کورد د دیلانا نه‌ڤیێ ”تۆپال ئۆسمان” دا
ڕەمزی كەریم د مالپەرا خوە یا فێسبوكێ دا ل سەر ھلبژاتنا سەرۆكشارەدارێ ستەنبۆلێ نڤیسەك نڤیسیە لێ مە سەر نڤیسەك دن ژێ را دانی و ئەڤ ل ژێر نڤیسا كاك رەمزی:
ترک گانا خوه دکن، کورد سه‌رێ خوه دشوون
داخوازا لێبوورینێ دکم ژ به‌ر کو من ئه‌ڤ گۆتنا پێشییا گوهه‌ری و وه‌ک سه‌رنڤیس ب کار ئانی. لێ ڕه‌وشا کوردێن باکور و هلبژارتنا سه‌رۆکشاره‌دارێ سته‌مبۆلێ ئه‌ڤ گۆتن ئانی بیرا من. د گۆتنا پێشییان ده شوونا گۆتنێن ”ترک و ”کورد”، ناڤێن دو گوندان هه‌نه.
دوهی هلبژارتنا سه‌رۆکشاره‌دارییا سته‌مبۆلێ بوو. ژ به‌ر ڕه‌وشا کۆچبه‌رییێ و هه‌ژمارا ده‌نگدارێن ل سته‌مبۆلێ، هه‌ر دو پارتییان ژی ڤێ هه‌فته‌یا داویێ گرانییا خوه دان سه‌ر کوردێن ل سته‌مبۆلێ دژین، و ل سه‌ر که‌س و ڕێخستنێن ل سه‌ر کوردان خودانهێز. ل باکور کوردێن پشتگرێن ئاکەپەیێ پشتگرییا ئاکەپەیێ، کوردێن پشتگرێن هەدەپە و جەهەپەیێ ب هالان و هاوار و هه‌یهۆیا پشتگرییا جەهەپەیێ کر. بسه‌رکه‌تنا بەربژێرێ جەهەپەیێ ژ ئالییێ هن کوردان ڤه ب “کورد ب سه‌ر که‌تن”، “هەدەپە” ب سه‌ر که‌ت”، “کوردان قه‌زه‌نج کر”، “ئاهێ جوانێن مه یێن کو ل باژارێن وه‌کی دیاربه‌کر سوور، جزیر و نسێبینێ ژ ئالییێ ده‌وله‌تێ ب ئاوایێن هۆڤانه هاتن قه‌تلکرن ل ستەنبۆلێ ژی ژ زالمان ڕا نه‌ما…”، ”داوییا ئه‌ردۆگان هات” و ل کۆلانێن سته‌مبۆلێ ب گۆڤه‌ندێن ئالا ترکی خه‌ملاندی، هات پیرۆز کرن.
کورد د دیلانا نه‌ڤییێ ”تۆپال ئۆسمان” دا، ل به‌ر موزیکا تۆپال ئۆسمان بوون سه‌رگۆڤه‌ندێن تۆپال ئۆسمانان. (تۆپال ئۆسمان کرێگرتییێ موستافا که‌مال بوو و ب ده‌ستێ وی بێهه‌ژمار پۆنتوسێن یونانی هاتن کوشتن. تۆپال ئۆسمان وه‌کی “قه‌سابێ یونانیان” تێ ناسین. نامزه‌دێ جەهەپەیێ ئیمامۆگلو به‌ری هلبژارتنان گۆت: ئه‌ز نه‌ڤییێ تۆپال ئۆسمانم.)
نه کوردێن هەدەپەیی، نه کوردێن ئاکەپەیی، نه کوردێن جەەهپەیی ژ بۆ بسه‌رکه‌تنا ڕه‌فه‌راندوما ل باشوور ب ڤێ که‌فته‌له‌فتێ خه‌بتیبوون، نه ژی ب ڤێ کێف و شاهییێ، ب ”پیرۆزنامه‌یان” و ب گۆڤه‌ندان بسه‌رکه‌تنا ڕه‌فه‌راندوما ل باشوور پیرۆز کربوون.
ژ بۆ ئاکەپەیێ ژی، ژبۆ جەهەپەیێ ژی ”ساخی و سلامه‌تییا ده‌وله‌تا ترکی” ژ هه‌ر تشتی گرینگتره. یه‌ک وه‌لات، یه‌ک ده‌وله‌ت، یه‌ک ئالا، یه‌ک نه‌ته‌وه، یه‌ک زمان، ژ بۆ ئاکەپەیێ ژی، ژ بۆ جەهەپەیێ ژی ژ سه‌رۆکشاره‌دارییا سته‌مبۆلێ، ژ ده‌مۆکراسییێ، ژ ”خه‌مخوارییا” ژ بۆ کوردان گرینگتره. و ل گۆر وان ئاسته‌نگا مه‌زن یا ل پێش ساخی و سلامه‌تییا ده‌وله‌تا ترکی ژی، کوردن، کوردستانه. کورد چقاس بۆ ناڤ پرسا ده‌مۆکراسییا ترکییه‌یێ، پرسا ده‌ستهلاتا ل ترکییه‌یێ، ئاریشه و ئاسته‌نگێن ل پێش ترکییه‌یێ بێن کشاندن، ئه‌وقاس دبن ترکییه‌یی. چونکی ب هه‌یهۆیی چوونا ناڤ ڤان ئاریشه‌یان، پشتگرییا یه‌ک ژ وان هێزانه کو ساخی و سلامه‌تییا ده‌وله‌تا ترکی، وه‌ک یه‌که‌م و ته‌نها ئه‌رک دایه پێش.
نه ئاکەپە نه جەهەپە ده‌ڤ ژ که‌مالیزمێ به‌ردده. نه بسه‌رکه‌تنا جەهەپەیێ، نه ژی بسه‌رکه‌تنا ئاکەپەیێ، یان مەهەپەیێ ئاهێ جوانێن مه ژ عه‌ردێ ڕادبه، نه قانوونا بنگه‌هین یا ترکییه‌یێ، نه سیسته‌ما په‌روه‌رده‌یێ، نه دامووده‌زگه‌هێن پۆلیس، مه‌حکه‌مه، له‌شکه‌ر، بورۆکراسی، نه ژی ساخی و سلامه‌تییا ده‌وله‌تا ترکی تێ گوهه‌رتن.
ترک مه فێری خوه دکن؛ ئه‌م ژی وه‌کی وان بفکرن، مینا وان هه‌ست بکن، ئه‌م خوه بشبینن وان، ژ بۆ چاره‌سه‌رکرنا ئاریشه و پرۆبله‌مێن ئه‌و ددن پێش مه بخه‌بتن، سیسته‌ما وان قه‌بوول بکن، ئه‌م ژی ترکیێ وه‌کی وه‌لاتێ خوه بزانن؛ ببن ترک. هه‌تا ئه‌م ببن ترک ژی، د ده‌ستێن وان دا ببن شڤا ل سه‌رێ هه‌ڤ دخن، یان ژی ئالییه‌کی وان ل سه‌ر پشتا خوه بگهینن مه‌یدانا دیلانا وان.
جه‌مال سۆنمه‌ز، فکرا من ب گۆتنان خوه‌ش شرۆڤه کریه: ”هه‌ر که‌س مه‌منوون و دلشا یه کو بوویه پارچه‌یه‌ک ژ سیاسه‌تا ناڤمالی یا ترکیێ. هلبژارتنا سه‌رۆکشاره‌دارییا سته‌نبۆلێ خوین دایه ترکیه‌یبوونێ. مینا ترکه‌کی فکرین، مینا ترکه‌کی هه‌ست کرن گهشتیه پله‌یا بلند. بارزانیێ دخه‌بته کوردستانێ ئاڤا بکه، بوویه ”بارزۆ”، ده‌مرتاشێ کو کوردستان کریه به‌شه‌ک ژ ترکیه‌یێ، بوویه سه‌رۆکێ کوردا یێ زانا و شاره‌زا. ئه‌ڤ ڕه‌وشا کورده‌کی ساده یه ژی، مامۆستایه‌کی ب ده‌هان هه‌زار کیلۆمه‌ته‌ره دووری کوردستانێ یه ژی. هه‌ر که‌سی ده‌ست پێ کریه مینا ترکه‌کی دفکره، هه‌ر که‌س دلشا یه.”
2019.06.24
