نڤیسار

کورد و هزرا نه‌ته‌وی

داموده‌زگه‌هێن خه‌لکێ ژ بۆ خورتکرن و پاراستنا به‌رژه‌وه‌ندییێن مله‌ت و وه‌لاتێ خوه‌ دخه‌بتن. ژ بۆ لهه‌ڤراگرتن و تفاقا مله‌تێ خوه‌ دخه‌بتن و هه‌ول ددن چاره‌سه‌رییان ژ ناکۆکی و پرسگرێکێن ناڤا گرسه‌یێن خوه‌ را ببینن.

ل ده‌رڤه‌یی وەلات و ل دیاسپۆرایێ ژ ده‌رڤه‌یی کوردان هه‌ما بێژن ته‌مامێ مله‌تان خزمه‌تێ ژ یه‌کێتییا خوه‌ و ژ به‌رژه‌وه‌ندییێن وه‌لاتێ خوه‌ را دکن.

گاڤا مژار دبه‌ به‌رژه‌وه‌ندییێن مله‌ت، ئالا و وه‌لات، هه‌م ناکۆکی و پرسگرێکێن ناڤخوەیی دادنن ئالییه‌کی و دبن یه‌ک ده‌ست، دبن یه‌ک ده‌نگ و یه‌ک هێز.

بێگومان ئه‌ڤ یه‌ک ژ خورتبوونا هه‌ستێن وان یێن نه‌ته‌وی، ژ خوه‌ناسکرن و هزرا وان یا وه‌لاتپه‌روه‌ری دهێت.

ل بەرۆڤاژی خه‌لک و مله‌تێن دن، ئه‌م کورد چ ل وەلات بن و چ ل ده‌رڤه‌ و دیاسپۆرایێ بن، ئه‌م چو جارا نه‌بوونه‌ خوه‌دییێ وان هه‌ست و گیانێ نه‌ته‌وی کو کاربن به‌رژه‌وه‌ندییێن خوه‌ یێن شه‌خسی، مالباتی و پارتیتی ده‌ینن ئالییه‌کی و ل دۆرا به‌رژه‌وه‌ندییێن نه‌ته‌وی کۆم ببن.

ئه‌ڤ ژی هه‌لبه‌ت ژ لاوازبوون، سستبوون، ژاربوون و ژ چونه‌بوونا هه‌ست و هزرێن نه‌ته‌وی تێ.

هه‌ست و هزرێن مله‌تێن دن ژ دل و مه‌ژییێ وانه‌، یێ مه‌ کوردان ژی ته‌نێ ب زمان و ژ زمانێ مه‌ یه‌. نه‌ ژ دل و مه‌ژیێ مە یه‌. نه‌ته‌وپه‌روه‌رییا مه‌ نه‌ته‌وپه‌روه‌رییه‌ک خاڤه‌، بێ واته‌ و بێ ئارمانجه‌.

گۆتن هه‌یه‌ لێ د کرنێ دا چو که‌س ئه‌رک و نرخێن نه‌ته‌وپه‌روه‌رییێ بجهناینە.

ب زمان هه‌رکه‌س کوردپه‌روه‌ر و نه‌ته‌وپه‌روه‌ره‌، لێ د کرن و عه‌مه‌ل دا بێهنا نه‌ته‌وپه‌روه‌رییێ ژ وان نایێ.

به‌رژه‌وه‌ندییێن مه‌ د سه‌ر هه‌ر تشتی را یه‌ و گاڤا به‌رژه‌وه‌ندییێن مه‌ دکەڤن خه‌ته‌رییێ دا، نه‌ته‌وپه‌روه‌رییا مه‌ ژی وندا دبه‌.

هه‌لبه‌ت بێده‌وله‌تبوون و چونه‌بوونا په‌روه‌رده‌یه‌ک نه‌ته‌وی و نه‌ته‌وپارێزی د که‌سایه‌ت و نه‌ته‌وپه‌روه‌رییا مه‌ دا رۆله‌ک مه‌زن دلیزه‌.

لێ گاڤا ئه‌م ل خه‌لک و مله‌تێن دن دنێرن، یێن خوه‌دی ده‌وله‌ت و بێده‌وله‌ت ژی نه‌ته‌وپه‌ره‌ست نرخ و هێژایییێن وه‌لاتێن خوه‌ نه‌ و هه‌ست و هزرێن وان یێن نه‌ته‌وی ژ یێ مه‌ کوردان قات ب قات زێده‌تر و خورتترن.

نوری چه‌لیک

Back to top button