۳/٥/۱۹۷۸ دا، مه‌لا ئه‌مین حاجی محه‌مه‌د هۆستانی، ئه‌حمه‌د هه‌رکی ژ رۆژهلاتێ کوردستانێ، عۆمه‌ر حه‌ما عه‌لی ناسکری ب عۆمه‌ر ره‌ش ژ گوندێ مه‌لا قه‌ره یێ ناڤچه‌یا کاندیناوه، ره‌شید حاجی محه‌مه‌د هۆستانی، برایێ مه‌لا ئه‌مین، مه‌ردان رۆسته‌م سوورچی، یه‌حیا شامل، یووسف سندی ئه‌بوو حه‌بید شێنیێن بادینانێ شه‌هید کرن، لێ پلانا وان تێک چوو و سه‌رێ خوه ژی ل سەر دانا.
٥. یەنەکێ هه‌ر چه‌ند د رۆژێن ١٩٩٤/٥/٣ و ١٩٩٥/٣/٢٨ دو جاران پارلامه‌نتۆیا کوردستانێ ب چه‌کان داگیر کربوو ژی، لێ ل ڤێرێ نەراوستیا و پشترا ژی پاسدارێن ئیرانێ ئانین داکو ب پشتەڤانیا ئیرانێ پارتییا ده‌مۆکرات ئا کوردستانێ (پدک) ل ، باشوورێ کوردستانێ ژناڤ ببن. پارتییا دەمۆکرات ئا کوردستانێ ژی، پشتی گه‌له‌ک هه‌ولێن ئالیێن ناڤنه‌ته‌وی، نەچار کر کو داخوازێ ژ سه‌ددام بکە کو کۆمارا ئیسلامی یا ئیرانێ یا داگیرکەر ژ ئیراقێ ده‌ربخه، ئه‌ڤ ژی بوو سه‌ده‌ما بوویه‌را ۳۱ێ ته‌باخا ۱۹۹٦ێ کو یەنەک ل گه‌ل پاسدارێن ئیرانێ یێن داگیرکه‌ر ره‌ڤیان ئیرانێ، لێ پشتی کو وان خوە پرچه‌کدار کری جارەکا دن ڤه‌گه‌ریان .
٦- ب خیانه‌تا ۱٦ێ جۆتمه‌هێ که‌رکووک، خورماتوو و خانه‌قین و جه‌لەولا فرۆتن ئیران و ئیراقێ و پاسدارێن ئیرانێ بۆ پارێزگه‌هێن قه‌لادزێ، هه‌له‌بجه و سلێمانیێ ئینان.
نوها سێ مه‌ه ب سه‌ر ئالۆزیێن ئیرانێ را ده‌رباس دبن و کۆمارا ئیسلامی یا ته‌رۆریست پێویستیا وێ ب ئالۆزیه‌کا نوو ل سینۆرێ کوردستانێ هه‌یه. د ڤێ ده‌مێ دا یەنەک ب ئاشکه‌ره داخوازێ ژ پەدەکێ دکه کو بێیی فه‌رق و جوداهیا هلبژارتنان و ده‌نگێن گه‌ل، ب ئاوایه‌کی هه‌ڤبه‌ش دگه‌ل پەدەکێ کوردستانێ برێڤه ببن. داخوازا یەنەکێ تێ واته‌یا راوه‌ستاندنا پرۆسه‌سا گه‌شه‌پێدانا کوردستانێ و ده‌مۆکراسیا وه‌لات، دڤێ پارتیا ده‌مۆکرات و ئالیێن دن ب تایبه‌تی خه‌لکێ باشوور های ژ کۆمپلۆیا کۆمارا ئیسلامی هه‌به و باجا ڤێ چه‌پگریێ نه‌دن!
ژ فێسبووکا: حامد گەوهەرێ
