نڤیسار

کورد گەهشتن ئاستا هه‌ری بلند

هه‌ر تشته‌ ب کار و خه‌باتێ دمه‌شه‌، ب ڕێڤه‌ دهەره‌. ب به‌رخوه‌دان و هه‌ولدانێ، ب گۆتنێن ڕاست و ل سه‌ر بنگه‌هه‌ک دوروست و نه‌ته‌وه‌یی مرۆڤ ژی دگەهژه‌ ئارمانجا خوه‌.
ژ بۆنا مرۆڤ بگەھژه‌ وێ ئارمانجا خوه‌ یا کو ژ بۆنا وێ کار و خه‌باتێ دکه‌، دڤێ کار بێ کرن.
د ناڤا کار و خه‌باتێ دا دکاره‌ گه‌له‌ک ئاسته‌نگی، ئالۆزی، خائین و جاش ژی ده‌رکه‌ڤن پێش. لێ یا گرینگ ئه‌وه‌ کو مرۆڤ بێی کو ل که‌سان، ل جاشان، ل خائینان و ب خوه‌فرۆشان ڕا سه‌رێ خوه‌ بێشیه‌ دڤێ مرۆڤ کارێ خوه‌ بکه‌. هه‌تا کو کوردستانا سه‌ربخوه‌ بێ ڕاگەهاندن. دوو ڕا دۆر تێ تشتێن دن. بارزانیان ژی هه‌تا نها ئه‌ڤ کرنه‌…

هه‌لبه‌ت ل ڤێ جیهانێ و تایبه‌تی ل کوردستانێ ژی ل هه‌مبه‌ر هه‌ر تشته‌کی، پیرۆزایی، لێدان و فرۆتن ژی دکاره‌ ده‌رکه‌ڤه‌ پێشبه‌ری مرۆڤ.
ژ خوه‌ ده‌ما ئه‌م به‌حسا وه‌لاته‌ک ب سالان کۆلۆنی به‌، د ناڤا چار داگیرکه‌ران دا هاتبه‌ پارچه‌کرن دکن، ته‌کۆشین و به‌رخوه‌دانێن ل ور دێ هه‌ر زه‌حمه‌تر به‌.
لۆما ژی ده‌ما بارزانیان بریارا ئازادکرنا گه‌لێ خوه‌ و ب ده‌ستخستنا عه‌ردا خوه‌ دان، وان ڤان تشتێن مه‌ گۆت هه‌میان ژی دزانی بوون.

د ته‌کۆشینا بارزانیان دا ئه‌م دبینن، دخوینن و گوهداری دکن کو بێ چ هاته‌ سه‌رێ وان. بێ چاوا هندەك کوردان، هندەك خوه‌ فرۆشان و هندەك نه‌خێروازێن وان ب هه‌ڤرا کار دکرن کو ئه‌و ب سه‌ر نه‌که‌ڤن.

ژ بۆنا بارزانیان ڕێیا ڕاست ئه‌و بوو کو دڤێ ئه‌و ب سه‌رکه‌تانا خوه‌ و یا گه‌لێ خوه‌ ڤه‌ مژوول ببن، بوو. وانێن مه‌ ل ژۆر ب ناڤ کرن هه‌میان ل گه‌ل هه‌ڤ و ب هه‌ڤره‌ ژ بۆنا تێکبرنا بارزانیان کار و خه‌بات کرن. لێ ب سه‌رنه‌که‌تن. وان وه‌ندا کرن، گه‌لێ کورد و بارزانی ب سه‌ر که‌تن.
ئارمانج و هه‌ده‌فا بارزانیان ئه‌و بوو کو گه‌لێ کورد بکن خوه‌دی ده‌وله‌ت و د ڤێ ڕێیێ دا ب سه‌رکه‌تن. گه‌لێ کو ئه‌ڤ سه‌د سالن ل به‌ندا ئازادی و سه‌رخوه‌بوونا خوه‌ بوون، قه‌زه‌نج کرن. ڕێیا ئازادی، ئاشتی و سه‌رخوه‌بوونێ ب سایا وان و ڕێبازا بارزانیێ نه‌مر ب سه‌ر که‌ت.

چما ڤێ دبێژم؟

ده‌ما ئه‌م دیرۆکا گه‌لێ کورد، دیرۆکا خوه‌، درۆکا جیهانێ بخوینن ئه‌م دێ فێم بکن کا بارزانیان ژ بۆنا کوردستانه‌کا ئازاد و سه‌ربخوه‌ چقاسی به‌ده‌ل دانه‌، کار و خه‌بات کرنه‌، دبینن و دزانن.

ئیرۆ ژی ئه‌م دبن شاهدێ وێ یه‌کێ کو ڤان جامێرانا ب که‌د و خه‌باتێن خوه‌ یێن نشتمانی، ب دیپلۆماسیه‌کا ناڤنه‌ته‌وه‌یی دۆزا گەلێ خوه‌ خستنه‌ قادا جیهانێ، هاته‌ دیتن و زانین.
خه‌یالا کوردان یا هه‌ری مه‌زن کو کوردستانه‌کا سه‌ربخوه‌ ببینن و د قادا ناڤنه‌ته‌وه‌یی دا کورد ژی ل گه‌ل ده‌وله‌تێن ڤێ جیهانێ ڕوونێن ئانگۆ بجڤن، بوو.
ڤان بارزانیێن جانفیدا ب وێ ته‌کۆشینا خوه‌، ب وێ به‌رخوه‌دا خوه‌ یا بێ وه‌ستان کورد خستن قادا ناڤنه‌ته‌وه‌یی.

ئیرۆ مه‌ ب چاڤێن خوه‌ دیت، ب گوهێن خوه‌ بهیست کو سه‌رۆکێ هه‌رێما کوردستانێ ڕێزدار نێچیرڤان بارزانی به‌شداری جڤینا داڤۆسێ بوو یه‌. ب ڤێ به‌شداریا خوه‌ جه‌نابی وی دیپلۆماسیه‌کا وه‌ها مه‌شاند و دمه‌شینه‌ کو وی کاریبوو ل گه‌ل مه‌زنێن ڤێ دنیایێ بجڤه‌.

گه‌له‌ک هه‌ڤدیتنێن کو ژ کوردان ڕا وه‌که‌ نان و ئاڤێ لازم بوو پێک ئانی. ئه‌ڤ نه‌ به‌س بوو، جه‌نابێ سه‌رۆکێ هه‌رێما کوردستانێ ڕێزدار نێچیرڤان بارزانی د گه‌ل مه‌زنێ دنیایێ، ب سه‌رۆکێ ئەمریکا یێ ڕا ژی جڤییا. ئه‌ڤ گه‌له‌کی گرینگه‌، ژ به‌ر کو گه‌له‌ک ده‌وله‌تێن ب سالان هه‌نه‌، نکارن ب سه‌رۆکێ ئه‌مریکایێ ڕا ڕوونێن، دانیشن ئانگۆ جڤینه‌کێ پێک بینه‌.
ڤان جیڤین و هه‌ڤدیتنان سینیالا کوردستانا سه‌ربخوه‌ یه‌. لۆما ئه‌م دبینن کو بارزانی گەهشتن ئارمانج و هه‌ده‌فا خوه‌ یا ژ بۆنا کوردستانه‌که‌ ئازاد و سه‌ربخوه‌.
هه‌لبه‌ت هێشتا هه‌می مه‌سه‌له‌ نه‌قه‌دیا یه‌، لێ دڤێ ئه‌م بزانبن کو ب به‌شداربوونا ڕێزدار نێچیرڤان بارزانی، کورد گەهشتن ئاستا هه‌ری بلند.

ئه‌م باش دزانن کو شه‌ڤره‌ش ب ده‌رکه‌تاندنا ڕۆژێ، ڕۆنی دبه‌. ئه‌و ڕۆژا ئه‌م ل به‌ندێ بوون، ل داڤۆسێ هلات.

بووبێ ئه‌سه‌ر
2020.01.23

Back to top button