کورد و بارزانی د هه‌ڤدیتنا مه یا ب میخائیل گۆرباچۆڤ را
د ۳۰ێ ته‌باخا سالا ۲۰۲۲ێ دا، میخائیل گۆرباچۆڤ، سه‌رۆکێ داوی یێ یه‌کیتیا سۆڤیه‌تا به‌رێ، د ته‌مه‌نێ خوه یێ ۹۱ سالی دا مر.
د سالا ۲۰۱۲ێ دا، ئه‌ز (هێمن هەورامی) به‌رپرسێ فه‌رمانگه‌ها تێکلیێن ده‌رڤه یا پارتیا ده‌مۆکراتا کوردستانێ (پدک) بووم و یه‌ک ژ به‌رنامه‌یێن مه یێن خه‌باتێ کو مه ب بالداری کار ل سه‌ر دکر، ئاڤاکرنا تۆره‌کا به‌رفرها په‌یوه‌ندیان دگه‌ل ناڤه‌ندێن لێکۆلینێ و به‌شداربوونا د کۆنفه‌رانسێن هه‌رێمی و ناڤده‌وله‌تی دا بوو. مه ڤه‌خوه‌ندنامه‌یەک وه‌رگرتبوو کو ئه‌م ل سته‌نبۆلێ به‌شداریێ مۆنتەدا گۆرباچۆڤ یا ل سه‌ر ره‌وشا داوی یا رۆژهلاتا ناڤین ببین.
ژ بلی به‌شداربوونا ئەکتیڤ یا شاندەیا مه د جڤین و پانه‌لان دا، ل کێله‌کا مۆنتەدایێ، مه کاری ژ نێزیک ڤه ب میخائیل گۆرباچۆڤ را هه‌ڤدیتن پێک بینن. ب کورتی مە به‌حسا هه‌رێما کوردستانێ و نێرینا سه‌رۆک بارزانی یا ل سه‌ر هه‌موو مژارێن هه‌رێمێ کر، وی ب بالداری گوهداری کر و پشت را ژ من را گۆت کو ئه‌و ژ نێزیک ڤه هایداری دۆزا کوردستانێ و تێکۆشینا رێبه‌رێ مه‌زنێ گه‌لێ کورد مسته‌فا بارزانی یه. ده‌ما پرسا سووریێ و پرۆسه‌یا ئاشتیێ ژ بۆ چاره‌سه‌رکرنا پرسا کورد ل ترکیێ وێ ده‌مێ د رۆژه‌ڤێ دا بوو، وی گۆت کو کوردێن ئیراقێ ب هیکمه‌تا بارزانی دکارن ئالیکاری و پشته‌ڤانیا سه‌رکه‌فتنا هه‌ردو پرۆسه‌یان بکن و رۆله‌کا سه‌ره‌کی ل ناڤچه‌یێ بلیزن.
من ژ وی را گۆت کو د ناڤبه‌را رووسیا و هه‌رێما کوردستانێ دا په‌یوه‌ندیێن دیرۆکی هه‌نه و ژ بۆ گه‌لێ مه جهێ کێفخوه‌شیێ یه کو رووسیا د سالا ۲۰۰۷ێ دا وه‌ک یه‌که‌م ئه‌نداما هه‌رده‌می یا ئه‌نجوومه‌نا ئاسایشا ناڤده‌وله‌تی کۆنسولخانه‌یا خوه ل هه‌ولێرێ ڤه‌کر. وی ژی سۆز دا کو پێشنییاران بده به‌رپرسێن رووسی کو دڤێ زێده‌تر په‌یوه‌ندییێن ناڤبه‌را رووسیا و هه‌رێما کوردستانێ پێش بخن.
ژ فێسبۆکا هێمن هه‌ورامی
